Luka 20 - Ṅmãle̱ Kroṅkroṅ Le̱

¹ Ni eba mli ake̱ nakai gbĩĩ le̱ eko no̱, beni edšadšeo̱ sanekpakpa le̱ etšõo̱ maṅ le̱ ye̱ so̱lemo̱we le̱, oso̱fonukpai le̱ ke̱ woloṅmãlo̱i le̱ ke̱ onukpai le̱ ba eṅõ,

² ni ame̱ke̱le̱ ake̱: Tšõmo̱wo̱ nõ hegbe̱ ní oyo̱ hewo̱ ní ofeo̱ nii no̱, ni namo dši moni hão ne̱ke̱ hegbe̱ ne̱?

³ Ni eto he ekē̱ame̱ ake̱: Mi hũ mibabinye sane kome ní nyeke̱mi:

⁴ Iohane baptisĩmo̱ le̱, ani ṅwei edše̱ lo gbomei adeṅ?

⁵ Ši ame̱hala mli ye̱ ame̱teṅ ake̱: Ke̱dši wo̱kē̱ ake̱ edše̱ ṅwei le̱, eekē̱: Mẽba ni nyeheele̱ nyeyee mo̱?

⁶ Ni asaṅ ke̱dši wo̱kē̱ ake̱ edše̱ gbomei adeṅ le̱, maṅ le̱ fẽ aatſiawo̱ te̱i; edšake̱ ame̱kpa ši ake̱, Iohane le̱, gbalo̱ dšile̱.

⁷ Ni ame̱to he ake̱ ame̱lee heni edše̱.

⁸ Ni Iesu kē̱ame̱ ake̱: Bĕle̱ mi hũ mitšõõnye nõ hegbe̱ ní miyo̱ ní mifeo̱ nii ne̱.

⁹ Ni ebõi maṅ le̱ ne̱ke̱ abe̱ ne̱ bū ekē̱: Nū ko fe weintrom ni eṅõ-hã okwafoi apāyeli, ni ete maṅ ko no̱ ni eyatše̱ āhũ.

¹⁰ Ni beni še̱ be le̱, *etšũ tšũlo̱ ko ke̱-te okwafoi le̱ aṅõ, koni ame̱bãle̱ weintrom le̱ yibii le̱ eko; ši apāfoi le̱ yile̱, nĩ amſiele̱ eflo. 2 Kron. 36,15. 16.

¹¹ Ni esā etšũ tšũlo̱ kroko hũ; ši ame̱yile̱ hũ nĩ ame̱wole̱ hĩegbele, ni ame̱ſiele̱ eflo.

¹² Ni esā etšũ moni dši etẽ; ši le̱ hũ ame̱pilale̱, ni ame̱tšire̱ eyi se̱ ke̱-dše kpo.

¹³ Ni weintrom le̱ tše̱ le̱ kē̱: Té mafe tēṅ? Matšũ mibi ní misumoo̱ le̱; ekole̱ le̱ le̱, ké̱ ame̱nale̱ le̱, ame̱hĩe aaso̱le̱.

¹⁴ Ši beni okwafoi le̱ nale̱ le̱, ame̱kē̱kē̱ ame̱he ake̱: Niyelo̱ le̱ ne̱; nyebaä ní nyehãa wo̱gbeale̱, koni nii le̱ etšṍ wo̱nō.

¹⁵ Ni ame̱tšire̱ eyi se̱ ke̱-dše weintrom le̱ mli ni ame̱yagbele̱. Nohewo̱ le̱, meni weintrom le̱ tše̱ le̱ aafeame̱?

¹⁶ Eebakpãtã ne̱ke̱ okwafoi ne̱ ahĩe, ni eeṅõ weintrom le̱ ehã meikrokomei. Ši beni amenu le̱, ame̱kē̱: Kpaō!

¹⁷ Ši ekwe̱ame̱ ke̱-kpe ni ekē̱: Meni dši noni *aṅmã ne̱ mo̱, ake̱: “Te̱ le̱ ni tšũtſalo̱i le̱ šé̱-fõ le̱, no noṅṅ étšṍ koṅte̱” le̱? *Lal. 118,22.

¹⁸ Mofẽmo ní aagbē te̱ ne̱ no̱ le̱, emli aatšere̱; ši mo no̱ ní eegbē le̱, eegble̱le̱ mõnyõmõnyõ.

¹⁹ Ni oso̱fonukpai le̱ ke̱ woloṅmãlo̱i le̱ mītaole̱ amõ ye̱ nakai ṅmle̱tſā le̱ no̱ noṅṅ, ši *ame̱yaše maṅ le̱ gbeyei; edšake̱ ame̱yo ake̱ ame̱hewo̱ ebu ne̱ke̱ abe̱ ne̱. *19,42.

²⁰ Ni ame̱wowōle̱ kái, ni ame̱tšũ sralo̱i, mei ní fe ame̱he tamo̱ dšalo̱i, koni ame̱-õ enā enyo̱ṅ, beni afe ni ame̱ṅõle̱ ame̱wo amralo le̱ hewale̱ ke̱ hegbe̱ le̱ deṅ. 11,54.

²¹ Ni ame̱bile̱ ake̱: Tšõlo̱, wo̱le ake̱ owieo̱ ni otšõo̱ nii dšale̱ nā, ni asaṅ okwe̱e̱ gbomei ahĩeaṅ, ši moṅ ano̱kwale mli otšõo̱ Nyoṅmo̱ gbe̱ le̱ ye̱:

²² Ani edša ake̱ wo̱yeo̱ ntō wo̱hãa Kaisare, alo edšaa?

²³ Ši beni ekpá ame̱ṅā le̱ ši le̱, ekē̱-ame̱ ake̱: Mẽhewo̱ nyetšõo̱mi?

²⁴ Nyeke̱ denario abaä ni makwe̱a! Namo mfoniri ke̱ ṅmãle̱ yo̱ no̱ ne̱? Ni ame̱to he ame̱kē̱: Kaisare nõṅ.

²⁵ Ni ekē̱ame̱ ake̱: Bĕle̱ nyeṅõa Kaisare nii nyehãa Kaisare; ši Nyoṅmo̱ nii le̱ nyeṅõ-hãa Nyoṅmo̱!

²⁶ Ni ame̱nyẽẽ enā enyo̱ṅ ko ame̱mõ ye̱ maṅ le̱ hĩe, ni ehetō le̱ feame̱ nākpe̱, ni ame̱bú ame̱nā.

²⁷ Ni Sadukifoi le̱ hũ ní tšòo̱ ake̱ gbohĩĩašitē ko be̱ le̱ ateṅ meikomei ba eṅõ, ni ame̱babile̱

²⁸ ake̱: Tšõlo̱, *Mose ṅmã hãwo̱ ake̱: Ke̱dši moko nyemi ní yo̱ ṅã gbo ní ešĩĩ bii le̱, enyemi aṅõ eṅã le̱, koni ewo ſĩei ehã enyemi le̱. *5 Mose 25,5. 6.

²⁹ Agbe̱ne̱ nyemimei kpawo hĩ ši, ni ame̱teṅ onukpa le̱ w̌e̱ yō, ni egbo ni esĩĩ bii.

³⁰ Ni ese̱ho le̱ ṅõle̱, ni le̱ hũ egbo ni ešĩĩ bii.

³¹ Ni moni dši etẽ le̱ hũ ṅõle̱, ni nakai mei kpawo le̱ fẽ fe; ni ame̱šĩĩ bii ni ame̱gboi.

³² Ni ame̱fẽ ame̱se̱ le̱ yō le̱ hũ bagbo.

³³ Bĕle̱, gbohĩĩašitē le̱ mli le̱, ame̱teṅ namo ṅã eetšṍ? edšake̱ mei kpawo le̱ fẽ w̌e̱le̱.

³⁴ Ni Iesu to he ekē̱ame̱ ake̱: Dše ne̱ṅ bii w̌e̱w̌e̱o̱ yei, ni ake̱ yei hãa gblã;

³⁵ ši mei ní aasa dšeṅ ní baä le̱ ke̱ gbohĩĩašitē le̱ námo̱ le̱, ame̱w̌e̱e̱ yei, asaṅ ake̱ yei hãã gblã;

³⁶ ni asaṅ ame̱nyẽṅ ame̱gboi doṅṅ; edšake̱ ame̱tamo̱ ṅweibo̱foi ni *Nyoṅmo̱ bii dšiame̱, ake̱-ní šitē bii dšiame hewo le̱. 1 Ioh. 3,1. 2.

³⁷ Ši ake̱ gbohĩĩ bate ši ekoṅ le̱, *Mose dientše̱ tšṍ ye̱ kow̌ei le̱ sane le̱ mli, beni etšé̱ Nuṅtšo̱ le̱ ake̱ Abraham Nyoṅmo̱ ke̱ Isak Nyoṅmo̱ ke̱ Iakob Nyoṅmo̱ le̱; *2 Mose 8,2. 6.

³⁸ ši Nyoṅmo̱ le̱, edšee gbohĩĩ a-Nyoṅmo̱, ši moṅ hĩekãlo̱i a-Nyoṅmo̱ṅ; edšake̱ ehĩe le̱ mei fē hĩe kãmo̱.

³⁹ Ši woloṅmãlo̱i le̱ ateṅ meikomei here ne̱ ame̱kē̱: Tšõlo̱, owie dšogbāṅ!

⁴⁰ Ni ame̱kaale̱ sane ko bimo̱ doṅṅ.

⁴¹ Ni ekē̱ame̱ ake̱: Té tẽṅ ní akē̱o̱ ake̱ Kristo le̱, David biṅ le̱?

⁴² Tše̱bele̱ David dientše̱ kē̱ ye̱ *lalai awolo le̱ mli ake̱: “Nuṅtšo̱ le̱ kē̱ mi-Nuntšo le̱ ake̱: Tá mininedšŭrõ no̱ *Lal. 110,1.

⁴³ ke̱-yaši beyino̱ ni maṅõ ohenye̱lo̱i mafe onãdšiaši māṅō.”

⁴⁴ Ke̱ David tšé̱le̱ Nuṅtšo̱ le̱, bĕle̱ té fe tēṅ mo̱ ní edši ebiṅ?

⁴⁵ Ši maṅ le̱ fẽ toiaṅ ekē̱ ekaselo̱i le̱ ake̱:

⁴⁶ Nyehĩe ahĩa nyehe no̱ ye̱ woloṅmãlo̱i le̱ ahewo̱, ši ame̱sumoo̱ atadei wuyawuyai amli nyiemo̱, ni ame̱sumoo̱ dšā no̱ ṅãmo̱i ke̱ onukpai ašitrámo̱hei ye̱ kpēhei le̱ ke̱ okplõ yitšotámo̱ ye̱ niyenii aši; 11,43.

⁴⁷ mei ní mĩo̱ yei okũlafoi ašĩai, ní lakpatō hewo̱ ní ame̱so̱leo̱ so̱lemo̱i kakadãdši le̱; mene̱mei afo̱bū le̱ aafē nine.