Taitusi 1 - ZE'ELEGO PAALEGA

Pu'uhegɔ

¹ Mam Pɔɔl en de Yinɛ da'aberɛ, gee dɛna Yezu Kiresta tuntuna, sɛba ti Yinɛ looe la sakerɛ la zuo, la yelemɛŋerɛ mi'ilum sebo en dole Yinɛ zoolum la,

² beere puti'irɛ en de vom kamba'ahɛ la, ti Yinɛ en ka pareni wa biŋe nuurɛ gee baŋɛ naam tiŋa wa la.

³ Sansɛka en nari la puan, ti a niiɛ a yelehum la doohe muulegɔ puan, muulegɔ seko en dikɛ bo' mam, doohe Yinɛ en de tu faara la nuuren.

⁴ Mam en guleheri bɔ'ɔra fum Taitusi en de mam sunɔŋerɛ dayua, sakerɛ se'ere ti tu lagum dɔla la puan. Zu'uhegɔ la suma'ahum en ze'ele Yinɛ en de Sɔ la, la Kiresta Yezu en de tu Faara la bɔna la ya.

Taitusi kiŋɛ Kerete

⁵ Mam bahɛ hɔ Kerete tiŋa puan la dina wa zuo, ti fum maalɛ yelesɛ'a en gee dɛna a tum la, gee loohe kiinduma tiŋa woo puan, wuu mam en pa'alɛ fum se'em la.

⁶ Ba dɛna sɛba en ka tari zɛregerɛ ba vom puan, sire-sɛka en di pɔgeyiŋa, sɛba kɔma en nam Yezu, sɛba en dagi kɔm-wureba, bii tube-kpirehi.

⁷ Wuu eŋa en de Yinɛ lageŋɔ nɛŋadaana la, se'em en biheri Yinɛ lageŋɔ la, a tara zɛregerɛ zi'an. A da dɛna nɛre wurebere, bii sunsuya daana, bii a koohe a mɛŋa bo' daam, bii gbiregeri daana, bii a ba' nɔŋɛ ligeri.

⁸ Gee a dɛna se'em en to'oheri nɛreba a yire, nɔŋɛ itesuŋɔ, yɛm daana, dɛna tuuntɔɔ ka tara dɛgerɔ, tana a mɛŋa tara.

⁹ A dela a gurɛ yelehum la en dole pa'alegɔ la, ti la bahɛ ti a tana pa'ala pa'ali seko en de ma'a la, gee tana valegera sɛba en ka pa'ali dɔla la.

¹⁰ Ba zo'e mɛ dɛna tube-kpirega duma, tɔgɛ fai duma, la pumpã'ahum duma, yele yele wuu sɛba en ŋma la puan.

¹¹ Ba dela ba ŋmɛkɛ ba nɔya, la ban gbiregeri nɛreba yiya la ba pa'alegɔ la, doohe ban pa'ali pa'alegɔ seko en bo'ori bamam ma'a nyuurɔ, gee dagi na sɛla en dagena ba pa'ala.

¹² La yuum dela ba ayima, ba mɛŋa nɔtɔgeha en yuum yeti, “Kereteduma dela pumparenduma saŋa woo, ana wuu muuen dumbɛ'ɛhi, zinyagehi, gee dɛna punya'anduma.”

¹³ Ban tɔgɛ sɛla la dela asira. Dina zuo la, tahɛ ba la ninmu'urɛ, ti ba lebe bɔna sakerɛ la puan suŋa suŋa.

¹⁴ Da kɛleha Yuuduma yetɔge yooro la, bii tɔ'ɔha sɛba en zagehɛ yelemɛŋerɛ nɔze'elego.

¹⁵ Sɛba suya en de tuuntɔɔ la, sɛla woo dela tuuntɔɔ bɔ'ɔra ba, sɛba en ŋmɛleni gee ka nam Yezu la, sɛla ka boi dɛna tuuntɔɔ bo' ba. Ba mɛhi puti'ira la ba zuto ki mɛ.

¹⁶ Ba iŋɛ ba mɛhi ti bamam mi' Yinɛ, gee ba zagehɛ en mɛ la ba itegɔ la. Ba dela nɛre fi'iha, tube-kpirega duma, ka nara tuunsunɛ se'ere woo puan.