Taitusi 3 - ZE'ELEGO PAALEGA

Tara tuunsuma

¹ Tiihɛ ba ti ba sigehe ba mɛhi bo' nɛhi duma, la kpɛ'ɛnduma, ba nana ba. Ba maahum ba mɛhi bo' tunsunɛ woo,

² ba da tɔgera be'em bɔ'ɔra nɛra, ba bahɛ nɔkpɛ'ɛma, ba ana ma'ma, gee tara nɔsunɛ la nɛrawoo.

³ Se'ere en sɔi la, tumam mɛhi tabelɛ dɛna la geto, ka nana, bɔregɛ, dɛna da'aba bo' kɔrehi la nyɛlum yima yima, dikɛ tu dabeha tum pa'ahegɔ tuuma, nintɛrega, zɛregera nɛreba, yaaɛ taaba.

⁴ Gee Yinɛ se'em en de tu Faara la itesuŋɔ la a nɔŋerɛ kãtɛ la en niiɛ paaɛ nɛra woo la,

⁵ a faaɛ tu mɛ, dagi la tu tuntɔɔnɛ tuuma ti tu tum zuo, gee a nimbɔ'zɔrɛ la, doohe ko'om dɔgum paalemɔ la, la teere se'ere ti Fa'a Sia la tee tu la.

⁶ Sɛkana wa ti a ka'ɛ bahɛ tu zuo zo'e zo'e doohe Yezu Kiresta tu Faara la puan,

⁷ ti, en bo' tu buurɔ a zu'uhegɔ la zuo la, tu beere wan sɔna vom kan ba'ahɛ la ti tu tara bu puti'irɛ la.

⁸ Yetɔge buna wa dela yelemɛŋerɛ. Mam suure boti fum tɔgera yele ana wa suŋa, ti sɛba en wa'am na nam Yinɛ la wan kaabɛ ba mɛhi bo' tuunsuma. Yele ana wa dela ma'a, gee tara nyuurɔ bɔ'ɔra nɛra woo.

⁹ Gee yehe ya mɛhi nɔkpe'en yooro, yaabeduma yɛla, welehego, la nɔze'elego la zaberɛ yɛla, ba ka tari nyuurɔ, gee me ka tara vuurɛ.

¹⁰ Fum han diŋɛ ka'am nɛra yia, le pa'ahɛ yi'i, da le tara sɛla ita la se'em en welegere nɛreba,

¹¹ fum diŋɛ mina ti nɛre-ina taaba ka boti yelemɛŋerɛ, dɛna be'em daana, pun sagum a mɛŋa.

Ba'ahegɔ sɔhega, la ka'a

¹² N han tum Atemas bii Taikikuse fum zi'an na, kpeŋe fum mɛŋa gee wa'am n zi'an Nikopolisi tiŋa na, se'ere en sɔi la, n iŋɛ n puti'irɛ ti n bɔna la bilam ɔɔrɔ saŋa la.

¹³ Kpeŋe fum mɛŋa la fum tum Zenase en de yetɔge tɔgera, la Apolos na. Gee la fum kpeŋe fum mɛŋa ti sɛla da koŋe ba ba sore kinɛ la puan.

¹⁴ Gee bahɛ ti nɛreba la zamehɛ ba kaabɛ ba mɛhi bo' tuunsuma, la ba ta'am suŋera yelesɛ'a en ni di'e na la, ti ba da bahɛ yoo.

¹⁵ Sɛba woo en boi la mam la pu'uheri ya na. Pu'uhi sɛba woo en nɔŋɛ tɔ sakerɛ la puan la. Zu'uhegɔ bɔna la ya za'a.