Tõoma 6 - ZE'ELEGO PAALEGA

Bayopɔi ti ba looe ti ba tum

¹ Dabeha aŋa puan la, zahereba la kãlɛ n wa pa'aha la, ti Hiburuduma sɛba n tɔgeri Giriki la la nyɔni mɛ la ba Hiburuduma la mɛŋa, doohe la ban ka bo'ori Hiburuduma sɛba n tɔgeri Giriki la pokɔpa la ba daare woo dia tɔtɛ la.

² Ti zahereba pia la bayi' la yi' sɛba n nam la za'a lagehɛ, yele ba yeti, “La dagi ma'a bo' tumam, ti tu bahɛ Yinɛ yelehum la muulegɔ gee yee dia tɔrega.

³ Bala tu suurɔ wa, looe ya buraahi siyopɔi ya puan n de tuuntɔɔ, ti Fa'a Sia la pirɛ ba, dɛna yɛmduma, tari na bo' tu, ti tu bo' ba sore ti ba biha yele ana wa,

⁴ gee tumam me, wuu tu tuni n de se'em la, tu wan kaabɛ tu mɛhi saŋa woo bo' pu'uhegɔ, la yelehum muulegɔ.”

⁵ Ti ban yele se'em la pee nɛreba la puurɛ, ti ba looe Siteven, n de buraa n pirɛ la sakerɛ la Fa'a Sia la, gee me looe Filipi, Porokoruse, Nikano, Timɔn, Pamenase, la Nikolayuse se'em n yehe Antiyoke se'em n dagi Yuda buuri gee lebege Yuda buuri la.

⁶ Ti ba bahɛ ti buraahi sina wa ze'ele tuntuneba la nɛŋan, ti ba pu'uhɛ, gee dikɛ ba nu'uhi pagelɛ ba zuto.

⁷ Ti Yinɛ yelehum la kɔ'ɔm yiregera, ti zahereba la kãlɛ malum pa'ahera Yerusalɛm puan, ti malema duma la zo'e zo'e to'e sakerɛ la.

Siteven nyɔkerɛ

⁸ Siteven pirɛ me la zu'uhegɔ la paŋa, tuna daalehum la nyalema kãra bɔ'ɔra nɛreba la.

⁹ Ŋwana ti sɛba n boi zamehegɔ yire la puan ti ba yi'ira a boi fai pa'alegɔ yire la puan la (Ban daa nan yi'iri pa'alegɔ ze'kana la bala ma'a ha la), Sereniduma, Alɛgezanda duma, la sɛba n me yehe Kilikiya, la Esiya na la, daa vaaɛ ihege la nɔkpe'ene la Siteven

¹⁰ Gee ba ka nyaŋɛ ze'ele la yɛmsebo la Sɛsɛka n boi la en ti a tɔgera la.

¹¹ Ti ba iŋɛ bããlam ɛbegɛ buraahi sise'ehi ti ba yeti, “Tumam wum mɛ ti a tɔgɛ tu' Moose la Yinɛ.”

¹² Ti ba bahɛ ti nɛreba la gbirege, ta ta' kiinduma, la gɔnmi'ineba la, ti la ka yuue ti ba kaaɛ Siteven mum, nyɔkɛ en, tari en wa'am kiinduma zi'an na.

¹³ Gee nyaa maahum aze' nyɛ pumparenduma, ti ba yehe na yeti, “Buraa wa kan malum bahɛ ka tɔgera tuura tuulum zi'an wa la Ze'elego la.

¹⁴ Se'ere en sɔi la, tumam wum ti a yeti, Yezu n de Nazareti buraa la wan wa'am na sagum ze'kana wa, gee malum teehum tu malema sɛ'a ti Moose dikɛ bahɛ tu la.”

¹⁵ Ti sɛba woo n boi kiinduma suhega zi'an la puan la biha Siteven nɛŋa zii, ta nyɛ ti a nɛŋa la tee me ana woo Suŋera nɛŋa la.