Yemesi 3 - ZE'ELEGO PAALEGA

Zɛleŋa tarega

¹ Dagi ya zo'e zo'e en wan dɛna pa'aleba n suurɔ, se'ere en sɔi la, ya mi' ti tu sɛba en pa'alɛ la, ba wan gakɛ tu la nima nima.

² Se'ere en sɔi la, tu za'a tuure mɛ. Se'em en ka tuure a tugum puan dela tuuntɔɔ, tana a a iŋa za'a tara la gareŋenɛ.

³ Tu han lɛ' Yire nɔya la gareŋenɛ ti tu tana ba, tu nyaŋɛ ba iŋa la za'a mɛ, ŋmɛreha ba tumam n boti zi'an.

⁴ Bii bihɛ ya uurenɔ, ban tibegɛ se'em ti kusebego ma'a za'ara ba kina la. Gee la bala za'a, zugɔ pika ti uuren-mɔneba la dikɛ yule uureŋɔ la pulin, tari ku kina bamam en boti se'em.

⁵ Bala mɛa ti zɛleŋa dɛna iŋa la lɔge pika, gee bahɛ ti asaala ŋmɛ'ɛra nyɔ' la yele kãra. Bihɛ goo en karegɛ se'em, gee ti bugum pãreŋa ni taaɛ kɔ di filam!

⁶ Zɛleŋa dela bugum. Zɛleŋa en boi tu iŋa wa puan la, dela be'em timpaberɛ. Ka ni galum la inganɛ wa za'a, nyaa taaɛ asaala naaŋɔ la za'a di ta ba'ahɛ gee nyaa taaɛ a mɛŋa dita, bugum timpaberɛ la puan.

⁷ Se'ere en sɔi la, goo duhi woo, niihe, bunsɛlenduma, ko'om puan bunvɔɔhi, ta'am nyɛ malehegɔ mɛ, ti asaala en sirum malehɛ ba,

⁸ gee nɛra ka boi ta'am malehɛ a zɛleŋa wa. A dela bumbe'o en ka tuni vɔ'ɔha, pirɛ la yabega.

⁹ Zɛleŋa kaŋa ti tu tara pɛgera Daana la, la Sɔ la, kaŋa mɛa ti tu tara pɔta bahɛ sɛba ti ba naam ba ti ba wuna la Yinɛ.

¹⁰ Nɔdinɛ mɛa puan ti sum, la ka' be'o zɛ'ɛta na. N suurɔ, la dagi la ana bala.

¹¹ Buleniho wan ta'am bula ko'sumɔ la ko'be'ero me yoi?

¹² N suurɔ wa, Kinkaŋa wan ta'am wam ta'ama? Bii sinsabega wam mu'uro? La kan malum iŋɛ ti ko'om en tari yaarum, bule ko'sumɔ.

Yɛm buyi'

¹³ Ani en tari yɛm, tara bɔkerɛ ya puan? Pa'alɛ bɔ doohe fum vom sumɔ la puan, ti fum tuni fum tuuma la ma'a ma'a la yɛm.

¹⁴ Gee ya han tara nintɛrega en ba' gaŋɛ, nyika puti'ira ya puan, da dagum ŋmɛ'ɛri ya nyu'ɔ, gee parena yelemɛŋerɛ la nɛŋan.

¹⁵ Yɛm buna taaba ka ze'ele saazuo na, gee bu dela timpaberɛ wa zuo, ka dɛna sia puan, gee kulekpa'bɛ'ɛhi yɛm.

¹⁶ Se'ere en sɔi la, zi'an ti nintɛrega la nyika puti'irɛ bɔna, gbiregeri la tuunfi'iha yima yima me wan bɔna.

¹⁷ Gee yɛm en ze'ele saazuo na, yia bu dela fa'a, tara suma'ahum, ma'ma, tara waŋa suboolum, pirɛ la nimbɔ'zɔrɛ, tara walesuma, ti fum kan nyɛ lugehego, bii birikɔgenɛ bu puan la fii me.

¹⁸ Ba burɛ la tuntɔɔnɛ biili suma'ahum puan, bo' sɛba en boti suma'ahum la.