Luka 11 - Ṅmãle̱ Kroṅkroṅ Le̱

¹ Ni eba mli ake̱ ēso̱le ye̱ heko; ni beni efõ le̱, ekaselo̱i le̱ ateṅ mokome kē̱le̱ ake̱: Nuṅtšo̱, tšõmo̱wo̱ so̱lemo̱, tamo̱ bo̱ni Iohane hũ tšõ ekaselo̱i le̱.

² Ni ekē̱ame̱ ake̱: Ke̱ nyemīso̱le le̱, nyekē̱a ake̱: Wo̱tše̱ ní yo̱ ṅwei, ogbe̱i le̱ afe kroṅkroṅ; omaṅtše̱yeli le̱ aba; áfe noni osumoo̱ ye̱ šikpoṅ le̱ no̱ hũ, take̱ bo̱ni afeo̱ ye̱ ṅwei le̱;

³ hãwo̱ dāne̱ wo̱dã-ṅmā̃,

⁴ ni oke̱ wohe ešai afawo̱, edšake̱ wo̱ hũ wo̱ke̱-faã mofẽmo ni tōo̱ wo̱no̱; ni oke̱wo̱ akaya kā mli; ši moṅ dsiemo̱wo̱ ye̱ mofõṅ le̱ deṅ.

⁵ Ni ekē̱ame̱ ake̱: Nyeteṅ namo ni yo̱ sientše̱ ni eete eṅõ nyōṅ teṅ, ni eyakē̱le̱ ake̱: Sientše̱, fami aboloi etẽ,

⁶ edšake̱ mišientše̱ ko ēdše̱ gbe̱ éba-tomi, ni mibe̱ noko ní mike̱-bamã ehĩe;

⁷ ni moni yo̱ tšũṅ le̱ aahere no̱ ake̱: Kāgba mina; áṅã́ šĩnā le̱ momo ni mi ke̱ mibii dſere sā no̱, minyẽṅ ši mate ní mahão.

⁸ Mīkē̱nye ake̱, ke̱ ka ešientše̱ ní dšile̱ le̱ hewo̱ṅ kũle̱ eteṅ ši ní ehãle̱, ši *enāgbamo̱ le̱ hewo̱ le̱ eete ši kẽ ni eehãle̱ bo̱fẽbo̱ ní etaoo. *18,5.

⁹ Ni mi hũ mīkē̱nye ake̱: Nyebia, ni aahãnye; nyetaoa, ni nyeanu; nyešia, ni aagblenye.

¹⁰ Edšake̱ mofẽmo ní bio̱ le̱, enine še̱o̱ no̱; ni moni taoo̱ le̱, enaä; ni moni šio̱ le̱, aagblele̱.

¹¹ Ši nẽ tše̱ yo̱ nyeteṅ ni ke̱dši ebi bile̱ abolo, ni eehãle̱ te̱? alo ke̱dši ebile̱ lõ le̱, ni eeṅõ onũfũ efe lō ehãle̱?

¹² Alo ke̱dši ebi wuo̱wŏ̱lo̱ le̱, ni eehãle̱ nyoṅmo̱ṅkrakro?

¹³ Bĕle̱ ke̱dši nye ní nyedši meifõdši le̱ nyele bo̱ni nyefeo̱ ní nyeke̱ nikēnĩi kpakpai keo̱ nyebii le̱, enyie noṅṅ nyetše̱ ní yo̱ ṅwei le̱ eṅõṅ Mumo̱ kroṅkroṅ ehãṅ mei ní bio̱le̱ le̱?

¹⁴ Ni ētã daimonio ko ní dši mumui; ni eba mli ake̱, beni daimonio le̱ dše kpo le̱, mumui le̱ wie, ni mei le̱ anā kpe̱ ame̱he.

¹⁵ Ši ame̱teṅ meikomei kē̱: Beelzebul, daimonioi alumo̱ le̱, hewale̱ nā efãa daimonioi le̱.

¹⁶ Ni meikomei hũ kale̱ ame̱mītao ṅwei okadi ko ye̱ edeṅ. Mar. 8,11.

¹⁷ Ši le̱ le̱, ake̱-ní ele ame̱dſẽṅmo̱i le̱, ekē̱ame̱ ake̱: Maṅ-fẽ-maṅ ní gbaa woo̱ le̱dientše̱ ehe le̱, edſaä; ni tšũ kũmoo̱ ſieo̱ tšũ no̱.

¹⁸ Ni ke̱dši satan hũ gbáa woo̱ le̱dientše̱ ehe le̱, té aafe tēṅ ní emaṅtše̱yeli le̱ aadamo̱ šiṅ? edšake̱ nyekē̱ ake̱ Beelzebul hewale̱ nā mifãa daimonioi le̱.

¹⁹ Ši ke̱dši mi le̱, Beelzebul hewale̱ mike̱-fãa daimonioi le̱, namo nyebii le̱ ke̱-fãaame̱? nohewo̱ le̱ ame̱ noṅṅ ame̱akodšonye.

²⁰ Ši ke̱dši *Nyoṅmo̱ wao mike̱-fãa daimonioi le̱, no le̱ Nyoṅmo̱ maṅtše̱yeli le̱ éše̱ nyeṅõ. *2 Mose 8,19.

²¹ Ké̱ hewale̱ hĩe dade mli ēbu emō̃ he le̱, enibii ye̱ ſeſēſe;

²² *ši ké̱ moni he wa fèle̱ batuale̱ ní eye eno̱ kũnim le̱, ešõo̱ etawūnii ní eṅõo̱ ehĩe efõo̱ no̱ le̱ fẽ ye̱ edeṅ, ni edšaä enomṅõnii le̱ amli. *Kol. 2,15.

²³ Moni be̱ migbe̱fãṅ le̱ eke̱mi ená, ni moni ke̱mi buaa nā le̱ mīgbe̱ mīſã́. 9,50.

²⁴ Ké̱ mumo̱ fõṅ le̱ dše gbomo mli le̱, eyanyieo̱ hei ní nu be̱ etaoo bedšō̱mo̱, ni ké̱ enáá eko le̱, ekē̱o ake̱: Makũ mise̱ mate miwe heni midše̱ le̱.

²⁵ Ni ké̱ eba le̱, ebanaä ake̱ ábē̱ mli ni áwula mli.

²⁶ Ke̱ke̱ le̱ eyaä ni eyaṅõo̱ mumo̱i krokomei kpawo ní dši mumo̱i fõdši fèle̱ efataä ehe, ni ame̱yaboteo̱ emli, ni ame̱hĩo̱ dše̱i, ni nakai gbomo le̱ *se̱kpẽ šihĩle̱ le̱ tšṍo̱ efṍṅ fè tšutšu nõ le̱, *Ioh. 5,14.

²⁷ Ni eba mli ake̱, beni ewieo̱ nii ne̱ le̱, yō ko ní yo̱ asafo le̱ mli le̱ wó egbē no̱ ni ekē̱le̱ ake̱: *Adšō̱ mũsũ ní hĩeo ke̱ fufo̱ ní oye le̱! *1,28. 48.

²⁸ Ši ehere no̱ ake̱: Eye̱ mli moṅ, ši adšō̱ mei ní nuo̱ Nyoṅmo̱ wiemo̱ le̱ ni ame̱yeo̱ no̱ le̱! 8,15. 21.

²⁹ Ši beni asafoi le̱ ebabua ame̱he nā pī le̱, ebõi kē̱mo̱ ake̱: Yino̱bii ne̱ yino̱bii fõdši ni, ame̱mītao okadi, ni ahãṅame̱ okadi ko, ake̱ dša gbalo̱ Iona okadi le̱.

³⁰ Edšake̱ bo̱ni Iona tšṍ okadi hã Ninivebii le̱, nakai noṅṅ kẽ gbomobi le̱ aatšṍ ahã ne̱ke̱ yino̱bii ne̱.

³¹ Wuoyigbe̱ maṅnye le̱ ke̱ yino̱bii ne̱ aate ši ye̱ kodšomo̱ le̱ mli, ni eebuame̱ fo̱, edšake̱ edše̱ šikpoṅ le̱ nāgbēhe ebabo Salomo nilē toi; ni na, moni fè Salomo ye̱ bie̱! 1 Maṅ. 10,1.

³² Ninivebii le̱ ke̱ ne̱ke̱ yino̱bii ne̱ aate ši ye̱ kodšomo̱ le̱ mli ni ame̱abuame̱ fo̱, edšake̱ ame̱tšake ame̱tšui ye̱ Iona šie̱mo̱ le̱ nā; ni na, moni fè Iona ye̱ bie̱. Iona 3,5.

³³ Moko esuu kane emãã kpokplobiiaṅ alo tšese šiši, ši moṅ kanetšo no̱ eke̱-mãa, koni mei ní baä mli le̱ ana ekpe̱mo̱ le̱. 8,16. Mat. 5,15.

³⁴ Gbomotšo le̱ kane dši ohĩṅme̱i le̱. Ke̱dši ohĩṅme̱i no̱ tše le̱, ogbomotšo mū le̱ hũ mli tšeo̱; ši ke̱dši ohĩṅme̱i ehĩĩ le̱, ogbomotšo le̱ hũ woo̱ duṅ.

³⁵ Nohewo̱ le̱ kwe̱ ní ahĩ, koni la ní yo̱ omli le̱ akatšṍ duṅ.

³⁶ Nohewo̱ le̱ ke̱dši ogbomotšo mū le̱ mli tše ni hekoheko woko duṅ le̱, tše noṅṅ emū le̱ fẽ mli aatše take̱ bo̱ni kane ke̱ ekpe̱mo̱ tšoo̱ hãao le̱.

³⁷ Ni beni ewieo̱ le̱, Farisifonyo ko bakpēle̱ ake̱ éba ni eke̱le̱ abaye nii; ni ete šĩa le, ni eyatá niyenii le̱ ahe. 7.36; 14,1.

³⁸ Ši beni Farisifonyo le̱ na ake̱ efo̱flo̱ko ehe dāni ebaye nii le̱, eble fele̱ yā. Mat. 15,2.

³⁹ Ni Nuṅtšo̱ le̱ kē̱le̱ ake̱: Nme̱ne̱ ṅme̱ne̱ nye Farisifoi le̱ nyetšumoo̱ kpulu he ke̱ kã se̱, ši nyemli éyi obõ ke̱ dšū ke̱ fō.

⁴⁰ Kwašiai! ani moni fe se̱ le̱, dšee le̱ noṅṅ efe mli le̱ hũ?

⁴¹ Moṅ le̱, nyeṅõa nibii ní yo̱ mli le̱ nyefea edšŭrõ, ni na, nibii fẽ he aatše ahãnye.

⁴² Ši kpóo hã nye, Farisifoi, ake̱ nyehãa kowe̱ ke̱ ſie ke̱ bāi sro̱toi fẽ mlidšā nyoṅmanyoṅma, ní nyešĩo̱ dšale̱saneyeli ke̱ Nyoṅmo̱ suomo̱ le̱! Kũle̱ edša ake̱ nyefeo̱ ene̱mei, ni nyekašĩ eko le̱ hũ.

⁴³ Kpóo hã nye, Farisifoi, ake̱ nyesumoo̱ onukpai-asitrámo̱hei ye̱ kpēhei le̱ ke̱ ṅãmo̱i ye̱ dšadši ano̱! 20,46.

⁴⁴ Kpóo hã nye, woloṅmãlo̱i ke̱ Farisifoi, osatofoi, ake̱ nyetamo̱ gbohĩĩafũhei ní edšee ši, ni mei ní nyieo̱ no̱ le̱ lee!

⁴⁵ Ni mlatšõlo̱i le̱ ateṅ mokome here no̱ ni ekē̱le̱ ake̱: Tšõlo̱, nii ní okē̱o̱ ne̱ oke̱mībo̱ wo̱ hũ ahora.

⁴⁶ Ši ekē̱: Nye mlatšõlo̱i le̱ hũ, kpóo hã nye! ake̱ nyeke̱ dšatšui ní tēremo̱ dšraä tĕreo̱ mei, ni nyedientše̱ le̱, nyeke̱ nyewao kome etaa dšatšui le̱ ahe.

⁴⁷ Kpóo hã nye! ake̱ nyemãmoo̱ gbaloi le̱ afũhei le̱; ši nyetše̱mei gbeame̱;

⁴⁸ bĕle̱ nyemīye nyetše̱mei le̱ anitšumo̱i le̱ ahe odase ni eṅõ nyenā; edšake̱ ame̱ ame̱gbeame̱ moṅ, ši nye nyemāmoo̱ ame̱fũhei le̱.

⁴⁹ Ene̱hewo̱ noṅṅ ni Nyoṅmo̱ nilē le̱ kē̱: Mibatšũ gbaloi ke̱ bo̱foi ke̱-ya ame̱ṅõ, ni ame̱agbe ame̱teṅ meikomei ni ame̱awa ame̱teṅ meikomei ayi,

⁵⁰ koni gbalo̱i le̱ fẽ alá ní afo̱se aſie ši ke̱-dše̱ dseṅšišitō mli le̱ abi ši ye̱ yino̱bii ne̱ adeṅ;

⁵¹ ke̱-dše̱ Habel lá le̱ no̱ ke̱-yaši Zakaria, moni agbele̱ ye̱ afo̱lešãlate̱ le̱ ke̱ so̱lemo̱tšũ le̱ te le̱ṅ le̱ lá le̱ no̱. Hē̃, mīkē̱nye ake, aabi ši ye̱ ne̱ke̱ yino̱bii ne̱ adeṅ!

⁵² Kpóo hã nye, mlatšõlo̱i, edšake̱ nyeko̱ nilē le̱ nā samfe! Nyedíentše̱ le̱ nyebotee mli, ni mei ní taoo̱ mli abote le̱ hũ, nyetšĩo̱ame̱ gbe̱.

⁵³ Ni beni edše dše̱i ete le̱, woloṅmãlo̱i le̱ ke̱ Farisifoi le̱ dšie ame̱hĩe ame̱kale̱ ni ame̱bõi enā sãdši ble̱mo̱ babaō,

⁵⁴ ni ame̱wole̱ ká, ni ame̱mītao enā enyo̱ṅ ame̱mõ, koni ame̱yaflo̱ enā. 20,20.