Luka 24 - Ṅmãle̱ Kroṅkroṅ Le̱

¹ Ši otši le̱ kleṅkleṅ gbĩ le̱ no̱ lebi mā̃ṅkpa le̱ ame̱ba bu le̱ he, ni ame̱hie tšofãi-ke̱-ṅmai ní ame̱sā ame̱to le̱ ke̱-ba; ni meikomei hũ fata ame̱he.

² Ni ame̱na ake̱ ákoklo te̱ le̱ ke̱-dše bu le̱ nā;

³ ni beni ame̱bote mli le̱, ame̱naa Nuṅtšo̱ Iesu gbonyo le̱.

⁴ Ni eba mli ake̱, beni ame̱fe yā ye̱ ene̱ hewo̱ le̱, na, hĩĩ enyo̱ badamo̱ ame̱mase̱i, ní ame̱wo atadei kãṅkãṅi.

⁵ Ši beni ame̱šeo̱ gbeyei ni ame̱mãmo̱ ame̱hĩe ši le̱, nomei kē̱ame̱ ake̱: Mẽba nyetaoo̱ hĩekãlo̱ le̱ ye̱ gbohĩĩ ateṅ?

⁶ Ebe̱ bie̱, ši moṅ ete ši! Nyekaia bo̱ni ekē̱nye beni eyo̱ Galilea lolo le̱,

⁷ ake̱: Dša aṅõ gbomobi le̱ awo gbomei ešafelo̱i adeṅ, ní ase̱ṅle̱, ní gbĩ ní dši gbĩ etē ní ete ši ekoṅ. Mat 17,22. 23.

⁸ Ni ame̱kai ewiemo̱i le̱,

⁹ ni ame̱kũ ame̱se̱ ke̱-dše bu le̱ nā, ni ame̱yagba mei nyoṅma ke̱ ekome le̱ ke̱ mei ni eſe̱ le̱ nii ne̱ fẽ.

¹⁰ Ši *Maria Magdalēna ke̱ Iohana ke̱ Iakobo nye Maria ke̱ mei ni eſe̱ ní fata ame̱he le̱ dši mei ní bagba bo̱foi le̱ nii ne̱. *8,2. 3.

¹¹ Ni ne̱ke̱ wiemo̱i ne̱ fe tamo̱ adesã ye̱ ame̱hĩe, ni ame̱hee ame̱yee.

¹² Ši Petro te ši ni eša foi ke̱-te bu le̱ he; ni beni ekoto ši ni ekwe̱ mli le̱, ena klalai le̱ dſere ši aṅklo-aṅklo. Ni edše dše̱i ete ewe, ni enā kpe̱ ehe ye̱ noni eba le̱ hewo̱.

¹³ Ni na, nakai gbĩ le̱ no̱ noṅṅ le̱ ame̱teṅ mei enyo̱ yiṅ ke̱-te akrowa ko ni ke̱ Ierusalem dšeke̱mo̱ aafe stadioi nyoṅmai-ekpa ní atšé̱o̱le̱ Emao le̱ mli.

¹⁴ Ni ame̱mīgbagbā nibii ní eba ne̱ fẽ he sane ye̱ ame̱teṅ.

¹⁵ Ni *eba mli ake̱, beni ame̱gbagbãa sãdši le̱ ni amgbibīo̱ ame̱he sãdši le̱, Iesu dientše̱ babe̱ṅke̱ame̱, ni eke̱anie̱ nyie; *Mat. 18,20.

¹⁶ ši atšĩmo̱ ame̱hĩṅme̱ii agbe̱ ní ame̱kayole̱.

¹⁷ Ni ekē̱ame̱ ake̱: Mẽ sãdši nyegbagbāa ye̱ gbe̱ le̱ no̱ ni nyefe mo̱bo̱mo̱bo̱ ne̱?

¹⁸ Ši ame̱teṅ mokome ni atšé̱o̱le̱ Kleopa le̱ to he nĩ ekē̱le̱ ake̱: Ani okome pe̱ dši gbe̱ ye̱ Ierusalem ní lee sãdši ní eba dše̱i ye̱ gbĩĩ ne̱ amli le̱?

¹⁹ Nĩ ekē̱ame̱ ake̱: Mẽ sãdši ni? Ši ame̱kē̱le̱ ake̱: Iesu Nazarenyo le̱ ni dši *gbalo̱ ní yo̱ hewale̱ ye̱ nitšumo̱ ke̱ wiemo̱ mli ye̱ Nyoṅmo̱ ke̱ maṅ le̱ fẽ hĩe le̱ he sãdši le̱; *Mat. 21,11.

²⁰ ke̱ bo̱ni wo̱so̱fonukpai le̱ ke̱ wo̱maṅ onukpai le̱ ṅõle̱ hã ni abule̱ gbĕle fo̱, ni ase̱ṅle̱ le̱.

²¹ Ši wo̱ le̱ wo̱hĩe kã no̱ ake̱ kũle̱ le̱ dši moni *bakpõ Israel le̱; nĩ ene̱ fẽ se̱ le̱ ṅme̱ne̱ dši gbĩ etẽ ní afe nii ne̱. *Bo̱f. 1,6.

²² Ši asaṅ wo̱teṅ yei komei hũ hã wo̱nā kpe̱ we̱he, edšake̱ ame̱te bu le̱ he mrã mli, K. 1-11.

²³ ni beni ame̱naa egbonyo le̱, ame̱ba ni ame̱bakē̱ ake̱ be̱foi komei hũ dšie ame̱he kpo tšõame̱ ni ame̱kē̱ ake̱ ehĩe kã.

²⁴ Ni mei ní ke̱wo̱ yo̱ le̱ ateṅ meikomei te bu le̱ he, ni ame̱yana take̱ bo̱ni yei le̱ kē̱ le̱ noṅṅ; ši le̱ ni ame̱naa. K. 12. Ioh. 20,3-10.

²⁵ Ke̱ke̱ ni eke̱ame̱ ake̱: Ō kwašiai ní nyeyo̱ šō̃ ye̱ nyetšui mli ake̱ nyeahe nii fẽ ní gbalo̱i le̱ kē̱ le̱ nyeaye.

²⁶ Ani dšee sa esa ake̱ Kristo ana ne̱ke̱ amanehũlũi ne̱ ni ebote, enumnyam le̱ mli?

²⁷ Ni ebõi ke̱-dše̱ Mose ke̱ gbalo̱i le̱ fẽ no̱, ni etšõame̱ nibii ní yo̱ ṅmãle̱i le̱ fẽ mli ye̱ ehewo̱ le̱ ašiši. 5 Mose 18,15. Lal. 22. Ies. 53.

²⁸ Ni ame̱be̱ṅke̱ akrowa ní ame̱yaä mli le̱; ni efe tamo̱ noni ēya ehĩegbe̱,

²⁹ Ni ame̱nyẽ eno̱ ame̱kē̱: Oke̱wo̱ áhĩ ši, edšake̱ dše mina nĩ eše̱ hĩebule̱ etã. Ni ete mli ni eke̱ame̱ yahĩ ši.

³⁰ Ni eba mli ake̱, beni eke̱ame̱ trá niyenii ahe le̱, eko̱ abolo le̱ ni edšō̱ no̱, ni ekũmo̱ mli ni eṅõ-hãame̱; 22,19.

³¹ ke̱ke̱ ni ame̱hĩṅme̱ii gble ni ame̱yole̱; ni elādše ye̱ ame̱hĩe, ni ame̱naale̱ doṅṅ.

³² Ni ame̱kē̱kē̱ ame̱he ake̱: Ani wo̱tšui he edo̱o̱ la ye̱ wo̱mli beni eke̱wo̱ wieo̱ ye̱ gbe̱ le̱ no̱ ní etšõwo̱ ṅmãle̱i le̱ anā le̱?

³³ Ni ame̱te ši ye̱ nakai ṅmle̱tſa le̱ ne̱ noṅṅ, ni ame̱kũ ame̱se̱ ke̱-ba Ierusalem, ni ame̱bana mei nyoṅma ke̱ ekome le̱ ke̱ mei ní ke̱ame̱ yo̱ le̱ ni ame̱bua ame̱he nā;

³⁴ mei ní kē̱: Eye̱ mli ake̱ Nuṅtšo̱ le̱ éte ši, ni edšie ehe kpo etšõ Simon. 1 Kor. 15,4. 5.

³⁵ Ni ame̱ hũ ame̱gba noni ba ye̱ gbe̱ le̱ no̱ le̱ ke̱ bo̱ni fe ní ame̱yole̱ ye̱ abolokũomo̱ le̱ mli le̱.

³⁶ Ni beni ame̱wieo̱ noṅṅ le̱, Iesu dientše̱ hadamo̱ ame̱teṅ ni ekē̱ame̱ ake̱: Hedšo̱le̱ áhãnye!

³⁷ Ši ame̱he̱le ši ni ame̱še gbeyei, ame̱susu ake̱ *mumo̱ ko ame̱naä le̱. *Mat. 14,26.

³⁸ Ni ekē̱ame̱ ake̱: Mẽba nyetšui fãa? ni mẽhewo̱ hũ ni ṅwanedšē teo̱ ši ye̱ nyetšuii amli?

³⁹ Nyekwe̱a minidši ke̱ minãdši ake̱ midientše̱ ni; nyetaä mihe nyekwe̱a; ši mumo̱ ko be̱ helo ke̱ wúi, tamo̱ bo̱ni nyenaä ake̱ miyo̱ ne̱.

⁴⁰ Ni beni ewie ne̱ke̱ le̱, eṅõ enidši ke̱ enãdši etšõame̱.

⁴¹ Ši beni ame̱hee ame̱yee lolo ye̱ mīše̱ hewo̱ ni ame̱hĩe efeame̱ yā le̱, ekē̱ame̱ ake̱: Nyeye̱ noko ní ayeo̱ ye̱ bie̱ lo?

⁴² Ni ame̱hãle̱ *lō ní ašĩ kuku ke̱ wòagbaku; *Ioh. 21,10.

⁴³ ni ehé, ni eye ye̱ ame̱hĩe.

⁴⁴ Ni ekē̱ame̱ ake̱: Ene̱mei dši *miwiemo̱i ni mike̱nye wie beni mike̱nye yo̱ lolo le̱, ake̱ dša nibii fẽ ní aṅmã ye̱ †Mose mla le̱ ke̱ gbalo̱i le̱ ke̱ lalai le̱ amli ye mihewo̱ le̱ ná ba mli. *9,22; 18,31-33. †K. 27.

⁴⁵ Ke̱ke̱ le̱ egble ame̱dſẽṅmo̱ nā, koni ame̱na ṅmãle̱i le̱ anã.

⁴⁶ Ni ekē̱ame̱ ake̱: Ne̱ke̱ aṅmã, ni ne̱ke̱ esa ake̱ Kristo ana amanehũlũ ni ete ši ke̱-dše̱ gbohĩĩ ateṅ ye̱ gbĩ ni dši gbĩ etẽ le̱ no̱;

⁴⁷ ní ášie̱ tšuitšakemo̱ ke̱ ešaifā ye̱ egbe̱i le̱ ano̱ atšõ mãdši fẽ, ni abõi ke̱-dše̱ Ierusalem.

⁴⁸ Ni nyedši ne̱ke̱ nii ne̱ ahe odasefoi.

⁴⁹ Ni na, *mihã mitše̱ šiwō le̱ aba nyeno̱; nohewo̱ le̱ nyehĩa ši ye̱ Ierusalem mã le̱ṅ ke̱-yaši beyino̱ ni aadše̱ ṅwei awonye hewale̱. *Ioh. 15,26; 15,7. Bo̱f. 1,4.

⁵⁰ Ni eṅõame̱ ke̱-dše kpo ke̱-te Betania mase̱i, ni ehole enidši ano̱ ni edšō̱ame̱.

⁵¹ Ni eba mli ake̱, beni edšō̱o̱ame̱ le̱, edše ame̱ṅõ ni awóle̱ ke̱-te ṅwei.

⁵² Ni ame̱dšále̱, ni ame̱kũ ame̱se̱ ke̱-te Ierusalem ke̱ mīše̱ pī;

⁵³ ni ame̱ye̱ so̱lemo̱we le̱ dāne̱, ni ame̱hĩe Nyoṅmo̱ yidšiemo̱ ke̱ le̱ dsō̱mo̱.