Tõoma 24 - ZE'ELEGO PAALEGA

Pɔɔl paaɛ Felikise Kasariya

¹ Ŋwana wa dabeha anuu puan, ti malema nɛŋadaana Ananiya sigena la kiinduma basɛba, la nɛra ayima en de yetɔgetɔgera ti ba yi'ira en Tetulose, ti ba dikɛ Pɔɔl yele biŋe timbihega nɛŋadaana la nɛŋan.

² Ban sam Pɔɔl ŋwana ba'ahɛ la, ti Tetulose wa pɔhɛ Pɔɔl zɛregerɛ, yɛta yeti: Naa sukpe'ene, “Fum zuo, suma'ahum boi tu mɛ wa'am na paaɛ zina, ti teere tee bo' tiŋa wa nɛreba wa, fum mi'ilum la zuo.

³ Tu nini ba' tigɛ la yele ana wa ti tu pɛgera a sadɔɔ woo puan la zi'an woo, la pupeelum.

⁴ Gee mam ka boti n gu'um la zuo, mam beleni fum mɛ ti fum kelehe tu suhega wa gi'a gi'a la fum zu'uhegɔ la.

⁵ Tumam n nyɛ buraa wa, yelemɛŋerɛ, a dela nɛrebe'o n de nyɔ̃pɔ̃hega bo' tiŋa wa. A dela se'em n baheri ti gbiregeri sigera Yuda buuri wa n boi timpaberɛ wa zuo zi'an woo, dɛna lageŋɔ seko ti ba yi'ira ba Nazarenduma la nɛŋadaana.

⁶ A pun zigɛ mɛ ti a galum Pu'uhegɔ yire la, ti tumam me nyɔkɛ en. [

⁷ Gee naba la pɛntiireba nɛŋa daana Lisiya n wa'am na la gbiregeri kãtɛ, faaɛ en tumam nu'uhen]

⁸ Gee yamam mɛhi la han viihɛ bihɛ, ya wan wum a mɛŋa zi'an, yele sɛ'a woo ti tumam dikɛ zɛregera en wa.”

⁹ Ti Yuuduma la me pa'ahɛ ba nuurɛ yeti, sɛla woo ti ba yele la n kɔ'ɔm bala ti ba tɔgɛ la.

Pɔɔl tɔgɛ gu' a mɛŋa Felikise nɛŋan

¹⁰ Timbihega nɛŋadaana la ta yele Pɔɔl ti a me tɔgɛ a nuurɛ la, ti Pɔɔl yeti: “Mam puurɛ pee mɛ la fum bo' mam sore ti n tɔgɛ n nuurɛ wa. Mam mi' ti fum bihɛ tiŋa wa la ka nɛreba dagi zina.

¹¹ Gee fum mɛŋa n wum se'em la, la ka gaŋɛ dabeha pia la ayi' n ŋwana, ti mam kiŋɛ zom Yerusalɛm ti n ta pu'uhɛ.

¹² Ba ka nyɛ mam ti mam ŋmɛ'ɛri nɔkpe'ene la se'em pu'uhegɔ yire la puan, bii n gbirege nɛreba zamehegɔ yire puan bii tiŋa la puan.

¹³ Ba me ze' nananawa, ba pun kan tara se'ere ti ba pa'alɛ yeti bamam n zuuheri mam se'ere zuo wa la dela yelemɛŋerɛ.

¹⁴ Gee se'ere n de yelemɛŋerɛ ti mam wan yele fum dela, la doohe la Sore la ti bamam yeti, de dela be'em tigere, gee mam pu'uhi la tu yaabeduma Yinɛ la, gee nam sɛla woo en gulehɛ biŋe doohe ze'elego la nɔtɔgeheba gulehɛ biŋe la.

¹⁵ Mam tari la beere puti'irɛ Yinɛ zi'an. Beere puti'irɛ se'ere ti bamam mɛhi pun sakɛ ti, tuntɔɔduma la be'em duma ihegere kum puan la wan tum.

¹⁶ Ŋwana zuo la, mam kpeŋere la n mɛŋa saŋawoo ti n tara putɛ'sunɛ bo' Yinɛ, la nɛreba za'a.

¹⁷ Yuuma n tole ha, ti mam yuum tari n bo'olum wa'am na ti n bo' n tiŋa nɛreba, gee me tara n kaabegɔ bo'olum na ti n kaabɛ.

¹⁸ Mam wa'am na bɔna malema ana puan la, ti ba nyɛ mam Pu'uhegɔ yire la puan, ti n boi la peere malema la ba'ahegɔ puan. Nɛreba daa ka zo'e bini, bii daaŋɔ seko sige bini.

¹⁹ Gee Yuuduma basɛba n daa ze'ele Esiya wa'am na, bamam me pun suni ti ba me boni fum nɛŋan ka'lam, la ba yele bamam me n tari se'ere la mam.

²⁰ Bii bahɛ ti nɛrebana wa yele fum n tuure n daa de se'ere ban daa tari mam kiŋɛ kiinduma la nɛŋan la,

²¹ Han dagena yele dina wa ma'a ti n daa zɛ'a ba nɛŋan gee yele la. ‘De dela nɛreba han ki ba wan le ihege la. Yele dina wa zuo ti mam zɛ'a fum nɛŋan zina wa.”

²² Gee Felikise n pun mina Sore la yele la, malum dikɛ yetɔgum la ze'ele la dabeherɛ se'ere yeti, “Lasiya n de pɛntiira kiima la han sige na, n wan bihɛ fum yele wa puan n de se'em.”

²³ Gee bo' pɛntiira nɛŋa daana se'em en biheri pɛntiireba kɔbega la nuurɛ yeti, guri ya en, gee bahɛ ya en ti a tara fai fii wa, da gu'uri ya a zɔduma ti ba da kina na bihera en gee bɔ'ɔra en sɛla ti a bɔta.

Pɔɔl boi pɛntiireba nu'uhen

²⁴ Ti la iŋɛ dabeha fii wa, ti Felikise doohe la a pɔga Durusila n de Yuda buuri la wa'am, tum ti ba yi' Pɔɔl na, ti a bahɛ en ti a tɔgɛ bu en ti wum a sakerɛ Kiresta Yezu puan n ani se'em.

²⁵ Ti Pɔɔl n ta tɔgera pa'ala tuntɔɔnɛ, tana fum mɛŋa tara, la gakerɛ la n kini se'em na la, ti dabeem kɛ̃ Felikise, ti a yele Pɔɔl yeti, “Kiŋɛ ti la iŋɛ fii, n han le ta nyɛ fole, n wan tum ti ba yi' fum na.”

²⁶ Gee ŋwana woo la, a puti'irɛ dela Pɔɔl wan bo' en ligeri. Yele dina wa me zuo ti a ni makɛ yi' Pɔɔl na zi'a la en sɔha.

²⁷ Yuuma ayi' n ta wa'am na tole, ti Pɔkiyose Fesetuse sooe Felikise, gee Felikise wa de gakɛ n boti a iŋɛ ti Yuuduma la puurɛ pee la, a bahɛ ti Pɔɔl kelum bɔna la paka deo puan.