Yemesi 4 - ZE'ELEGO PAALEGA

Tiŋa wa zuo zɔtɔ

¹ Zaba la nɔkpɛ'ɛma sɛ'a en boi ya puan wa, ze'ele la bɛha na? Ba ka ze'ele la ya kunkoma'ahum la en zaberɛ ya puan la?

² Yan boti sɛla gee kan nyɛ la zuo, ti ya kuura.Ya nini en tɛti la sɛla gee kan nyɛ la zuo, ti ya ŋmɛ'ɛra nɔkpɛ'ɛma gee zabera taaba. Ya ka tari, beni zuo, ya ka soke.

³ Ya soke ya gee ka to'e, beni zuo, ya ni soke tuue mɛ, ti ya ta'am di ya ma'a nyɛlum.

⁴ Bunyaalehi wa! Ya ka mi' ti ya nyɔgɛ zɔtɔ la timpaberɛ wa, dela ya dɛna dinduma la Yinɛ? Ŋwana zuo, fum se'em woo en boti fum dɛna timpaberɛ wa zuo zɔ, lebege la Yinɛ dima.

⁵ Bii ya ti'ihɛ ti la dela yoo ti gulehegɔ la yeti, “Yinɛ si'ini mɛ la nyuure la a Sia la ti a bahɛ ti ka bɔna la tɔ la?

⁶ Gee a malum bɔ'ɔra nɛra woo la zu'uhegɔ zo'e zo'e. Ŋwana zuo ti la gulehɛ yeti, “Yinɛ zagehɛ pa'alɛ n mɛŋa duma mɛ, gee bɔ'ɔra la sigehe n mɛŋa duma zu'uhegɔ.”

⁷ Sigehe ya mɛhi ŋwana zuo, bo' Yinɛ. Da bo' ya kulekpa'bɛ'a la sore, gee a wan ɛkɛ gee bahɛ ya.

⁸ Vurege ya du' Yinɛ, gee eŋa me wan vurege du' ya. Pee ya nu'uhi, be'em duma wa, gee pee ya suya, puti'ira ayi' ayi' duma wa.

⁹ Fabele ya, si'ini ya, gee kɛla. Bahɛ ya ti ya lɔ'ɔrɔ lebege kuunɔ, ti ya pupeelum dɛna susageŋɔ.

¹⁰ Sigehe ya mɛhi Daana la nɛŋan, gee a wan zɛkɛ ya.

Taaba gakerɛ

¹¹ Da tɔgera ya be'em bɔ'ɔra taaba, n suurɔ wa. Fum se'em woo en tɔgɛ be'em bo' fum tadaana, bii gakɛ fum tadaana, tɔgɛ la be'em bahɛ ze'elego la zuo, gee gakɛ ze'elego la. Gee fum han gakɛ ze'elego la, fum ka tuni ze'elego la tuuma, gee fum dela ku gakera.

¹² Nɛra ayima ma'a en bo'ori ze'elego la, gee dɛna ku gakera, se'em en wan ta'am faaɛ gee sagum. Bala, fum dela ani ti fum gakɛ fum tadaana?

Nyɔ'ɔ ŋmɛ'a

¹³ Kelehe ya, yamam sɛba en yeti, “Zina bii beere tu wan kiŋɛ ke la ke ha, ta kɛ̃' bini yuunɛ, lɛɛbera nyɛta ligeri la.”

¹⁴ Gee ya pun ka mina sɛla ti beere wan tari na. Ya vom dela bem? Se'ere en sɔi la, ya dela mɛgelum en lu yee fii wa, gee mɛlum.

¹⁵ Gee yan tugum ni wan yele se'em dela, “La han dɛna Daana la putɛ ɛrɛ, tu wan vɔna, gee tum ŋwana la ŋwana.”

¹⁶ Gee lan de se'em la, ya ŋmɛ'ɛri nyu'ɔ la ya pa'alɛ mɛhi puan. Nyɔ'ɔ ŋmɛ'a kana taaba woo dela be'em.

¹⁷ Gee se'em woo en mi' sɛla en de ma'a ti a tum, gee koŋe a tum dɛ, tuue mɛ.