Tõoma 15 - ZE'ELEGO PAALEGA

Yerusalɛm Kiinduma sɔhega

¹ Ti nɛreba basɛba ta ze'ele Yudiya wa'am na pa'ala sakereba la yeti, “Han dagena fum ŋma mɛ wuu Moose pa'alegɔ la n yele se'em la, fum kan ta'am nyɛ faarɛ.”

² Ban ta ba'ahɛ la, Pɔɔl la Banabase ŋmɛ' la nɔkpe'en tuulɛ la ba, Pɔɔl la Banabase la basɛba ti ba looe ba ti ba tari yele ana wa kiŋɛ Yerusalɛm ta sɔhɛ la Yezu tuntuneba la la kiinduma la.

³ Ti lageŋɔ la tum ba, ti ban dole Fonisiya la Samariya la, ba yeti sɛba n dagi Yuda buuri la teere mɛ, ti sakereba la za'a n boi ze'se'ehi la puurɛ pee.

⁴ Ban wa'am na paaɛ Yerusalɛm la, lageŋɔ la za'a la Yezu tuntuneba la, la kiinduma la za'a to'e ba mɛ, ti ba me yele ba Yinɛ n doohe bamam puan tum yele sɛ'a woo.

⁵ Gee sakereba la basɛba n boi Farasiiduma wele la ihege ze'ele mɛ yeti, “La dela de sore ti ba ŋma ba, gee ti ba me bo' ba nuurɛ ti ba dɔla Moose ze'elego la.”

⁶ Ti Yezu tuntuneba la, la Lageŋɔ la Kiinduma la lagehɛ taaba zi'ire ti ba bihɛ sɔhega wa puan.

⁷ Ban ta ŋmɛ' nɔkpe'ene la zo'e la, ti Pita ihege ze'ele saazuo yele ba yeti, “N suurɔ wa, ya mi' ti kuremin ha la, Yinɛ yuum looe la loore ya puan, ti mam n wan dɛna se'em puan ti Sɛba n dagi Yuda buuri la wan doohe wum yelesuma wa wa gee lebege sakereba.

⁸ Gee Yinɛ se'em n mi' asaala suuren la, pa'alɛ yeti ba nari mɛ doohe la n bo' ba a Fa'a Sia la, wuu en yuum bo' tumam se'em la.

⁹ En duuhe ba suya la bahɛ doohe ban nam la puan la, pa'alɛ yeti, yima yima ka boi tumam la bamam tiŋasuka.

¹⁰ Bala zuo la, ŋwani ti ya makera Yinɛ bihera, doohe la yan le dikera yɔgehega yɔgera a zahereba wa, yɔgelehi, yɔgehega sɛka ti tumam yaabeduma bii tumam mɛhi kan ta'am zi wa?

¹¹ Lan tugum dɛna se'em dela, tumam sakɛ ya ti tu wan nyɛ faarɛ doohe la zu'uhegɔ seko n doohe Yezu puan na la, wuu bamam me n wan sakɛ se'em la.”

¹² Ti lageŋɔ la za'a yee suram, gee kɛleha sɛlawoo ti Banabase la Pɔɔl yɛta ba doohe daalehum la nyalema sɛ'a ti Yinɛ tum doohe ba puan, sɛba n dagi Yuda buuri la tiŋasuka la.

¹³ Ban ta tɔgɛ ba'ahɛ la, ti Yemesi lerege yeti, “N suurɔ wa, kelehe ya mam.

¹⁴ Simeyɔn (Yu'urɛ wa ta'am yi'ira Simɔn se'em yu'urɛ deyima en de Pita la). pun pa'alɛ Yinɛ en pɔhɛ zɔ sɛba n dagi Yuda buuri wa nimbu'ɔ se'em, gee yeti a yehe nɛreba ba puan ti ba yi'ira a yu'urɛ la.

¹⁵ Dina wa doohe mɛ la nɔtɔgeheba tugum la ti ba gulehɛ yeti,

¹⁶ ‘Yele ana pooren n wan lebe na, la n maalɛ Deviti bɔŋa zi'an la lu la. N wan vaaɛ nangoone gira la le mɛ en, la n sɛ di ze'ele saazuo,

¹⁷ ti nɛrawoo han nyɛ bala, ba wan ɛ Daana la. Sɛba n pun dagena Yuda buuri gee ti mam yi' ba la za'a. Daana la n yele se'em n baheri ti

¹⁸ nɛreba bɔkera yele ana yuuma yuuma ha la.’

¹⁹ Bala zuo, mam n gi' putɛ'se'ere dela, tu da daam sɛba n dagi Yuda buuri gee ŋmɛregɛ yɛ'a Yinɛ zi'an na wa,

²⁰ Gee tu tugum gulehɛ bo' ba yeti, ba yehe ba mɛhi baga dia puan, la yaluntuuma, la sɛla woo ti ba kigɛ ku, la ba da dita ziim.

²¹ Se'ere n sɔi la, tihi wuu puan, buuri sansɛka n tole, Moose tari sɛba n muuli a yele me, se'ere n sɔi la, ba kãalɛ a yele vo'ohego dabeherɛ wuu zamehegɔ yiya la puan.”

Kiinduma gɔŋɔ ti ba gulehɛ bɔ'ɔra sakereba sɛba n dagi Yuuduma

²² Ti Yezu tuntuneba la lageŋɔ kiinduma la, la lageŋɔ la za'a ku nuurɛ ti ba looe nɛreba ba puan pa'ahɛ Pita la Banabase puan tum ba ti ba kiŋɛ Antiyoke, ba tum Yudasi se'em ti ba yi'ira Barabase, la Silase se'em n de suurɔ la nɛŋa daana la,

²³ ba gulehɛ gɔŋɔ wa yeti, “Tu suurɔ wa, Yezu tuntuneba la, la Kiinduma la n gulehɛ bɔ'ɔra yamam sakereba sɛba n dagi Yuda buuri ya tuuhum puan na, bɔna Antiyoke, Siriya la Kilikiya tihi puan la, tu pu'uheri ya na.

²⁴ Tumam n wum ti nɛreba basɛba ze'ele tumam zi'an yehe, gee me ka to'e kã'aŋɔ tumam ze'a la, wa'am na yele ya yɛla a sɛ'a ti daam ya suya, gee gbirege ya puti'ira ti a ka gã'a bɔbeyinɛ la zuo,

²⁵ ti tumam ku nuurɛ deyina tum nɛrebana wa ya ze'a na, ti ba doohe la tu nɔŋerɛ suurɔ Banabase la Pɔɔl,

²⁶ sɛba n pun pɔ̃hɛ ba nyuurɔ tu Daana Yezu zuo.

²⁷ Tu tum la Yudasi la Silase sɛba n wan tɔgɛ yele sɛ'a n boi gɔŋɔ wa puan la ba nuurɛ bo' ya.

²⁸ Yelemɛŋerɛ la dagi Fa'a Sia la, la tumam me puti'irɛ ti tu pɛregɛ zeero le pa'ahɛ zeseto n pun bɔna ya zuo wa, han dagi yele sɛ'a en pakɛ wa.

²⁹ Ya da dita sɛla woo n dikɛ kaabɛ bo' bagerɛ, ya da dita ziim, bii sɛla ti ba kigɛ ku gee yehe ya mɛhi yaluntuuma puan. Ya han dɔla ŋwana, la ba'ahɛ mɛ, Yinɛ suŋɛ ya.”

³⁰ Ŋwana ti ba tum nɛreba wa, ti ba kiŋɛ Antiyoke. Ti ba ta paaɛ, lagehɛ lageŋɔ la za'a, ba bo' ba gɔŋɔ la.

³¹ Lageŋɔ la nɛreba la n kãalɛ gɔŋɔ la, ba puurɛ pee mɛ la kpemehego seko n boi bini la.

³² Ti Yudasi la Silase en de nɔtɔgeheba la tɔgɛ yele sɛ'a n wan kpemehe gee sɛ sakereba la ze'ele suŋa.

³³ Ban kɛ̃ bini yuue fii la, sakereba la bahɛ ba mɛ la suma'ahum ti ba lebe sɛba n tum ba na la zi'an. [

³⁴ Gee Silase bihɛ ti la ani suŋa ti a yee bilam.]

³⁵ Bala ti Pɔɔl la Banabase yee Antiyoke, la ba nɛreba basɛba zo'e zo'e, pa'ala nɛreba la, gee muula Daana la yelehum la bɔ'ɔra ba.

Pɔɔl la Banabase welegere

³⁶ Dabeha n iŋɛ fii wa la, ti Pɔɔl yele Banabase yeti, “Wa'ana ti tu lebe doohe bihɛ sakereba sɛba woo ti tu doohe tihi la woo puan pa'alɛ gee muulɛ Daana la yelehum bo' ba la, la tu bihɛ ban ani se'em.”

³⁷ Ti Banabase bɔta ti Yɔn se'em yu'urɛ deyima n yi'iri Maki la doohe ba.

³⁸ Gee Pɔɔl ku a puti'irɛ mɛ ti ba kan bahɛ ti se'em n tabelɛ zagehɛ ba Pamfiliya gee ka doohe ba kiŋɛ tuni la doohe ba.

³⁹ Ti ba nɔkpe'ene la ba' karegɛ gaŋɛ ti ba welehi taaba, ti Banabase tari Maki, ti ba zom uureŋɔ kiŋɛ Sapuruse.

⁴⁰ Gee ti Pɔɔl me tari Silase ti bamam me yeti ba yehe, Ti Sakereba la pu'uhɛ dikɛ en iŋɛ Daana la zu'uhegɔ puan.

⁴¹ Ti Pɔɔl doohe Siriya la Kilikiya tihi puan za'a puan, sɛɛra Lageŋɔ duma la woo zɛ'ɛta.