Ester 8 - Ṅmãle̱ Kroṅkroṅ Le̱

¹ Nakai gbĩ le̱ no̱ noṅṅ le̱ maṅtše̱ Ahašweroš ṅõ Haman, Iudafoi ahenye̱lo̱ le̱, šĩa le̱ ehã maṅnye Ester. Ni Mordekai ba maṅtše̱ le̱ hĩe; edšake̱ Ester etšõle̱ enoni dšile̱.

² Ni maṅtše̱ le̱ dšie *ewolonāso̱omo̱ga le̱ ní ebe ye̱ Haman dẽ le̱, ni eṅõ-hã Mordekai. Ni Ester ṅõ Mordekai eto Haman we le̱ no̱. *3,10.

³ Ni Ester sā wie ekoṅ ye̱ maṅtše̱ le̱ hĩe, ni eho ekũla enãdší anā, ni eke̱ yāfó kpale̱ fai ni edšie Haman, Agagnyo le̱, nõfõṅ le̱ ke̱ eyiṅ ní eto ye̱ Iudafoĩ ahe le̱.

⁴ Ni maṅtše̱ le̱ *wó šika maṅtše̱tšo le̱ no̱ etšõ Ester. Ke̱ke̱ ni Ester te ši edamo̱ maṅtše̱ le̱ hĩe, *5,2.

⁵ ni ekē̱: Ke̱dši esa maṅtše̱ hĩe, ni ke̱dši mihĩe eba nyam ye̱ maṅtše̱ hĩe, ni sane le̱ dša ye̱ maṅtše̱ hĩe, ni mi hũ misa ehĩe le̱, hã ní aṅmã wolo ní ake̱yakpale wodši ní Haman, Hamedata bi le̱ ni dši Agagnyo le̱, tšō ṅā eṅmã ni eke̱-kpãtã Iudafoi ni yo̱ maṅtše̱ šikpõdši le̱ fẽ no̱ le̱ ahĩe le̱.

⁶ Edšake̱ té mafe tẽṅ ni manyẽ makwe̱ efõṅ ní aaba mimaṅbii ano̱ le̱ hũ? ni té mafe tẽṅ ni manyẽ makwe̱ midšakubii le̱ ahĩekpãtãmo̱ le̱ hũ?

⁷ Ke̱ke̱ ni maṅtše̱ Ahašweroš kē̱ maṅnye Ester ke̱ Mordekai, Iudanyo le̱, ake̱: Na, Haman we le̱ miṅõ-hã Ester, ni le̱dientše̱ le̱ ase̱ṅle̱ ye̱ tšo no̱, edšake̱ ekpã enine mli ye̱ Iudafoi le̱ ano̱.

⁸ Nyedientše̱ nyeṅmãa ye̱ Iudafoi le̱ ahewo̱, bo̱ni nyesumoo̱, ye̱ maṅtše̱ gbe̱i ano̱, ni nyeke̱ maṅtše̱ wolonāso̱omo̱ga le̱ aso̱o nā; edšake̱ wolo ni aṅmã ye̱ maṅtše̱ gbe̱i ano̱, ní ake̱ maṅtše̱ le̱ wolonāso̱omo̱ga le̱ eso̱o nā le̱, anyẽṅ akpale.

⁹ Ke̱ke̱ ni atšē̱ maṅtše̱ le̱ woloṅmãlo̱i le̱ ke̱-ba ye̱ nakai be le̱ mli, ye̱ nyõṅ ni dši etẽ ni dši Siwan nyõṅ le̱ no̱ gbĩ ni dši gbĩ nyoṅmai-enyo̱ ke̱ etẽ le̱ no̱; ni aṅmã bo̱ni Mordekai fã́ le̱ pe̱pē̱pe̱ ayahã Iudafoi le̱ ke̱ amraloi le̱ ke̱ lume̱i le̱ ke̱ šikpõdši le̱ ano̱ onukpai le̱ ke̱-dše̱ India āhũ ke̱-yaši Kuš, ní feo̱ šikpõdši oha ke̱ nyoṅmai-enyo̱ ke̱ kpawo le̱, *šikpoṅ-fẽ-šikpoṅ le̱ ke̱ le̱dientše̱ eniṅmā̃, ní maṅ-fẽ-maṅ le̱ ye̱ le̱dientše̱ ewiemo̱ mli, ke̱ Iudafoi le̱ hũ ye̱ ame̱niṅmā̃ ke̱ ame̱wiemo̱ mli. *1,22.

¹⁰ Ni eṅmã ye̱ maṅtše̱ Ahašweroš gbe̱i ano̱, ni eke̱ maṅtše̱ le̱ wolonāso̱omo̱ga le̱ so̱o nā, ni eke̱ wodši le̱ tšũtšũ bo̱foi ní he yo̱ oyá ni trá okpo̱ṅo̱ĩ ke̱ tedšiokpo̱ṅo̱i ní he yo̱ oyá ni dši okpo̱ṅo̱yei abii ano̱,

¹¹ ni maṅtše̱ le̱ hã Iudafoi ní yo̱ maṅ-fẽ-maṅ no̱ le̱ hegbe̱ ake̱ ame̱bua amehe nā ke̱-kpe, ni ame̱damo̱ ši ame̱fã ame̱wala he, ame̱kpãtã ame̱hĩe ní ame̱gbe-ame̱ ni ame̱plenẽame̱, ni maṅ-fẽ-maṅ lo šikpoṅ-fẽ-šikpoṅ ní ke̱ hewale̱ aabatua-ame̱ le̱, ke̱ gbekẽbii ke̱ yei fẽ, ni ame̱-ha ame̱nii,

¹² ye̱ gbĩ kome no̱ ye̱ maṅtše̱ Ahašweroš šikpõdši le̱ fẽ no̱, ye̱ nyõṅ ni dši nyoṅma ke̱ enyo̱ ni dši Adar nyõṅ le̱ no̱ gbĩ ni dši gbĩ nyoṅma ke̱ etẽ le̱ no̱.

¹³ Wolo le̱ mli sane ne̱ akē̱ šikpoṅ-fẽ-šikpoṅ no̱ le̱ ašie̱ akpo ne̱, koni mãdšimãdši le̱ fẽ ale, ní Iudafoi le̱ osā ame̱he ato nakai gbĩ le̱, ni ame̱to̱ ame̱he owele ye̱ ame̱henye̱lo̱i le̱ ano̱.

¹⁴ Ni amrõ pe̱ ní awo mla le̱ ye̱ Šušan mō̃ le̱ mli le̱ bo̱foi ni he yo̱ oyá ní trá okpo̱ṅo̱i ke̱ tedšiokpo̱ṅo̱i ni he yo̱ oyá ano̱ le̱ yiṅ, ni ame̱he fe oyá ni ame̱te mrãmrã ye̱ maṅtše̱ le̱ fã́mo̱ le̱ nā.

¹⁵ Ni Mordekai dše maṅtše̱ le̱ hĩe edše kpo, ní ewo maṅtše̱ atade, blū ke̱ eye̱ṅ, ke̱ šika akekre kpeteṅkple, ke̱ klala fe̱fe̱o ke̱ mama tšuru atade yū; ní Šušan maṅ le̱ nyá ni ame̱ná mīše̱.

¹⁶ Iudafoi le̱ ahe tšeame̱, ni ame̱nyã́, ni ame̱mli fliame̱, ni abuame̱.

¹⁷ Ni šikpoṅ-fẽ-šikpoṅ ke̱ maṅ-fẽ-maṅ no̱ ní maṅtše̱ le̱ kitã ke̱ ekpo̱ le̱ še̱ le̱, Iudafoi le̱ náa mīše̱ ni ame̱nyáa ni ame̱ṅmẽo̱ okplõ ni ame̱yeo̱ gbĩdšũrõ. Ni šikpoṅ le̱ no̱ bii le̱ ateṅ mei pi tšṍmo̱ Iudafoi tete; *edšake̱ Iudafoi le̱ ahe ṅmiṅmi emōmo̱ame̱. 2 Mose 15,14-19.