Lilegere 9 - ZE'ELEGO PAALEGA

Tintanɛ bunuu daana

¹ Ti suŋera bunuu daana la peebe a tintanɛ la, ti mam nyɛ ti ŋmarebila la en ze'ele saazuo ha lu timpaberɛ wa zuo na la, ti ba bo' ka kparehega, ti ka yu'ɛ boko kãtɛ en boi tiŋa tiŋa ha.

² Ti ka yu'ɛ boko la en boi tiŋa tiŋa ha la, ti zu'uhi tu'ura boko kãtɛ la puan na wuu bugum kãtɛ en taaɛ dita zu'uhi la, ti zu'uhi la gu' wuntɛɛŋa, la sabeeo wa.

³ Ti sunwa'ara ze'ele zu'sɔbelegɔ wa puan sige timpaberɛ wa zuo na, ti ba bo' ba kpe'eŋo ti ba kpe'eŋo la ana wuu nahi kpe'eŋo la timpaberɛ wa zuo.

⁴ Ti ba yele ba yeti, ba da sagum timpaberɛ wa muɔ, bii bumbula, bii tiihi, gee ba sagum nɛre sɛba woo en ka tari Yinɛ daalehum la ba gbɛ'ɛran.

⁵ Ba bo' ba sore ti ba mɛlehɛ nɛrebana wa taaba ŋmarehi sinuu, gee ba da ku ba. Gee bunduma wa duŋa too ani mɛ wuu naŋa duŋa la, ba han dum nɛra.

⁶ Dabeha aŋa puan, nɛreba wan ɛɛra kum, gee ba kan nyɛ. Ba wan bɔta ti ba ki, gee kum wan ɛkɛ gee bahɛ ba.

⁷ Fum han bihera sunwa'ara wa, ba ani mɛ wuu yire en bagɛ, maahum yɛ'a pɛntɛrɛ la. Ba zutin, sɛla en vuge ba wuu salema muhi la, ti ba nɛhi ana wuu saaleba nɛhi la,

⁸ ti ba zuo zonto ana wuu pɔgehi zuo zonto la, ti ba nyɛna ana wuu gbigema nyɛna la;

⁹ ti sɛla ti'ɛ ba nyu'urɔ wa wuu zaba kuto tɛ'ɛlega la, ti ba kelumpagehi la dameŋa ana wuu zaba yiiri toto kekeko en zoti yɛ'a pɛntɛrɛ damena se'em la.

¹⁰ Ba tari la zuya wuu nahi la, ti duŋa zi'an bɔna, ti ba paŋa bɔna la ba zuya la puan, ti ba mɛlehɛ nɛreba ŋmarehi sinuu.

¹¹ Ba tari la naba ti a biha ba, suŋera se'em en tari tiŋa tiŋa boko kãtɛ la kparehega la. A yu'urɛ Hiburu puan dela Abadon. Giriki puan a yu'urɛ dela Apoliyon.

¹² Yia namehegɔ la tole ya, bihɛ, namehegɔ buyi' en wan wa'am na.

¹³ Ti suŋera buyoobe daana la peebe a tintanɛ la, ti mam wum ti kua ze'ele iila a naahi la en boi kaabegɔ salema daka la en ze' Yinɛ nɛŋa la,

¹⁴ yɛta suŋera buyoobe daana la n tari tintanɛ la yeti, “Lorege suŋereba banaahi la ti ba bobe ze'ele Yufaratesi kulaa kãtɛ la zi'an la bahɛ.”

¹⁵ Ban bahɛ suŋereba banaahi la se'em n bala. Suŋereba sɛba ti ba gurɛ ba ze'ele gura sansɛka, dabeherɛ se'ere, ŋmare sɛka, la yuunɛ se'ere, ti ba ku nɛresaaleba buyina puregerɛ butã puan timpaberɛ wa zuo la.

¹⁶ Pɛntiireba sɛba en yage yire zuo, maahum la, kãlɛ dela, tuha kɔbehi siyi. Mam wum ba kãlɛ dina wa mɛ.

¹⁷ Mam nyɛ yire la se'em lilegere la puan en ŋwana. Yire la ba'areba la yɛ la tɛ'ɛlega kuto futo n mu'ɛ wuu bugum, la tuulum kuge sɔbele puuhego, kuge dɔboolum, ti yire wa zuto ana wuu gbigema zuto la, ti bugum la zu'uhi la bugum peelum yɛhera ba nɔyan na.

¹⁸ Tooro tuna tutã' wa en ku timpaberɛ wa zuo nɛreba buyina puregerɛ butã. Bugum la, zu'uhi la, la bugum peelum la en ze'eti ba nɔyan yɛhera na la.

¹⁹ Se'ere en sɔi la, yire wa paŋa boi la ba nɔyan la ba zuyan. Ba zuya la ani mɛ woo bunsɛlenduma la, tara zuto, ti ba tara ba mɛleha saaleba la.

²⁰ Gee nɛre sɛba woo en gee, ti too kuna wa ka ku ba la, ka makɛ tee ba mɛhi ba nu'uhi en iti sɛla puan, bii ba bahɛ ba na'aha kulekpa'bɛ'ɛhi, la baga ti ba dikɛ salema, salempɛɛlega, la nyɔgum, la kuga, la dɔɔrɔ maalɛ ba ti ba ka nyɛta, bii wuna, bii kina la.

²¹ Ba me ka tee ba mɛhi ba nɛre kua la, bii ba sɔ̃niniduma la, bii ba yaluntuuma, bii ba nageyigum la puan.