Tõoma 23 - ZE'ELEGO PAALEGA

¹ Pɔɔl n ze' biha kiinduma zii la, a ta yeti, “N suurɔ, wa'am na paaɛ zina, mam vɔi n vom mɛ tuuntɔɔ Yinɛ nɛŋan.”

² Ŋwana ti Ananiya n de malema nɛŋadaana la kiima la, tahɛ sɛba n ze' lɛm Pɔɔl ti ba ŋmɛ' a nuurɛ la.

³ A yetɔgebuna ti Pɔɔl me yele en yeti, “Yinɛ wan ŋmɛ' fum nangoonpeele wa. Fum zi' bilam ti fum gakɛ mam doohe ze'elego la, gee la bala za'a fum galum ze'elego mɛ nyaa ta bo' nuurɛ ti ba ŋmɛ' mam?”

⁴ Ti sɛba n ze' lɛm Pɔɔl la yele en yeti, “Fum dela ani tuura Yinɛ malema kiima?”

⁵ Ti Pɔɔl yeti, “Mam ka baŋɛ n suurɔ, ti a dela malema kiima. Se'ere n sɔi la, gulehegɔ la yeti, ‘Da tɔgɛ fum nɛreba nɛŋa daana be'em.’ ”

⁶ Pɔɔl n ta baŋɛ ti nɛreba la basɛba dela Sadusii duma ti basɛba dɛna Farasiiduma la, ti a yi' kiinduma la buki yeti, “N suurɔ, mam dela Farasii, mam dela Farasii dayua. Mam boi tugum wa puan wa dela, beere puti'irɛ n ihegere la puan.”

⁷ Pɔɔl n yele ŋwana ba'ahɛ la, ti nɔkpe'ene lu Farasiiduma la, la Sadusiiduma la tiŋasuka, ti lageŋɔ la welege buyi'.

⁸ (Se'ere n sɔi la, Sadusiiduma la sakɛ ya gee pa'ala yeti, ihegere ka boi, Suŋereba ka boi, bii Sia bɔna. Gee Farasiiduma la me sakɛ ya, gee pa'ala yeti bana batã la za'a boi mɛ.)

⁹ Ti nɔkpe'en kãtɛ ihege, ti Farasii gɔnmi'ineba basɛba ihege yeti, “Tumam ka nyɛ tuure se'ere buraa wa puan. Gee la han dɛna la sira ti Sia bii Suŋera n sirum tɔgɛ bo' en?”

¹⁰ Nɔkpe'ene la n nyaa ta lebege zaberɛ la, ti dabeem kɛ̃ pɛntiireba kpɛ'ɛma doohe la ba ka gagɛ ba aahum Pɔɔl zɔra zɔra la, ti a bo' pɛntiireba la nuurɛ ti ba sige ta pɛregɛ Pɔɔl wa'am pɛntiireba bɔŋa ze'a la puan na.

¹¹ Yu'ukuŋɔ puan la, ti Daana la wa'am na zɛ'a lɛm Pɔɔl, gee yele en yeti, “Tara sukãberɛ, wuu fum n muulɛ mam yele se'em Yerusalɛm puan la, bala mɛa muulɛ mam yele Arome wa puan.”

Ban maaheni se'em ti ba ku Pɔɔl

¹² Ti bulika, ti Yuda buuri la maahum la taaba, gee bobe taaba la nɔpɔrɛ, ti ba kan di bii ba nyu han dagena ba ku la Pɔɔl.

¹³ Ba me gaŋɛ nɛreba pinaahi n ku nɔdina wa.

¹⁴ Ti ba kiŋɛ malema kiinduma la yizuto kiinduma la zi'an ta yele ba yeti, “Tumam kɔ'ɔm pɔ la nuurɛ ti dia kan tole tumam nuuren han dagena tu ku la Pɔɔl.

¹⁵ Bala la, nananawa, yamam la kiinduma la bahɛ ti pɛntiireba kpɛ'ɛma mina ŋwana, la a bahɛ ti ba tari Pɔɔl wa'am ya zi'a na, wuu ya boti ya malum viihɛ la a yele la paaɛ paaɛ la. Gee tumam pun maahum mɛ ti tu wan ba'ahɛ en ti a pun kan paaɛ yamam nɛŋan na.”

¹⁶ Gee Pɔɔl taya dayua wum ban yeti ba sugɛ se'em gura Pɔɔl, me kiŋɛ ta nyaŋɛ nyɛ sore kɛ̃ pɛntiireba bɔŋa zi'an la, dikɛ ŋwana yele Pɔɔl.

¹⁷ Ti Pɔɔl yi' pɛntiireba nɛŋadaana en biheri pɛntiireba kɔbega yele en yeti, “Tari budibele paalega wa kiŋɛ pɛntiira kpɛ'ɛma wa zi'an gee a tari se'ere ti a ko'ohe en.”

¹⁸ Bala ti kpɛ'ɛma wa pɛntiireba nɛŋadaana se'em en biheri pɛntiireba kɔbega pɛntiireba wa, to'e budibela wa, tari en kiŋɛ pɛntiireba kɛ'ɛma la ze'a na yele en yeti, “Pɔɔl n boi paka deo puan la n yi' mam, yele mam yeti n tari budibela wa wa'am fum ze'a na, gee ka tari se'ere ti ka yele bo' fum.”

¹⁹ Ti pɛntiira kpɛ'ɛma gi' budibela wa nu'o, tari ka lebe kinkɛleŋa ba ma'a, ta soke en yeti, “Beni n de la ti fum tara ti fum yele mam?”

²⁰ Ti budibela la lerege yeti, “Yuubuuri la ku la nuurɛ ti ba beere tum nɛreba fum zi'an ti fum bahɛ ti Pɔɔl wa'am ba zi'an wuu ba boti ba malum viihɛ la a yele la paaɛ paaɛ la.

²¹ Gee da to'e ba yetɔgum la. Se'ere n sɔi la, ba gaŋɛ buraahi pinaahi, n sugɛ sore gura. Ba woo pɔ la nuurɛ, ti ba kan di bii ba nyu han dagena bamam ku la Pɔɔl. Ba kɔ'ɔm maahum mɛ bɔna ha nananawa gee gura fum puti'irɛ.”

²² Ŋwana ti pɛntiireba kpɛ'ɛma wa bahɛ budibela wa ti ka kiŋɛ, gee yele en yeti, “Da pun yele zugɔ yiŋa me ti fum yele mam yele dina wa.”

Ba ta'ahɛ Pɔɔl timbihega nɛŋa daana Felikise zi'an

²³ Ti pɛntiira kɛ'ɛma wa nyaa yi' pɛntiireba nɛheduma bayi' en biheri pɛntiireba kɔbega kɔbega yele ba yeti, “Maahum ya la bahɛ ka'lam gogo kaareŋa awai' puan yu'uŋɔ, la pɛntiireba kɔbehi siyi, sɛba, sɛba en tari yire zabera pihiyopɔi, sɛba n tari kana zabera kɔbehi siyi, ti ya kiŋɛ Kasariya.

²⁴ Maahum yire me bo' Pɔɔl ti a ba', ti fum tari en la inma'ahum ta bo' timbihega nɛŋadaana Felikise.”

²⁵ Gee nyaa gulehɛ yele la n de se'em, gɔŋɔ yeti:

²⁶ “Mam Kulodeyose Lisiyase n gulehɛ bɔ'ɔra fum zuo daana, timbihega nɛŋadaana Felikise na. N pu'uhi fum na.

²⁷ Buraa wa ti Yuuduma la n boi ka'lam la nyɔkɛ ka, zigera ti ba ku ka, gee mam n baŋɛ ti ka dela Arome tiŋambia la, ti mam doohe la pɛntiireba ta to'e ka bahɛ.

²⁸ Mam zigeri ti n baŋɛ yelese'ere ti ba dikɛ zuuha buraa wa, mam bahɛ ti ba tari en kiŋɛ ba kiinduma la nɛŋan mɛ.

²⁹ Mam nyɛ se'ere dela, ba zuuhe en mɛ doohe ba ze'elego yɛla puan, gee ba mam ka nyɛ sɛla ti a tuue seke ba ku' en bii ba pagɛ en.

³⁰ Mam wam ti ba maaheni mɛ ti ba ku en, ti mam ta'ahɛ en fum zi'an nananawa na, gee me bo' sɛba n zuuheri en la nuurɛ yeti, ba wa'am fum ze'a na, la ba yele fum ban tari se'ere la buraa wa la.”

³¹ Bala ti pɛntiireba la n to'e a nuurɛ la, tari Pɔɔl bala wa'am na paaɛ Antipatirise tiŋa yu'uŋɔ.

³² Ti Yiimbeere, ti ba bahɛ ti pɛntiireba sɛba n tari yire zabera la tara Pɔɔl yɛ'a gee ti basɛba la tulege lebe pɛntiireba ba bɔŋa ze'a la.

³³ Ban wa'am na paaɛ Kasariya puan la, ba dikɛ gɔŋɔ la mɛ bo' timbihega nɛŋadaana la, gee dikɛ Pɔɔl me iŋɛ a nu'uhen.

³⁴ Zuo daana wa n kãalɛ gɔŋɔ la ba'ahɛ la, a soke Pɔɔl en yehe lugese'ere na, ti en baŋɛ ti Pɔɔl yehe la Kilikiya na la,

³⁵ ti a yele en yeti, “Sɛba n zuuheri fum la han paaɛ na, n wan bahɛ ti fum tɔgɛ fum nuurɛ.” Gee nyaa bo' nuurɛ ti ba tari en kiŋɛ Hɛrɔd yikãtɛ la puan ti a ta bɔna bilam gee ti ba gura en.