Tõoma 2 - ZE'ELEGO PAALEGA

Fa'a Sia la ye'ehego na

¹ Azɔɛtole dapihinuu de'eŋo la, (ti ba yi'ira Pɛntikɔse) daarɛ la n ta paaɛ la, ba za'a lagehɛ bɔna la bɔbeyinɛ.

² Ba ta yeti ba bihɛ ti sɛla n ze'ele saazuo damena na wuu kusebego kãtɛ la, wa'am na pi' yire se'ere ti ba bɔna bini la tapi.

³ Ti sɛla ana wuu bugum zɛlehi la welehi yima yima wa'am na yagelɛ nɛra woo zuo.

⁴ Ti Fa'a Sia la pirɛ ba za'a, ti ba pɔhɛ tɔgera yetɔgesaahi yima yima, wuu Fa'a Sia n bo' ba paŋa se'em la.

⁵ Saŋa kana puan la, ti sɛba woo n de Yuda buuri yelemɛŋerɛ la ze'ele la ban boi tihi se'ehi woo puan timpaberɛ wa zuo lagehɛ Yerusalɛm na.

⁶ Ti dameŋa kana wa bahɛ ti nɛrekuuŋɔ la en lagehɛ na la, la iŋɛ ba pakerɛ se'ere n sɔi la, nɛrawoo n boi bini wuni ban tɔgeri la a tiŋa yetɔgum.

⁷ Ti la iŋɛ pakerɛ gee ti dabeem kɛ̃ ba ti ba sɔkera taaba yeti, “Nɛrebana wa za'a dagi la Galiliihi?

⁸ Gee ti la iŋɛ la ŋwani ti tumam woo n boi ka'lam wuna ti ba tɔgera a mɛŋa yetɔgum?

⁹ Sɛba n ze'ele Patiya, Mɛdise, Ɛlamduma, la sɛba woo n de Mɛsopotemiya, Yudiya la Kapadosia, Pɔntusi la Esiya,

¹⁰ Firigiya la Pamfiliya, Igipiti la Libiya ze'se'ehi n boi Saarin sɔ'ɔlum puan la, la saama sɛba woo n ze'ele Arome wa'am na, Yuuduma, la sɛba n dagi Yuda buuri gee lebege Yuuduma,

¹¹ Kereteduma la Arebiyaduma za'a yɛta yeti, tu wuni ban tɔgeri tu mɛhi tiŋa yetɔgum puan pa'ala Yinɛ tuunkãra yɛla.”

¹² Ti la iŋɛ ba za'a pakerɛ ti ba ze'a yɛli yɛta taaba yeti, “Yele dina wa vuurɛ dela bem?”

¹³ Gee ti nɛreba basɛba me giila ba gee yɛta yeti, “Daam paalum ma'a n bala ti ba buge bala.”

Pita tɔgɛ bo' nɛrekuuŋɔ

¹⁴ Gee Pita n ze' la zahereba pia la ayima la n wum bala la, a zɛkɛ la a kua tɔgɛ bo' nɛrekuuŋɔ la yeti, “Yudiya nɛreba wa, la sɛba woo n boi Yerusalɛm wa, bahɛ ya ti n yele ya yele dina wa. Kelehe ya mam yeti se'ere wa.

¹⁵ Yelemɛŋerɛ, nɛreba wa ka buge wuu yan yeti se'em la. La nan dela gogo kaareŋa awai bulika.

¹⁶ Aayi, ŋwana wa dela yele se'ere ti Nɔtɔgeha Yowɛle yuum purɛ biŋe yeti,

¹⁷ ‘Yinɛ yeti, Ba'ahegɔ dabeha la puan, N wan ka'ɛ Sia la bahɛ saaleba woo zuo, ti ya dayɔɔhi la poyɔɔhi wan purɛ mam yelehum la, ti ya bumbile-paalehi nyɛta lilegere, ti ya buranya'ahi zaahena zaaheŋɔ.

¹⁸ Pun ta ta' la mam da'aba, buraahi la pɔgehi za'a dabeha aŋa puan, n wan ka'ɛ n Sia ti ba puta.

¹⁹ Gee n me wan tum daalehum saazuo wa ha, gee tum saŋa la daalehum timpaberɛ wa zuo, Ziim, la bugum la zu'uhi wan pi' tapi.

²⁰ Wuntɛɛŋa wan sobege ti ŋmarega dɛna ziim, gee ti Daana la dabehekãtɛ la, en de tɛrega dabeherɛ la nyaa paaɛ.

²¹ La wan wa'am na tole ti fum se'em woo n yi' Daana la yu'urɛ la wan nyɛ faarɛ.’

²² “Yamam sɛba n de Izirale buuri wa, kelehe ya mam n tari se'ere ti n yele wa. Yezu n de Nazareti buraa la, dela buraa n tari tuunɛ ti Yinɛ pun maahum en, gee tum daalehum a puan doohe paŋa, nyalema la daalehum ya tiŋasuka, ti la niiɛ pa'alɛ ya ti Yinɛ n sirum looe en wuu ya mɛhi n mi' se'em la,

²³ Buraa kana wa daa lu ya nu'uhen doohe la Yinɛ mɛŋa n pun maahum a mina de se'em la, ti ya daa kpa' en gee ku en, doohe la yan dikɛ en bu sɛba n ka mi' kiha la ti ba ku en la.

²⁴ Gee Yinɛ n vo'e en, gee yehe en kum puan bahɛ, se'ere n sɔi la, kum paŋa kan ta'am bobe en sɔna.

²⁵ Se'ere n sɔi la Deviti yuum purɛ a yele yeti, ‘Mam nyɛti n Daana la saŋa woo ti a bɔna n nɛŋan. Se'ere n sɔi la, eŋa n boi zuɔ nu'o ti n ka gbɛ'ɛra.

²⁶ Bala zuo, mam suure wan nyɛɛna, gee ti mam zɛleŋa tara pɛka. Se'ere n gani za'a dela, mam iŋa wa wan vo'ohe gee tara beere puti'irɛ.

²⁷ Se'ere n sɔi la, fum Yinɛ kan zagehɛ n Sia bo' ki'intiŋa, bii fum bahɛ ti fum Fa'a daana wa wuu'ɛ.

²⁸ Fum pa'alɛ mam vom sore la mɛ, Fum wan bo' mam nyɛɛma doohe la fum n boi la mam la.’

²⁹ “N suurɔ Izirale buuri wa, mam wan yele ya gee ti dabeem ka tara mam yeti, tu sɔyaaba Deviti me yuum ki mɛ ti ba pi' en, ti a yɔɔ kelum gã'a la zina.

³⁰ Se'em ma'a ti a dina nɔtɔgeha la, ti a pun mina mɛ ti Yinɛ pɔ mɛ la pɔtɛ ti a wan bahɛ ti a yaaŋa kayima ta wa'am na sooe zi'ire na'am kuka la zuo.

³¹ Deviti n nyɛti dina la zuo ti a tɔgɛ Kiresta vo'ore yele yeti, ‘A kan ta zagehɛ eŋa bo' ki'intiŋa la. Bii eŋa kɔba ta lagum wuu'ɛ.’

³² Yezu kana wa, Yinɛ n vo'e en, yelese'ere ti tu za'a dɛna aze' nyɛ duma ti de sirum iŋɛ mɛ.

³³ En nyaa paaɛ zi'ire Yinɛ na'am paŋa kuka la zuo la, a to'e Fa'a Sia la ti Yinɛ n de Sɔ biŋe nuurɛ ti a wan bahɛ ti a wa'am na la, bala ti a ka'ɛ ŋwana wa bahɛ tumam zuo, ti ya za'a nini nyɛ ti ya tuba wum

³⁴ Se'ere n sɔi la Deviti yuum ka ihege zom saazuo, gee eŋa mɛŋa en yeti, Daana la yele mam Daana la yeti, “Zi'a n zuɔ nu'o wa,

³⁵ gura ti n bahɛ ti fum dinduma za'a ta lebege fum nama dafeere.”

³⁶ Bala zuo la, Izirale yire za'a, mina ya suŋa ti Yinɛ n iŋɛ en ti a dɛna Daana la Kiresta. Yezu sɛka ti ya kpa' la.

Sɛba pɔhɛ tee ba suya

³⁷ Nɛreba la n wum ŋwana la, la ve'e ba mɛ ba suya puan ha, ti ba soke Pita la tuntuneba basɛba la yeti, “Tu suurɔ wa, tu nyaa wan iŋɛ la ŋwani?”

³⁸ Ti Pita yele ba yeti, Tee ya suya, ya za'a ayima ayima to'e ko'om sua Yezu Kiresta yu'urɛ la puan, ti Yinɛ di sugeri bo' ya be'em la, gee ti ya to'e Fa'a Sia la bo'olum la.

³⁹ Se'ere n sɔi la, Yinɛ n biŋe a nuurɛ ti a iŋɛ se'em la dela ya dinɛ la ya kɔma, ta ta' se'em woo n zaaɛ gee ti Daana la yi' en.

⁴⁰ Ti Pita dikɛ yɛla kekeko magehɛ pa'alɛ ba gee kpemehe ba yeti, “Faaɛ ya mɛhi be'em buuri saŋa wa puan bahɛ.”

⁴¹ Ŋwana ti sɛba woo n to'e a yelehum la za'a to'e ko'om sua, ti didaarɛ mɛa, nɛreba n paaɛ wuu tuha atã n wa'am na pa'ahɛ.

⁴² Ti nɛrebana wa kaabɛ ba mɛhi bo' tuntuneba pa'alegɔ la, la lageŋɔ la taaba, lagum ɔbera boroboro, la pu'uhegɔ.

Sakereba la vom la taaba

⁴³ Ti nɛra woo yari ya' nɔya, la daalehum la nyalema sɛ'a ti tuntuneba la tuna la.

⁴⁴ Ti sɛba woo n nam la za'a boi la bɔbeyinɛ ita sɛla woo buyina.

⁴⁵ Ba wan ni koohe ban tari sɛla, la ba lɔgerɔ, tari ligeri la wa'am na tɔrɛ bo' nɛra woo doohe la n boti sɛla.

⁴⁶ Beere en yilegeri woo, ba tari la saŋa zo'e zo'e bɔna pu'uhegɔ yire la puan zameha, tɔta boroboro la la taaba, gee dɔla taaba yiya dita la taaba la pupeelum la bu'a suya la taaba,

⁴⁷ pɛgera Yinɛ, ti ba puya pee la nɛra woo n nɔŋɛ ba se'em la. Ti beere n yilegeri woo, Daana la tara nɛreba pa'aha basɛba n nyɛ faarɛ wa lageŋɔ wa puan.