Tõoma 11 - ZE'ELEGO PAALEGA

Pita yele Yerusalɛm Lageŋɔ la sɛla n iŋɛ

¹ Nananawa,Yezu tuntuneba la, la sakereba la za'a n boi Yuda tiŋa la wum ti, sɛba n dagi Yuda buuri la me nam Yinɛ yelehum la mɛ.

² Bala, Pita n lebe zom Yerusalɛm la, sakereba sɛba n ŋma la zuuheri en mɛ

³ yeti, “Ŋwani ti fum kiŋɛ sɛba n ka ŋma la zi'an, pun ta di la ba?”

⁴ Ti Pita pɔhɛ yele yele pa'ala ba yeti,

⁵ “Mam wa bɔna la Yopa puan pu'uha, ta zɛɛ guum, nyɛ lilegere. Lilegere la puan, mam nyɛ sɛla n karegɛ wuu ganɛ la ti ba dikɛ sɛla lu' ku nɔya anaahi la ze'ele saazuo ha bahera ku fiifiihe na, wa'am na lɛm mam.

⁶ Ti mam n bihɛ ku zuo suŋa suŋa la, mam nyɛ duhi en tari nama anaahi anaahi, la muuen duhi, bãhi buuri, la niihe wa en ɛgeri wa.

⁷ Ti n wum kua, ti ka yɛta mam yeti, ‘Ihege, Pita; la fum ku ba obe.’

⁸ Ti mam yeti, La kan ta'am iŋɛ n Daana, se'ere n sɔi la, sɛla n de galeŋɔ bii kihere lɔkɔ ka tabelɛ tole mam nuurɛ wa puan.

⁹ Gee yi'i puan, kua la ze'ele saazuo lerege mam na yeti, ‘Sɛla ti Yinɛ pee, da yi' la galeŋɔ lɔkɔ.’

¹⁰ Bunɔ wa iŋɛ la butã gee ti ba lebehe ve'e sɛla woo zom saazuo ha.

¹¹ Bihɛ, sankaŋa mɛa puan, ti buraahi sitã ti ba tum ba ti ba ze'ele Kasariya na, paara tumam n kɛ̃'ɛ̃ri yise'ere puan la.

¹² Ti Sia la yele mam yeti n doohe en kiŋɛ gee da gahera bamam la tumam tiŋasuka. Ti tu suurɔ tuyoobe wa n doohe mam ti tu kiŋɛ ta paaɛ kɛ̃ buraa la yire.

¹³ Ti buraa wa, yele tu eŋa n nyɛ Suŋera ti a zɛ'a a yire la puan gee yele eŋa yeti, ‘Tum nɛreba Yopa, ti ba kiŋɛ ta tari Simɔn, se'em yu'urɛ n yi'iri Pita la na,

¹⁴ a wan bo' ya yelehum, ti fum la fum yire wa za'a wan nyɛ faarɛ.’

¹⁵ Ti mam n pɔhɛ tugum bini la, ti Fa'a Sia la sige ba zuo na, wuu kaŋa n yuum sige tumam zuo se'em pɔhega saŋa la.

¹⁶ Ti mam tiɛ tu Daana yelehum la, en daa wa yeti, ‘Yɔn sɔɔri ya mɛ la ko'om, gee ba wan ta sɔ yamam mɛ la Fa'a Sia la.’

¹⁷ Bala zuo,Yinɛ mɛŋa han bo' ba bo'olum bumɔ mɛa, sebo ti a daa tumam n daa nam bo' Daana Yezu Kiresta la, mam dela ani wan ta'am gu' Yinɛ?”

¹⁸ Nɛreba la n wum ŋwana wa la, ba yee la suram. Gee pɛgera Yinɛ yeti, “Yinɛ mɛŋa n bo' sɛba n dagi Yuuduma la me teere se'ere n bo'ori vom la.”

Lageŋɔ seko n boi Antiyoke

¹⁹ Nananawa, sɛba woo n zɔ yiregɛ doohe la ban mɛlehɛ Siteven se'em la zuo la, yiregɛ mɛ kiŋɛ zaaɛ zaarɛ ta paaɛ Fonisiya, Sapuruse, la Antiyoke tihi, ka muulɛ Yinɛ yelehum la bo' nɛra nɛra han dagena Yuda buuri la ma'a.

²⁰ Gee ba puan, buraahi sise'ehi n de Sapuruse, la Saarin tihi wa'am Antiyoke na tɔgɛ bo' sɛba n de Hiburuduma gee tɔgera Giriki la, me muulɛ Daana Yezu bo' ba.

²¹ Ti Daana la nu'o paga ba zuo, ti nɛreba zo'e zo'e sakɛ, dikɛ ba mɛhi bo' Daana la.

²² Ti yele ana wa woo lu Yerusalɛm lageŋɔ la woo tuban, ti ba tum Banabase Antiyoke.

²³ Banabase n wa'am na paaɛ nyɛ Yinɛ zu'uhegɔ la n sige nɛreba la zuo se'em la, a puurɛ n pee, ti a kpemehe ba za'a yeti, ba bɔna ba sakerɛ la puan la Daana la, la ba kaabɛ ba mɛhi bo' en saŋa woo;

²⁴ se'ere n sɔi la, Banabase wa dela nɛresuŋɔ, pirɛ la Fa'a Sia la, la sakerɛ, ti nɛreba zo'e zo'e wa'am Daana la zi'an na.

²⁵ Ti Banabase ze'ele bilam kiŋɛ Tasuse ti a ta ɛ Sɔɔl.

²⁶ En nyɛ Sɔɔl la, a tari en wa'am la Antiyoke na. Ba boi bini la bala yuum mune, lagena la Lageŋɔ la, pa'alɛ nɛrekuuŋɔ. Antiyoke puan ti nɛreba pɔhɛ yi' Yezu zahereba la yu'urɛ ti “Kiresta kɔma.”

²⁷ Sankaŋa puan, ti nɔtɔgeheba ze'ele Yerusalɛm sige Antiyoke na.

²⁸ Ti ba puan ayima yu'urɛ n yi'ira Agabuse, ti Sia la bo' en paŋa ti a vaaɛ ihege ze'ele purɛ yeti, kompɛɛlega wan sige timpaberɛ zuo zi'an woo. Ti la sirum wa'am na iŋɛ bala Kulodeyose Kaiza saŋa puan.

²⁹ Ti Yezu zahereba la kɔ'ɔm lu' ba puti'irɛ ti ba woo wan bo' Sakereba la en boi Yuda puan la suŋɛ doohe la nɛra woo paŋa n wan ta'am se'em bo'.

³⁰ Ti ba sirum iŋɛ yele dina wa, dikɛ ba suŋɛ bo' Banabase la Sɔɔl ti ba tari ta bo' kiinduma.