Yemesi 1 - ZE'ELEGO PAALEGA

Pu'uhegɔ

¹ Yemesi en de yameŋa bo' Yinɛ la Daana Yezu Kiresta la, en gulehɛ gɔŋɔ wa bɔ'ɔra yizuto pia la tuyi' la en nɔgɛ bɔna zi'an woo la. Mam pu'uheri ya na.

Sakerɛ la Yɛm

² N suurɔ, ya han ni ta nyɛta maketooro seto woo, da dikɛ ya ku yi' sɛsɛla, gee tugum nyɛɛni ya.

³ Se'ere en sɔi la, ya mi' ti ya sakerɛ makerɛ bo'ori ya la ŋmibega.

⁴ Bahɛ ya ti ya ŋmibega la pirɛ, ti ya ta'am bi'ɛ kahegɛ ti sɛla da koŋe ya.

⁵ Ya se'em han pɔ̃hegɛ yɛm, a suhɛ Yinɛ, se'em en bo'ori yabi yabi gee ka fabela la, gee a wan bo' fum.

⁶ Gee suhɛ en la sakerɛ, gee da bu'ura. Se'ere en sɔi la, se'em n bu'uri ani wuu Ateko ko'mi'a ti kusebego tara ŋmɛ'ɛra kaara se'em la.

⁷ Nɛre se'em en ani ŋwana da ti'iha ti a wan to'e sɛla Daana la zi'an.

⁸ Se'ere en sɔi la nɛre-ina tari la puti'ira ayi' ayi', ka zɛ'ɛta se'ere puan.

Nɔŋɔ la Tarega

⁹ Bahɛ ya ti suuɔ seko en sigehe ku mɛŋa la, ŋmɛ' a nyu'ɔ, la Yinɛ en zɛkɛ en la,

¹⁰ ti buntata me sigehe a mɛŋa, beni zuo, tarega wan mɛlum wuu mɔpuuro la.

¹¹ Se'ere en sɔi la, wuntɛɛŋa zoni mɛ na la tuulega, ku'ura vatɔ la, ti bu puuro woo luta, ti bu suŋa la Sagena. Bala mɛa ti buntateba wan ta bahɛ yoo ban mu'ɛ nini ba bumbɔrɛ la puan se'em la.

Magehegɔ la pã'ahegɔ

¹² Sum boi mɛ la se'em en ŋmiberi makerɛ puan. Ena daana nyaŋɛ magehegɔ la mɛ, wan to'e vom muŋa la, ti Daana la biŋe nuurɛ ti a bo' sɛba en nɔŋɛ en la.

¹³ Se'em da bɔna ti makerɛ se'ere han paaɛ en, ti a yeti, “Yinɛ en makerɛ mam biha.” Se'ere en sɔi la, be'em kan ta'am makɛ Yinɛ bihɛ, Yinɛ mɛŋa me ka makerɛ se'em la be'em biha.

¹⁴ Gee la han ta iŋɛ bala, nɛra mɛŋa kunkoma'ahum en ni pã'ahɛ en, ve'e en kɛ̃' makerɛ la puan.

¹⁵ Ti kunkoma'ahum buna wa nyaa han ta nyɔkɛ puurɛ, bu dɔgeri la be'em, ti be'em buna wa han ta bi'ɛ kahegɛ, bu dɔgeri la kum.

¹⁶ Da bahɛ ya ti se'em pã'ahɛ ya, n sunɔŋerɛ duma wa.

¹⁷ Beni zuo, abo'yabiyabi woo, la bo'olum sumɔ woo ze'eti la saazuo, Sɔ la en de niihum daana la zi'an sigera na. Se'em puan ti ŋmɛlema la lika ka bɔna doohe teere se'ere puan.

¹⁸ Doohe a mɛŋa puti'irɛ en de se'em la zuo, a dɔgɛ tu mɛ doohe a yelemɛŋerɛ yelehum la puan, ti tu dɛna wala diina a naaŋɔ la puan.

Kelehego la tuuma

¹⁹ Ya dela ya bɔkɛ dina wa, n sunɔŋerɛ duma wa, bahɛ ya ti nɛra woo kɛleha kalam kalam, gee da tɔgera kalam kalam, bii ita suure kalam kalam.

²⁰ Se'ere en sɔi la, ya sunsunyiim la ka ŋwɔni Yinɛ tuuntɔɔ vom la.

²¹ Dinɛ zuo, yehe ya mɛhi yaalegɔ woo puan, la tuunfi'iha kãra puan, gee sigehe ya mɛhi to'e yelehum la en burɛ ya puan tara paŋa wan ta'am faaɛ ya sɛɛhi bahɛ la.

²² Gee me iti ya yelehum la en de se'em la, gee da yeen kelehe ya kelehego ma'a pã'ahɛ ya mɛhi.

²³ Se'ere en sɔi la, sɛba han yeen kɛleha yelehum la ma'a, gee ka tari bu tuna, ba ani mɛ wuu sɛba en ni bihɛ ba mɛhi biheŋa puan,

²⁴ ba han bihɛ ba mɛhi gee kiŋɛ, bilam bilam ba ni tamɛ ban ani ni se'em la mɛ.

²⁵ Gee sɛba en bihɛ nɔze'ele seko en ka tari gbelegere la, fai nɔze'elego la en ka tari gbelegere la, tara kɔ, dagena kɛleheba sɛba en tameni, gee sɛba en tari tuna, ba wan nyɛ sum ba itegɔ la puan.

²⁶ Sɛba han ti'ihɛ ti bamam pu'uheri Yinɛ, gee ka tana ba zɛlehi tara, gee pã'aha ba suya, ba pu'uhegɔ la dela yoo.

²⁷ Pu'uhegɔ seko en de fa'a, ka tara galeŋɔ Yinɛ en de Sɔ la nɛŋan en ŋwana. Tu bihera kiibehi, la pokɔpa ba nimbu'ɔ puan, gee ka galena ya mɛhi la timpaberɛ wa zuo yɛla.