Kojolɔi 1 - Ṅmãle̱ Kroṅkroṅ Le̱

¹ Ni eba mli ake Iošua gbẽle se̱ le̱, Israelbii le̱ bi Iehowa ake̱: Namo *tšutšu afã ye̱ wo̱teṅ ní eke̱ Kanaanbii le̱ ayawu? *20,18.

² Ni Iehowa kē̱: Iuda afã; na, miṅõ šikpoṅ le̱ miwo edeṅ!

³ Ni Iuda kē̱ enyemi Simeon ake̱: Oke̱mi afã ke̱-ya migbe̱fãṅnõ le̱ no̱, ní wo̱ke̱ Kanaanbii le̱ ayawu, ni mi hũ mike̱o aate onõ le̱ no̱! Ni Simeon ke̱-le̱ te.

⁴ Ni Iuda fã ke̱-te, ni Iehowa ṅõ Kanaanbii le̱ ke̱ Perizbii le̱ ewo ame̱deṅ, ni ame̱gbe mei akpei-nyoṅma ye̱ Bezek.

⁵ Ni ame̱yanina Adoni-Bezek ye̱ Bezek, ni ame̱ke̱le̱ wu, ni ame̱gbegbē Kanaanbii ke̱ Perizbii le̱.

⁶ Ni Adoni-Bezek dšo foi, ni ame̱tiule̱, ni ame̱yamõle̱, ni ame̱flo̱ enine ke̱ enane goṅtii.

⁷ Ke̱ke̱ ni Adoni-Bezek kē̱: Maṅtše̱mei nyoṅmai-kpawo ní aflo̱flō̱ ame̱nine ke̱ ame̱nane goṅtii kŏ̱lo̱ nii ye̱ mikplõ le̱ šiši; bo̱ni mife le̱, nakai pe̱ Nyoṅme̱ etomi nãdšiaṅ ne̱! Ni ame̱ke̱le̱ ba Ierusalem ni ebagbo ye̱ dše̱i.

⁸ Ni Iudabii le̱ ke̱ Ierusalem bawu, ni ame̱ṅõle̱, ni ame̱ke̱ klante gbegbē emli bii le̱, ni ame̱mã maṅ le̱ nā la.

⁹ No se̱ le̱ Iudabii le̱ fã ni ame̱ke̱ Kanaanbii ní yo̱ gõdši le̱ ano̱ le̱ ke̱ wuoyigbe̱ le̱ ke̱ ṅãno̱ šikpoṅ le̱ no̱ le̱ yawu Ios. 10,40; 11,22.

¹⁰ Ni Iuda fã ke̱-yanina Kanaanbii ní yo̱ Hebron le̱; ši sá le̱ Hebron gbe̱i dši Kiriat-Arba; ni ame̱gbe Šešai ke̱ Ahiman ke̱ Talmai.

¹¹ Ni edše̱ dše̱i le̱ efã ke̱-yanina Debirbii le̱; ši sá le̱ Debir gbe̱i dši Kiriat-Sefer.

¹² Ni Kaleb kē̱: Moni aatſia Kiriat-Sefer nii ni eeṅõ dše̱i le̱, maṅõ mibiyō Aksa mahãle̱ gblã.

¹³ Ke̱ke̱ ni Otniel, Kaleb nyemi gbekẽ Kenaz bi le̱, yaṅõ dše̱i; ni eṅõ ebiyō Aksa le̱ ehãle̱ gblã.

¹⁴ Ni eba mli ake̱, beni ete ewù le̱ ṅõ le̱, ewo eyĩṅ ake̱ ebi etše̱ šikpoṅ ko. Ni edše̱ tedši le̱ no̱ eyi ši; ni Kaleb kē̱le̱ ake̱: Meni feo̱o?

¹⁵ Ni ekē̱le̱ ake̱: Hãmi gbe̱wōnii; edšake̱ ohãmi šikpoṅ ye̱ wuoyigbe̱, agbene̱ hãmi nubui hũ! Ni Kaleb hãle̱ nubui ní yo̱ goṅ no̱ ke̱ nubui ní yo̱ dšō̱ mli.

¹⁶ Ni Mose šānū *Kennyo le̱ bii le̱ ke̱ Iudabii le̱ dše̱ tẽṅi amã le̱ṅ ba Iuda ṅã le̱ ni yo̱ †Arad wuoyigbe̱ le̱ no̱, ni ame̱yiṅ ame̱te ame̱ke̱ dše̱i bii le̱ yahĩ ši. *5,11. 17. 4 Mose 10,29. †Ios. 12,14.

¹⁷ Ni Iuda ke̱ enyemi Simeon fã ke̱-te, ni ame̱yagbe Kanaanbii ní yo̱ Zefat le̱, ni ame̱feame̱ *musu; ni ame̱wo maṅ le̱ gbe̱i ake̱ Horma. *4 Mose 21,2.

¹⁸ Asaṅ Iuda yaṅõ Gaza ke̱ ehe šikpõdši le̱, ke̱ Aškelon ke̱ ebe šikpõdši le̱, ke̱ Ekron ke̱ ehe šikpõdši le̱.

¹⁹ Ni Iehowa fĩ Iuda se̱ ni eſie gõdši ano̱ bii le̱; ši enyẽẽ eſie dšō̱ le̱ṅ bii le̱, edšake̱ ame̱ye̱ dade ſīlii.

²⁰ Ni *ame̱ṅõ Hebron ame̱hã Kaleb, take̱ bo̱ni Mose kē̱ le̱, ni eſie Anak bihĩĩ etẽ le̱ ke̱-dše dše̱i. *Ios. 14,6-15.

²¹ Ši Iebusbii ní yo̱ Ierusalem le̱, Benyaminbii le̱ eſieeame̱; ni Iebusbii le̱ ke̱ Benyaminbii le̱ hĩ Ierusalem ke̱-baši ṅme̱ne̱. Ios. 15,53; 18,28.

²² Ni Iosefbii le̱, ame̱ hũ ame̱fã ame̱yanina Betel, ni Iehowa fata ame̱he.

²³ Ni Iosefbii le̱ tšũ ayasra Betel. Ši *sá le̱ maṅ le̱ gbe̱i dši Luz. *1 Mose 28,19.

²⁴ Ni sralo̱i le̱ na nū ko ní dše̱ mã le̱ṅ, ni ame̱kē̱le̱ ake̱: Tšõmo̱wo̱ heni wo̱o̱tšṍ wo̱bote mã le̱ṅ, ni wo̱o̱feo edšũrõ!

²⁵ Ni etšṍame̱ gbe̱, ni ame̱ke̱ klante gba mã le̱ṅ bii le̱, ši *ame̱ṅmē̃ nū le̱ ke̱ eweku le̱ fõ he. *Ios. 6,25.

²⁶ Ni nū le̱ yiṅ ete Hitbii ašikpoṅ le̱ no̱, ni eyato maṅ, ni etšé̱ egbe̱i ake̱ Luz; no dši egbe̱i ke̱-baši ṅme̱ne̱.

²⁷ Ni Manase eſiee Bet-Šean ke̱ ehe mãdši le̱ amli bii le̱, ke̱ Taanak ke̱ ebe mãdši le̱ amli bii le̱, ke̱ Dor ke̱ ebe mãdši le̱ amli bii le̱, ke̱ Ibleam ke̱ ehe mãdši le̱ amli bii le̱, ke̱ Megido ke̱ ehe mãdši le̱ amli bii le̱; bo̱ni fe ni Kanaanbii le̱ ka nakai šikpoṅ le̱ no̱ ne̱. Ios. 17,11-13.

²⁸ Ši eba mli ake̱, beni Israelbii le̱ ahe bawa le̱, ame̱hã Kanaanbii le̱ súmo̱-ame̱; ši ſiemo̱ ni ame̱ſieeame̱.

²⁹ Ni Efraim eſiee Kanaanbii ní yo̱ Gezer le̱; ni Kanaanbii le̱ hĩ ame̱teṅ ye̱ Gezer. Ios. 13,10.

³⁰ Zebulon eſiee Kitronbii le̱ ke̱ *Nahalolbii le̱; ni Kanaanbii le̱ hĩ ame̱teṅ, ni ame̱súmo̱ame̱. *Ios. 19,16.

³¹ Ašer eſiee Akobii le̱ ke̱ Zidonbii le̱ ke̱ Ahĕlab ke̱ Akzib ke̱ Helba ke̱ Afik ke̱ Rehob bii le̱;

³² ši Ašerbii le̱ bahĩ Kanaanbii ni yo̱ šikpoṅ le̱ no̱ le̱ ateṅ; edšake̱ ame̱ſieeame̱.

³³ Naftali eſiee Bet-Šemešbii le̱ ke̱ Bet-Anatbii le̱, ši ebahĩ Kanaanbii ni yo̱ šikpoṅ le̱ no̱ le̱ ateṅ, *ni Bet-Šemešbii le̱ ke̱ Bet-Anatbii le̱ súmo̱ame̱. *Ios. 19,38.

³⁴ Ni Amorbii le̱ tši Danbii le̱ ke̱-te gõdši le̱ ano̱, ni ame̱bãã ame̱kpleke ši ke̱-ba dšō̱ le̱ṅ.

³⁵ Ni Amorbii le̱ ná hegbe̱ hĩ Heres goṅ le̱ no̱, ye̱ *Ayalon ke̱ Šaalbim; ši beni Iosef we le̱ nine bó ame̱no̱ le̱, ame̱-súmo̱ame̱. *Ios. 19,42.

³⁶ Ni Amorbii le̱ ahũsũ le̱ dše̱ Akrabim ṅmeṅme le̱ he ke̱-dše̱ Sela ke̱-te yiteṅgbe̱.