Tõoma 8 - ZE'ELEGO PAALEGA

¹ Ti Sɔɔl to'e kua la ti ba ku la. De daarɛ mɛa ti mɛlehegɔ kãtɛ sige Yezu lageŋɔ la zuo Yerusalɛm puan, ti han dagena tuntuneba la ma'a, sɛba n nam la za'a zɔ yiregɛ mɛ kiŋɛ Yudiya la Samariya kinkɛlehi tihi puan.

Sɔɔl mɛlehɛ Yezu Lageŋɔ la

² Ti buraahi en zoti Yinɛ dikɛ Siteven ta laaɛ, gee kele en, si'im paaɛ paaɛ.

³ Gee Sɔɔl mu'ɛ la nini ba'ahera Lageŋɔ la, doohe la en dole yire yire vɛ'ɛra sɛba n nam la, buraahi la pɔgehi, tara kina ti ba pagera ba.

Filipi muulɛ Yelehum Samariya

⁴ Lan iŋɛ bala la, sɛba en nam la nyaa zɔ yiregɛ mɛ, lomehe zi'ihi, muula yelehum la.

⁵ Filipi kiŋɛ sige la Samariya tinkãtɛ puan, ta muulɛ Kiresta yele bo' ba.

⁶ Ban wum gee nyɛ daalehum zo'e zo'e sebo ti Filipi tum la, nɛrekuuŋɔ la naaɛ nuurɛ kelehe a yelehum la suŋa suŋa.

⁷ Se'ere en sɔi la, sɛfi'iha kaahi kaahedɔɔrɔ gee zɛ'ɛta nɛreba kekeko en tari ba la puan yɛhera gee baha ba, ti kɔɔrenɔ la wɔbehi zo'e zo'e ihegera kina.

⁸ Ti nyɛɛma kãtɛ sige tinkãtɛ la puan, yele ana zuo.

⁹ Buraa kayima yu'urɛ en yi'iri Simɔn se'em n ni tuna a tiim tuuma Samariya tiŋa la puan, yuum Samariya nɛreba la, yɛta ti eŋa bi'e mɛ.

¹⁰ Ti Samariya tiŋa puan, bia ta paara bunkutɛ woo kelehe en mɛ suŋa suŋa, gee yɛta yeti, “Burakana wa dela yinɛ se'ere ti ba yi'ira Paŋa Yinɛ la, n sige na.”

¹¹ Ti ba ni ana kɛli gee kɛleha n suŋa suŋa se'ere n sɔi la, saŋa zo'e zo'e ti a ni ita a tiim tuuma la yɔɔna ba.

¹² Gee lan nyaa wa'am na ti nɛreba la nam Filipi en muuli faarɛ la doohe Yinɛ sɔ'ɔlum la Yezu Kiresta yu'urɛ la, ba to'e la ko'om sua, buraahi la pɔgehi za'a.

¹³ Ti Simɔn la mɛŋa lagum nam yelehum la gee me to'e ko'om sua la. En to'e ko'om sua la ba'ahɛ la, a kɔ'ɔm du'ura Filipi la bala saŋa woo, bihera daalehum kãra la, nyalema kãra kɔ'ɔm sigera ti la iŋɛ en pakerɛ paaɛ paaɛ.

¹⁴ Nananawa, Yezu tuntuneba la n boi Yerusalɛm la n ta wum ti Samariyaduma to'e Yinɛ yelehum la me la, ba tum la Pita la Yɔn ba zi'an.

¹⁵ Ti ba bayi' la sige Samariya, ta paaɛ pu'uhɛ bo' ba, ti ba ta'am to'e Fa'a Sia la

¹⁶ (Se'ere n sɔi la Fa'a Sia la nan ka sige ba zuo na, ba yeen sɔ la ko'om Daana Yezu yu'urɛ la puan ma'a).

¹⁷ Ti Pita la Yɔn digehɛ ba nu'uhi pagelɛ ba zuto ti ba to'e Fa'a Sia la.

¹⁸ Gee Simɔn n ta nyɛ ti tuntuneba la dikɛ la ba nu'uhi pagelɛ ti Fa'a Sia la sige nɛreba zuo la, a tiɛ la nu'o ti a bo' tuntuneba la ligeri,

¹⁹ gee yeti, “Bu' ya mam me pankana wa, ti se'em woo ti n dikɛ n nu'uhi pagelɛ a zuo, Fa'a Sia sige a daana zuo.”

²⁰ Gee Pita yele en yeti, “Fum la fum ligeri la bahɛ yoo, la fum ti'ihɛ ti fum wan ta'am da' Yinɛ bo'olum wa la ligeri la.

²¹ Fum ka tari zi'an bii tɔtɛ yele ana wa puan se'ere n sɔi la fum suure dagi tuuntɔɔ Yinɛ nɛŋan.

²² Bala zuo la, tee yehe fum tuunfi'iha wa puan, gee suhɛ Yinɛ, ti la han wan ta'am iŋɛ, a di sugeri bo' fum suure ti'ihegɔ la.

²³ Se'ere n sɔi la mam nyɛ ti fum tari la nintɛrega, en tɔi wuu ya'am la ti tuunfi'iha zɔregɔ bobe fum.”

²⁴ Ti Simɔn lerege en yeti, “Suhɛ Daana la bo' mam ti sɛla wuu fum yele se'em wa la da sige n zuo.”

²⁵ Pita la Yɔn n yele bamam n mi' Yezu yele se'em, gee muulɛ Daana la yelehum la ba'ahɛ la, ba lebe la Yerusalɛm, ban ye' lɛbera la, ba muuli yelehum la bala bɔ'ɔra timbibehi zo'e zo'e se'ehi n kaaɛ Samariya tiŋa la nɛreba.

Filipi la Itoopia kpɛ'ɛma

²⁶ Ti Daana la Suŋera yele Filipi yeti, “Ihege la fum dikɛ tiŋanuurɛ bɔba sore wa, ta yibegɛ sore se'ere n ze'ele Yerusalɛm yɛ'a Gaza la.” (Muuen sore n bala)

²⁷ Ti Filipi ihege kiŋɛ. Bala ma'a la ti Itoopia bulɛ n de kpɛ'ɛnkãtɛ, n de ba yetɔgum kpɛ'ɛma, tuna bɔ'ɔra Itoopia Pɔgenaba Kandase, sɔna a pɔgenaba wa tarega za'a biha. A wa'am Yerusalɛm na ti a na'ahɛ la Yinɛ,

²⁸ gee nyaa lɛbera kula, nyaa yaga a yiiri toto zuo, gee kãala nɔtɔgeha Azaaya gɔŋɔ la puan.

²⁹ Ti Fa'a Sia la yele Filipi yeti, “Zɔ paaɛ yiiri toto wa, la fum zom.”

³⁰ Bala ti Filipi zɔ ta paaɛ yiiri toto la, wum ti buraa wa kãalɛ la Azaaya gɔŋɔ la puan, ti a soke en yeti, “Fum bɔkɛ fum kãalɛ sɛla wa?”

³¹ Ti buraa wa lerege en yeti, “N yeti n iŋɛ la ŋwani bɔkɛ, han dagena nɛra n suŋɛ mam?” Gee nyaa yi' Filipi ti a kɛ̃ na zi'ire lɛm en.

³² Gulehegɔ la ze'sɛka ti a kãala n yeti se'em n ŋwana. “Ba nyɔkɛ en mɛ wuu pehego la ta bo' se'em n kuuri duhi, a ani la bããlam wuu pehego en ani bããlam se'em gee ti ba kɛɛra ku kɔberɔ la, bala mɛa ti a ana bããlam ka ya'ɛ a nuurɛ.

³³ Ba diihe en la nyanɛ, ka bo' en buurɔ. Ani n wan ta'am pa'alɛ a nɛreba? Se'ere n sɔi la ba yehe a vom tiŋa wa zuo mɛ.”

³⁴ Ti Bulɛ wa soke Filipi yeti, “N soke fum se'ere, Nɔtɔgeha wa tɔgeri la ani yele? A tɔgeri la a mɛŋa yele n bala bii ayima me ha?”

³⁵ Ti Filipi ya'ɛ a nuurɛ pɔhɛ la gulehegɔ kuŋɔ mɛa puan, muulɛ Yezu faarɛ yelehum la bo' en.

³⁶ Ti ban boi sore zuo yɛ'a la, ti Bulɛ wa ta yeti, “Bihɛ, ko'om n ŋwana ha. Beni n wan gu' mam ti n kan to'e ko'om sua?”

³⁷ [Ti Filipi yele en yeti, fum han nam la fum suure za'a, fum wan sɔ. Ti a lerege yeti mam nam ya ti Yezu Kiresta dela Yinɛ Dayua.]

³⁸ Ti buraa wa bo' nuurɛ ti yiiri toto la ze'ele. Ti Filipi la Bulɛ la za'a lagum sige na, kiŋɛ paaɛ sige ko'om la puan, ti Filipi sɔ en ko'om.

³⁹ Ban ze'ele ko'om la puan kɔ'ɔm dooe na la , ti Daana Fa'a Sia la zɛɛ Filipi kiŋɛ ti Bulɛ wa ka le nyɛ en, gee to'e a sore kula gee nyɛɛna.

⁴⁰ Gee Filipi ta yeti a bihɛ la ti a boi la Azotuse, ti n dole tiŋa la puan tɔla la, a muuli la faarɛ yelehum la bɔ'ɔra tihi la puan tara tara ta paaɛ Kasariya tiŋa.