Ester 7 - Ṅmãle̱ Kroṅkroṅ Le̱

¹ Ke̱ke̱ ni maṅtše̱ le̱ ke̱ Haman ba *ní ame̱ke̱ maṅnye Ester banu dā̃. *5,8; 6,14.

² Ni maṅtše̱ le̱ kē̱ Ester ekoṅ gbĩ ní dši gbí enyo̱ le̱ ye̱ wein okplõ le̱ he ake̱: Maṅnye Ester, meni obio̱? ni aahão; ni meni otaoo̱? Aafe ahão āhũ ke̱-yaši maṅtše̱yeli le̱ mlidšā po!

³ Ke̱ke̱ ni maṅnye Ester here no̱ ni ekē̱: Maṅtše̱, ke̱dši mihĩe eba nyam ye̱ ohĩe, ni ke̱dši esa maṅtše̱ hĩe le̱, hã ni aṅõ miwala akemi ye̱ mibimo̱ le̱ nā, ke̱ mimaṅbii le̱ anõ hũ ye̱ mitaomo̱ le̱ nā.

⁴ Edšake̱ ahõwo̱, mi ke̱ mimaṅ le̱, ní akpãtã wo̱hĩe, ní agbewo̱, ní aplenē-wo̱. Ni edši ahõwo̱ afe nyṍdšihĩĩ ke̱ nyṍdšiyei ke̱ke̱ dšiṅṅ, mikē̱ē̱ noko; ši henye̱lo̱ le̱ nyẽṅ maṅtše̱ nii ní bafite le̱ nãdšiaṅ ato!

⁵ Ke̱ke̱ ni maṅtše̱ Ahašweroš here no̱ ni ekē̱ maṅnye Ester ake̱: Namo ni, ni nẽgbe̱ eyo̱, ni enyẽ eto eyiṅ ake̱ eefe ne̱ke̱ noko?

⁶ Ke̱ke̱ ni Ester kē̱: Wo̱he ta ke̱ henye̱lo̱ le̱ dši ne̱ke̱ Haman gbomo fõṅ ne̱! Ke̱ke̱ ni ṅmiṅmi mõ Haman ye̱ maṅtše̱ le̱ ke̱ maṅnye le̱ hĩe.

⁷ Ke̱ke̱ ni maṅtše̱ le̱ te ši ke̱ mlifũ, ni edše wein okplõ le̱ he ete trom ní yo̱ mō̃ le̱ he le̱ mii. Ši Haman te ši damo̱ ši, koni ekpa maṅnye Ester fai ye̱ ewala hewo̱; edšake̱ ena ake̱ maṅtše̱ le̱ emã efõṅ no̱ mĩ́ ye̱ ehewo̱.

⁸ Ke̱ke̱ ni maṅtše̱ le̱ kũ ese̱ ke̱-dše̱ mō̃ le̱ he trom le̱ mli ke̱-ba heni aṅmẽ wein okplõ le̱ ye̱ le̱; ni Haman eho ebu māṅō ní Ester tá no̱ le̱ no̱. Ni maṅtše̱ le̱ kē̱: Aso ebatua maṅnye le̱ ye̱ mihĩe ye̱ šĩa ne̱? Beni wiemo̱ le̱ dše maṅtše̱ le̱ dāṅ pe̱, ke̱ke̱ ní ame̱ha Haman hĩe.

⁹ Ni Harbona, ni dši piafoi ní súmoo̱ ye̱ maṅtše̱ le̱ hĩe le̱ ateṅ mokome le̱, kē̱: Asaṅ na, tšo ní Haman efe ehã Mordekai, moni wie ekpakpa ehã maṅtše̱ le̱, mã Haman we le̱, ni ekwo̱le̱ dši ninetalo̱i nyoṅmai-enumo̱! Ke̱ke̱ ni maṅtše̱ le̱ kē̱: Nyeyase̱ṅale̱ ye̱ no̱!

¹⁰ Ni ame̱yase̱ṅ Haman ye̱ tšo ni esā eto Mordekai le̱ no̱. Ni maṅtše̱ le̱ mli-la le̱ dšo̱.