Tõoma 14 - ZE'ELEGO PAALEGA

Pɔɔl la Banabase boi Ikonium

¹ Bala mɛa n le iŋɛ, Ikonium puan, zi'an ti Pɔɔl la Banabase kiŋɛ ta kɛ̃' Yuuduma zamehegɔ yire la puan, muulɛ Yinɛ yelehum la paaɛ paaɛ ti Yuuduma la Girikiduma zo'e zo'e nam yelehum la.

² Gee Yuuduma sɛba n ka nam yelehum la dɔrɛ sɛba n dagi Yuda buuri la, tu'ule ba puti'ira la suurɔ la.

³ Ŋwana zuo, ti Pɔɔl la Banabase yee tiŋa la puan yuue, tɔgera Daana la yelehum la ninmu'urɛ, ti Daana la mɛŋa bahɛ ti a tuntuneba la tuna daalehum la nyalema la ba nu'uhi ti la pa'alɛ ti zu'uhegɔ yelehum la dela eŋa yelehum.

⁴ Gee tiŋa la nɛreba zo'e zo'e welehi mɛ buyi, ti basɛba pa' Yuuduma la n ka sakɛ yelehum la poore, ti basɛba me pa' Yezu tuntuneba la poore.

⁵ Ti sɛba n dagi Yuuduma la Yuuduma la ba kima za'a, la n ta maahum ti ba iŋɛ ba sɛla en ka ani suŋa gee lobe ba la kuga la,

⁶ ti Yezu tuntuneba la baŋɛ de yele, zɔ kiŋɛ Lisetira la Dɛɛbi n de Likoniya tinkãtɛ la puan, la tihi se'ehi n boi kɔrum kɔrum la puan.

⁷ Bilam ti ba ta bɔna gee muula faarɛ yelehum la.

Pɔɔl la Banabase boi Lisetira la Dɛɛbi tihi puan.

⁸ Lisetira puan, buraa n boi bini dɛna kɔɔreŋɔ ka dɔgum puan na, ka malum kiŋɛ.

⁹ Ti buraa kana mɛa wa zi'a kɛleha Pɔɔl n tɔgeri la kpiri. Ti Pɔɔl ta biha en zii, ta baŋɛ ti buraa wa tari sakerɛ ti a wan nyɛ a tibegɔ,

¹⁰ ti Pɔɔl yele en paŋa paŋa yeti, “Ihege ze'ele fum nama zuo.” Ti buraa wa ɛkɛ ze'ele, pɔhɛ kina kaara.

¹¹ Nɛrekuuŋɔ la n nyɛ Pɔɔl en tum se'em la, ti ba woole kpim Likoniduma yetɔgum puan yeti, “Tingama n lebege nɛreba wa'am tu zi'an na.”

¹² Ti ba sigɛ Barabase ti Zeyusi, gee sigɛ Pɔɔl ti Hɛmese, se'ere n sɔi la, eŋa n boi nɛŋa la tugum la.

¹³ Ti tindaansɛka n kaaberi Zeyusi wa la bagerɛ bɔ'ɔ la kɔ'ɔm pɔra la tiŋa la kinkɛleŋa, ti a tari lɔlehi la mɔpuuro na, ti eŋa la nɛrekuuŋɔ la maahum ti ba kaabɛ ba.

¹⁴ Yezu tuntuneba Banabase la Pɔɔl n ta wum ŋwana la, ba aahum la ba futo, gee zɔ gɛregɛ nɛreba la puan ha, tahera yeti,

¹⁵ “Tu zɔduma wa, ŋwani ti ya ita ŋwana? Tumam dela nɛresaaleba wuu yamam la, tara la yelesuma wa'am na muula bɔ'ɔra ya ti ya ŋmɛregɛ ya puti'ira yehe yeleyotuna wa puan, gee wa'am Yinɛ vua wa ze'a na, se'em n naam saazuo la tiŋa wa, la ateko wa la sɛla woo n boi ba puan la.

¹⁶ Buuri saŋa se'ehi n tole ha la, ti Yinɛ yuum bahɛ ti tihi woo ita ban boti se'em,

¹⁷ gee la bala za'a, aze' nyɛ duma boi mɛ Yinɛ itesuŋɔ seko ti a ita doohe n baheri ti saa zɛ'ɛta saazuo na niira bɔ'ɔra ya, ti yuuma dɛna yuumsuma, ti a tigeha tɔ tu dia ti ya suya pirɛ la nyɛɛma.”

¹⁸ La Pɔɔl duma n pun tɔgɛ yetɔge buna za'a la, bu ka nyaŋɛ la pika pika me, ta'am gu' nɛrekuuŋɔ la ti ba da kaabɛ ba.

¹⁹ Gee Yuuduma basɛba n ze'ele Antiyoke la Ikonium tihi puan na, tɔgɛ nyaŋɛ ti nɛrekuuŋɔ la ti ba pa' ba poore. Nyaa lobe Pɔɔl, vuue en yehe tiŋa la yiŋa ha ta bahɛ ti'iha ti a ki mɛ.

²⁰ Gee zahereba la n lagehɛ kaaɛ en la, a ihege mɛ kiŋɛ kɛ̃ tiŋa la puan, ti yiimbeere ti eŋa la Banabase kiŋɛ Dɛɛbi.

Antiyoke lɛbega.

²¹ Ban muulɛ yelesuma la tiŋa la puan ba'ahɛ la, ti nɛreba zo'e zo'e nam yelehum la, ba lebe la Lisetira, ze'ele bilam tole Ikonium nyaa ta tole Antiyoke.

²² Ba doohe malum kpe'em zahereba la gee kpemehe ba ti ba bɔna ba sakerɛ la puan, yɛta ba yeti, “Tu wan doohe la namehegɔ zo'e zo'e puan gee kɛ̃ Yinɛ sɔ'ɔlum la puan.”

²³ Ban doohe lageŋɔ la woo puan lu' nuurɛ gee pu'uhɛ gee loohe kiinduma bahɛ lageŋɔ woo puan ba'ahɛ la, ba dikɛ ba woo iŋɛ la Daana se'em ti ba sakɛ bo' en la nu'uhen.

²⁴ Ti ba nyaa ze'ele bilam doohe Pisidiya tole, wa'am na paaɛ Pamfiliya.

²⁵ Ban tɔgɛ yelehum la Pɛga puan la, ba ze'ele bilam kiŋɛ sige la Atalia.

²⁶ Ba ze'ele la bilam le zom uureŋɔ lebe Antiyoke, ze'a ti ba daa lagehɛ dikɛ ba iŋɛ Yinɛ zu'uhegɔ puan la tuuma la ti ba tum ba'ahɛ la.

²⁷ Ban wa'am na na paaɛ la, ba yi' lageŋɔ la za'a mɛ lagehɛ na, nyaa yele sɛla woo ti Yinɛ dikɛ ba tum la ba, la Yinɛ n yu'ɛ sakerɛ kuleŋa se'em bo' sɛba n dagi Yuda buuri la se'em.

²⁸ Ŋwana pooren, ba yee mɛ la Yezu zahereba la yuue fiiwa.