Yemesi 5 - ZE'ELEGO PAALEGA

Buntateba en mugehe nɛreba

¹ Kelehe ya, yamam buntateba wa, kele ya gee si'ina la nimbɔ'seko en ye' ya zuo na la.

² Ya tarega la pu'ɛ mɛ, ti bunmɔgela mɔgɛ ya fukãra la.

³ Ya salema, la salempɛɛla la di la tiŋanziim, ti ba tiŋanziim la wan dɛna aze'nyɛ daana zɛregɛ ya, bu wan di ya iŋa wuu bugum la. Bihɛ ya, yamam tugum lagehɛ la lɔgerɔ biŋe ba'ahegɔ dabeha wa puan?

⁴ Kelehe ya! Yɔɔrɛ se'ere en de tuntuneba sɛba en tum ya vatɔ tuuma la ti ya fa' biŋe la kaahi baha me na, ti buneba la kaahega me lu pɛntiireba za'a nɛŋa Daana la tuban.

⁵ Ya vɔi timpaberɛ zuo mɛ la tarega la nyɛlum. Ya di mɛ karegɛ gura ya kum daarɛ.

⁶ Ya ni gakɛ mɛ, gee ku tuuntɔɔ daana, se'em en ka zigɛ la ya.

Suure di'ihego namehegɔ puan

⁷ N suurɔ wa, tari ya sugeri gee gura Daana la lɛbega na. Ti'ihɛ ya bihɛ Kaareba en ni tara sugeri se'em gura ba bumbuura suma la ti sigesaa la burega saa ta wa'am na ni.

⁸ Yamam me tara sugeri bala, gee da kɔ'ɛ ya puti'irɛ. Daana la kinɛ na paaɛ mɛ na en bala.

⁹ N suurɔ wa, da gɔgeni ya la taaba, bala ti ba kan gakɛ ya. Bihɛ ya, Gakera la en bala ze'a kuleŋa nuuren wa!

¹⁰ La han dɛna la namehegɔ la sugeri yɛla, n suurɔ wa, dole ya sɛla ti nɔtɔgeheba sɛba en tɔgɛ Daana la yu'urɛ puan la daa doohe namehɛ seko woo puan tole la.

¹¹ Yelemɛŋerɛ, tu yi'iri sɛba en sakɛ ŋmibega la, la sunduma. Ya wum Yobe ŋmibega la yele, ya me baŋɛ Daana la puti'irɛ yele dinɛ, Daana la en tari giile la nimbɔ'zɔrɛ se'em.

¹² Se'ere en gani za'a n suurɔ wa, da pɔti ya saazuo, bii timpaberɛ wa, bii pɔ yele se'ere. Bahɛ ya ti ya “Ɛ̃ɛ” dɛna ɛ̃ɛ, ti ya “Aayi” dɛna aayi', ti ya da lu sageŋɔ puan.

Sakerɛ Daana Pu'uhegɔ

¹³ Sɛba boi ya puan nameha? Ba pu'uhɛ. Sɛba boi ya puan tara pupeelum? Ba yuuna pɛka yuuma.

¹⁴ Sɛba boi ya puan bɛ̃'ɛra? Ba yi' lageŋɔ kiinduma ti ba pu'uhɛ bo' ba, gee sɔ' en tuulum sua la kaam Daana la yu'urɛ puan.

¹⁵ Sakerɛ pu'uhegɔ la wan faaɛ bã'duma la bahɛ, ti Daana la ihege ba, ti ba se'em en tum be'em wan nyɛ sugeri dia.

¹⁶ Ŋwana zuo, puti ya ya be'em bɔ'ɔra taaba, gee pu'uha bɔ'ɔra taaba bala ti ya wan nyɛ ya tibegɔ. Tuntɔɔ daana pu'uhegɔ tari la paŋa, gee tuna.

¹⁷ Elia yuum dela asaala wuu tumam la, gee yuum pu'uhɛ la ninmu'urɛ ti saa da ni, ti la dikɛ yuuma atã la ŋmarehi siyoobe ti saa sirum ka tɔkɛ timpaberɛ wa zuo.

¹⁸ Ti a le pu'uhɛ, ti saazuo ha bo' saa na, ti timpaberɛ wa zuo maalɛ dia.

¹⁹ N suurɔ, se'em han bɔna ya puan bɔregɛ yelemɛŋerɛ wa puan, ti se'em tari en lebena,

²⁰ ya mina ti, se'em woo en tari be'em daana a tuure puan lebe na la, wan faaɛ be'em daana la sia kum puan bahɛ, gee ti Yinɛ pi' be'em daana la be'em zo'e zo'e.