Yemesi 2 - ZE'ELEGO PAALEGA

Lugehego kã'aŋɔ

¹ N suurɔ wa, yamam en tari ninkɔɔra se'em wa sirum nam Daana Yezu Kiresta, en de suŋa daana?

² Se'ere en sɔi la, nɛra han wa'am ya lageŋɔ puan na, pire salema bãhi, yɛ fusunɔ, ti naha me en ka yɛ lɔgesunɔ me kɛ̃' na,

³ ti ya han bihɛ nyɛ se'em daana en yɛ fusunɔ la, yele en yeti, “N beleni fum mɛ, zi'ire ka'lam,” gee yele naha la yeti, “Zɛ'a ke ha,” bii “Zi'ire tiŋa,”

⁴ ya ka lugehe la ya puan en bala, lebege gakereba en tari putɛ'be'ero?

⁵ Kelehe ya, n sunɔŋerɛ duma. Yinɛ ka looe la naheduma timpaberɛ wa zuo ti ba dɛna buntateba sakerɛ puan, la ba ta sɔna sɔ'ɔlum la ti Yinɛ biŋe nuurɛ bo' sɛba en nɔŋɛ en la?

⁶ Gee yamam ka nane naha. Dagi buntateba la en bala mugehera ya la? Dagi bamam en dati ya kina tugum zi'ihen la?

⁷ Dagi bamam en tuuri yu'sunɛ se'ere en dikɛ sigɛ ya la?

⁸ Ya wan iŋɛ suŋa, ya han sirum tum na'am nɔze'elego la wuu gulehegɔ la en yele se'em yeti, “Fum nɔŋɛ fum tadaana wuu fum mɛŋa la.”

⁹ Gee yamam han lugeha nɛreba, ya tum la be'em, ti ze'elego la nyɔkɛ ya ti ya tuue mɛ.

¹⁰ Se'ere en sɔi la, fum se'em woo en dole ze'elego la za'a, gee tuue zi'an kayima, tuue ze'elego la za'a mɛ.

¹¹ Se'ere en sɔi la, se'em daana en yeti, “Da tum kabohi la,” eŋa mɛa en yeti, “Da ku nɛra.” Bala, fum han ka tum kabohi, gee ku nɛra, fum tuue ze'elego la mɛ.

¹² Bala, tɔgera gee ita wuu sɛba ti ba wan gakɛ la fai bɔŋa ze'elego la.

¹³ Se'ere en sɔi la gakerɛ kan ta tara nimbɔ'zɔrɛ bo' se'em woo en ka tari nimbɔ'zɔrɛ. Nimbɔ'zɔrɛ ta' gakerɛ mɛ.

Sakerɛ en ka tari tuna

¹⁴ Beni nyuurɔ en boi bini n suurɔ, se'em han yeti a tari la sakerɛ gee ka tari tuna? Fum sakerɛ la wan faaɛ hɔ bahɛ yoi'?

¹⁵ Fum suuɔ bii taya han ɛɛra beele, ka tara a nuurɛ dia,

¹⁶ ti ya ayima yele en yeti, “Kina la suma'ahum. Ɔɔrɔ kan kɛ̃ hɔ, ti fum di tigɛ,” gee ka bo' en, en a inganɛ la en boti sɛla la, beni sum en boi bini?

¹⁷ Bala, sakerɛ ma'a, han ka tara tuna ki mɛ.

¹⁸ Gee ayima wan yeti, “Fum tari la sakerɛ, ti mam me tara tuuma.” Eii! Yi pa'alɛ mam fum sakerɛ la ti tuuma ka bɔna bini, gee mam me wan dikɛ la n tuuma la pa'alɛ hɔ n sakerɛ.

¹⁹ Ya nam ti Yinɛ dela ayima. Ya mɔ ya. Kulekpa'bɛ'ɛhi me pun nam la bala, gee gbi'ira.

²⁰ Ya boti ba pa'alɛ ya mɛ? Gɔɔŋɔ wa, ti sakerɛ en ka tari tuuma, ki mɛ?

²¹ Tu sɔyaaba Aberaham yuum ka di buurɔ a tuuma puan, eŋa en yuum kaabɛ a dayua Aziki kaabegɔ bimbine la zuo la?

²² Ya nyɛ ti sakerɛ la yuum vɔi mɛ la a tuuma la, ti a tuuma la bahɛ ti sakerɛ la bi'ɛ.

²³ Bala ti gulehegɔ la wa'am asira na, gulehegɔ seko en yeti, “Aberaham nam Yinɛ mɛ, ti Yinɛ bo' en tuntɔɔnɛ,” ti ba yi'ira en Yinɛ zɔ.

²⁴ Ya nyɛ ti nɛra diti buurɔ Yinɛ nɛŋan la a tuuma puan gee dagi sakerɛ ma'a zuo.

²⁵ Dagi bala mɛa ti Arehabe, pɔge yalema la yuum di buurɔ Yinɛ nɛŋan a tuuma puan, la eŋa en yuum to'e viihereba la gee bahɛ ti ba doohe sadɔɔ kuyima yehe la?

²⁶ Wuu iŋa en ka tari sia ki se'em la, bala mɛa ti sakerɛ en ka tari tuuma me ki.