5 Mose 1 - Ṅmãle̱ Kroṅkroṅ Le̱

¹ Wiemo̱i ní Mose ke̱ Israel fẽ wie ye̱ Iordan se̱ ye̱ ṅã le̱ no̱, ye̱ ṅã kplenē ní kã Suf ṅe̱le̱no̱ ye̱ Paran ke̱ Tofel ke̱ Laban ke̱ Hazerot ke̱ Di-Zahab teṅ le̱ ne̱.

² Ke̱-dše̱ Horeb ke̱-tšṍ Seir goṅ le̱ he gbe̱ le̱ no̱ ke̱-yaši Kadeš-Barnea le̱ edii gbĩĩ nyoṅma ke̱ ekome gbe̱.

³ Ni eba mli ake̱, afi ní dši nyoṅmai-edſe̱ le̱ no̱ nyõṅ ní dši nyoṅma ke̱ ekome le̱ no̱ kleṅkleṅ gbĩ le̱ no̱ le̱, Mose ke̱ Israelbii le̱ wie wiemo̱i fẽ ní Iehowa efã́le̱ ake̱ ekē̱ame̱ le̱;

⁴ beni egbe Amorbii amaṅtše̱ Sihon, moni hĩ Hešbon le̱, ke̱ Bašan maṅtše̱ Og, moni hĩ Aštarot ye̱ Edrei le̱ se̱ le̱, 4 Mose 21,21-35.

⁵ Mose bõi ne̱ke̱ mla ne̱ dšadšemo̱ ye̱ Iordan se̱ ye̱ Moab šikpoṅ le̱ no̱ ni ekē̱:

⁶ Iehowa, wo̱-Nyoṅmo le̱, ke̱wo̱ wie ye̱ Horeb ni ekē̱: *Bo̱ni nyehĩ ne̱ke̱ goṅ ne̱ he le̱ efá; *4 Mose 10,11. 12.

⁷ nyetšṍa nyehe ní nyefãa ke̱-yaã Amorbii agõdši ašikpoṅ le̱ no̱ ke̱ hei fẽ ní be̱ṅke̱ dše̱i ye̱ Araba gõdši ašikpoṅ le̱ no̱ ke̱ dšō̱ le̱ mli ye̱ wuoyigbe̱ le̱ ke̱ ṅšo̱ le̱ nā, ye̱ Kanaanbii le̱ ašikpoṅ le̱ no̱ ke̱ Lebanon āhũ ke̱-yaši fā wulu ní dši Eufrate fā le̱ nā.

⁸ Na, mike̱ šikpoṅ le̱ efõ nyehĩe; nyeyaä ní nyeyaṅõa šikpoṅ ní Iehowa kã nyetše̱mei Abraham ke̱ Isak ke̱ Iakob kitã ye̱ he ake̱ eke̱ahãame̱ ke̱ ame̱sešibii ní baä ye̱ ame̱se̱ le̱.

⁹ Ni mikē̱nye ye̱ nakai be le̱ mli ake̱: Mikome minyẽṅnye mahĩe doṅṅ; 2 Mose 18,18. 4 Mose 11,14.

¹⁰ Iehowa, nye-Nyoṅmo̱ le̱, ehā nyeyi efá, ni na, ṅme̱ne̱ *nyetamo̱ ṅwei ṅulamii ye̱ fále̱ nā. *10,22. 1 Mose 15,5.

¹¹ Iehowa, nyetše̱mei a-Nyoṅmo̱ le̱, ahã nyeyi afá fè bo̱ni nyeyo̱ ne̱ toi akpei abo̱, ni edšō̱nye take̱ bo̱ni ewonye ši le̱!

¹² Té mafe tēṅ ní mikometō manyẽ nyehaomo̱i le̱ ke̱ nyedšatšui le̱ ke̱ nyesãdši le̱ matĕreṅ?

¹³ Nyefãmo̱a hĩĩ ní le nii ní yo̱ dſẽṅmo̱ ní yo̱ gbe̱i ye̱ nyekutšei le̱ anā, koni mawoame̱ onukpai ye̱ nyeno̱.

¹⁴ Ni nyehere no̱ nyekē̱mi ake̱: Noni okē̱ wo̱fe ne̱, ehĩ!

¹⁵ Ke̱ke̱ ni miṅõ nyekutšei le̱ amli anukpai ní le nii ní yo̱ gbe̱i le̱ miwo nyeno̱ onukpai, mei akpekpei atše̱mei ke̱ mei ohahai atše̱mei ke̱ mei nyoṅmai-enumo̱enumo̱i atše̱mei ke̱ mei nyoṅma-nyoṅmai atše̱mei ke̱ nyekutšei le̱ ano̱kwe̱lo̱i.

¹⁶ Ni miwo nyekodšolo̱i le̱ akitã ye̱ nakai be le̱ mli ake̱: Nyeboa nyenyemimei le̱ ateaṅ sãdši atoi, ni *nyekodšoa mo ke̱ enyemi ke̱ gbo̱ ní ke̱le̱ yo̱ le̱ teṅ ye̱ dšale̱ nā. *3 Mose 19,15.

¹⁷ Ni *nyekakwe̱a hĩeaṅ ye̱ kodšomo̱ mli; nyeboa mo bibiõ ke̱ gbomo agbo fẽ toi pe̱pē̱pe̱; nyekasea gbomo hĩe gbeyei; edšake̱ kodšomo̱ le̱, †Nyoṅmo̱ nõṅ! Ši sane ní wa tšṍ hãnye le̱ nyeke̱baã miṅõ, ni mabo toi. *16,19. †2 Mose 21,6.

¹⁸ Ni miwonye nihii fẽ ní sa ake̱ nyefe le̱ ahe kitã ye̱ nakai he le̱ mli.

¹⁹ Ni wo̱fã ke̱-dše̱ Horeb ni wo̱tšṍ ṅã kpeteṅkple ní no̱ yo̱ gbeyei ní nyena le̱ fẽ no̱ ye̱ gbe̱ ní kã ke̱-ya Amorbii le̱ agõdši ašikpoṅ le̱ no̱ le̱ ne̱, take̱ bo̱ni Iehowa, wo̱-Nyoṅmo̱ le̱, ewowo̱ kitã le̱, ni wo̱baše̱ *Kadeš-Barnea. *4 Mose 20,1.

²⁰ Ni mikē̱nye ake: Nyeše̱ Amorbii le̱ agõdši ašikpoṅ ní Iehowa, wo̱-Nyoṅmo̱ le̱, ṅõ-hãwo̱ le̱ no̱.

²¹ Na, Iehowa, o-Nyoṅmo̱ le̱, eṅõ šikpoṅ le̱ efõ ohĩe; ya ní oyaṅõ, take̱ bo̱ni Iehowa, otše̱mei a-Nyoṅmo̱ le̱, ke̱o ewie le̱. Kāše gbeyei ni otšui akafã! 9,23.

²² Ke̱ke̱ ni nyefẽ tſẽm nyetši nyebe̱ṅke̱mi ni nyekē̱: Hã ní wo̱tšũ *hĩĩ komei ke̱-tšṍ wo̱hĩe, koni ame̱yasra šikpoṅ le̱, ni ame̱bagbawo̱ gbe̱ ní wo̱yatšṍ no̱ le̱ ke̱ mãdši ní wo̱yanina le̱ ahe sane. *4 Mose 13,2.

²³ Ni sane le̱ sa mihĩe, ni miṅõ nyeteṅ mei nyoṅma ke̱ enyo̱, akutšo-fẽ-akutšo mli le̱ mokome.

²⁴ Ni ame̱yi mli ni ame̱yakwo̱ goṅ le̱ ni ame̱te Eškol dšō̱ le̱ṅ, ni ame̱yasra dše̱i.

²⁵ Ni ame̱ṅõ šikpoṅ le̱ no̱ yibii le̱ eko ame̱hĩe ame̱deṅ, ni ame̱ke̱-kpleke ši ke̱-ba wo̱ṅo, ni ame̱gbawo̱ ake̱: Šikpoṅ le̱ ni Iehowa, wo̱-Nyoṅmo̱ le̱, ṅõ-hãawo̱ le̱ ehĩ.

²⁶ Ši nyesumo̱o̱ ake̱ nyeya, ni nyetše Iehowa, nye-Nyoṅmo̱ le̱, wiemo̱ le̱ hĩe atũa, 4 Mose 14.

²⁷ ni nyewie hũhū̃hũ ye̱ nyebūi le̱ amli nyekē̱: Nye̱ Iehowa nye̱o̱wo̱ hewo̱ ni eyadšiewo̱ ke̱-dše̱ Mizraim šikpoṅ le̱ no̱, koni eke̱wo̱ abahã Amorbii, ní ame̱kpãtã wo̱hĩe.

²⁸ Nẽgbe̱ wo̱o̱tšṍ ke̱-ya? Wo̱nyemimei le̱ ehã wo̱tšui efã, edšake̱ ame̱kē̱: Mei le̱ dăra, ni ame̱ke̱le̱ fèwo̱; mãdši le̱ hũ dăra, ni atſa gbogboi awo he ke̱-yaši ṅwei, ni wo̱na Anakbii tete ye̱ dše̱i! 9,1. 2.

²⁹ Ši mikē̱nye ake̱: Nyekahãa ṅmiṅmi mīmõmo̱anye, ni nyekašeaame̱ gbeyei hũ!

³⁰ Iehowa, nye-Nyoṅmo̱ le̱, ní nyie nyehĩe le̱, le̱ noṅṅ eewu ehãnye, take̱ bo noṅṅ ní efe ehãnye ye̱ Mizraim ye̱ maṅ fẽ hĩe le̱, 2 Mose 14,14. 25. Ios. 10,14.

³¹ ke̱ ṅã le̱ no̱, heni ona ake̱ Iehowa, o-Nyoṅmo̱ le̱, hĩeo, tamo̱ bo̱ni nū ko hleo̱ ebi, ye̱ gbè̱i fẽ ní nyetšṍ no̱ le̱ no̱ ke̱-yaši beyino ní nyebaše̱ bie̱ le̱. 8,5. 2 Mose 19,4.

³² Ši ne̱ke̱ sane le̱ mli le̱ nyehee Iehowa, nye-Nyoṅmo̱ le̱, nyeyee;

³³ tše̱ bĕle̱ enyie nyehĩe ye̱ gbe̱ le̱ no̱, koni eyatao šitōhe ehãnye, nyōṅ le̱ ye̱ la mli, ní eke̱tšõnye no gbe̱ no̱ ní nyetšṍ, ni ſane hũ ye̱ atatu mli. 2 Mose 13,21.

³⁴ Ši beni Iehowa nu nyewiemo̱i le̱, emli fũ ni ekã kitã ekē̱:

³⁵ Ke̱dši ne̱ke̱ yino̱bii fõdši ne̱ ateṅ moko na šikpoṅ kpakpa ní mikã he kitã ake̱ mike̱-bahã nyetše̱mei le̱ fī̃!

³⁶ dša Kaleb, Iefune bi le̱, aana, ni le̱ noṅṅ maṅõ šikpoṅ ní eyanyie no̱ le̱ mahã ke̱ ebii le̱ hũ, edšake̱ enyie Iehowa se̱ ke̱-wula ši.

³⁷ Ni mi hũ, nyehewo̱ le̱ Iehowa mli fũmi, ni ekē̱: Bo hũ oyaṅ dše̱i! 4 Mose 20,12.

³⁸ Iošua, Nun bi le̱, moni damoo̱ ohĩe le̱, dši moni aaše̱ dše̱i; wole̱ hewale̱, edšake̱ *le̱ ebadša šikpoṅ le̱ mli ehã Israelbii le̱. *4 Mose 34,17.

³⁹ Asaṅ nyebifabii ní nyekē̱ abaṅõame̱ nom le̱, ke̱ nyebii ní náko ale ekpakpa ke̱ efõṅ ṅme̱ne̱ le̱, ame̱ ame̱aše̱ dše̱i, ni ame̱ maṅõ-hã, ni ame̱ noṅṅ ame̱aye no̱.

⁴⁰ Ši nye le̱, nyetšṍa nyehe, ni nye-tšṍa Ṅšo̱-tšuru le̱ he gbe̱ le̱ no̱ ke̱-yaä ṅã le̱ no̱!

⁴¹ Ke̱ke̱ ni nyehere no̱ ni nyekē̱mi ake̱: Wo̱fe Iehowa šiši eša; wo̱o̱te ní wo̱yawu, take̱ bo̱ pe̱ ní Iehowa, wo̱-Nyoṅmo̱ le̱, efã́wo̱ le̱! Ni nyeteṅ mofẽmo mĩa ke̱ etawūnii, ni nyebule̱ ſe̱mo̱ sane ake̱ nyeakwo̱ goṅ le̱.

⁴² Ši Iehowa kē̱mi ake̱: Kē̱mo̱ame̱ ake̱: Nyekayaä ní nyeyawua, edšake̱ mibe̱ nyeteṅ, koni nyehenye̱lo̱i le̱ akayatſianye nii!

⁴³ Ni mikē̱nye, ši nyeboo toi, ni nyetše Iehowa wiemo le̱ hĩe atũa, ni nyeši nyetšitši, ni nyekwo̱ goṅ le̱.

⁴⁴ Dšee no ni Amorbii le̱ ní yo̱ nakai goṅ le̱ no̱ le̱ dše kpo ke̱nye bakpe, ni ame̱ſienye, tamo̱ wòbii ſieo̱ mo le̱, ni ame̱hãã nyená ši nyesā gbé ke̱-dše Seir āhũ ke̱-yaši Horma.

⁴⁵ Ni nyekũ nyese̱ ní nyebafófói ye̱ Iehowa hĩe; ši Iehowa kwe̱e̱ nyehīe ni eboo nyegbē toi.

⁴⁶ Ke̱ke̱ ni nyehĩ ši ye̱ Kadeš gbĩĩ pī, tamo̱ gbĩĩabo̱ ní nyele ake̱ nyeye ye̱ dše̱i le̱.