Taitusi 2 - ZE'ELEGO PAALEGA

Pa'ala ma'a pa'alegɔ

¹ Gee han dɛna fum, pa'ala sɛla en dole la ma'a pa'alegɔ la.

² Yele buraa kureba la ti, ba da dɛna susuya duma, gee ba dɛna ninmu'urɛ duma, yɛm duma, kpe'em sakerɛ puan, nɔŋerɛ la ŋmibega puan.

³ Bala mɛa, yele pɔge kureba la ti ba tara na'ahegɔ ba vom puan, ba da dɛna sɛba en sageni nɛreba yu'ura, bii da'aba bo' daam-nyuure. Ba pa'ala sɛla en ani suŋa,

⁴ ti la nyaŋɛ kpemehe pɔge paalehi la ti ba nɔŋɛ ba sireba, nɔŋɛ ba kɔma,

⁵ ba tana ba mɛhi tara, nyɔkera ba mɛhi, tana bihera ba yiya, tara itesuŋɔ, sigeha ba mɛhi bɔ'ɔra ba sireba, ti Yinɛ yelehum la da nyɛ zɛregerɛ.

⁶ Bala mɛa, pa'alɛ bura paalehi la ti ba nyɔkera ba mɛhi.

⁷ Bahɛ ti naŋa bɔna fum puan zi'an woo, ti fum dɛna tuunsuma daana ti ba wan tɔgehɛ, fum pa'alegɔ puan, pa'ala la yɛm la paŋa,

⁸ la yɛm yetɔge sebo en ka tari sokere, ti se'em woo en ka sakɛ la, vi wan di en ti a kan nyɛ be'em sebo tɔgɛ tɔ.

⁹ Yele da'aba ti ba sigehe ba mɛhi bo' ba kpɛ'ɛnduma gee bɔ'ɔra ba na'ahegɔ en seke. Ba da lɛbeha ba kpɛ'ɛnduma la,

¹⁰ ba da zuura, gee ba pa'alɛ ti ba dela nɛresuma suŋa suŋa, bala ti sɛla woo puan, ba wan ana wuu nunɔm zɔtɔ la bo' ma'a pa'alegɔ la en ze'ele Yinɛ tu Faara zi'an na la.

¹¹ Se'ere en sɔi la, Yinɛ zu'uhegɔ la wa'am na tari la faarɛ na bo' nɛra woo,

¹² pa'ala tɔ ti tu bahɛ be'em woo, la tiŋa wa zuo nyɛlum yooro, la saŋa kana wa, tu vɔna vom sebo en de fum tana n mɛŋa tara, tuntɔɔnɛ la Yinɛ zoolum,

¹³ tumam n guri beere putɛ'sunɛ wa, la Yinɛ kãtɛ wa, la tu Faara Yezu Kiresta niirɛ na la na'ahegɔ la.

¹⁴ Eŋa en kaabɛ a mɛŋa bo' tu, ti a yɔ to'e tu tuure woo puan, gee pee tu bo' a mɛŋa, ti tu dɛna a mɛŋa nɛreba, sɛba en mu'ɛ nini tuna tuunsunɛ.

¹⁵ Muula yele ana wa, kpɛmeha, gee tahera nɛra woo la paŋa. Da bahɛ ti se'em bihɛ zeem fum.