Lilegere 8 - ZE'ELEGO PAALEGA

Daalehum buyopɔi la zu'uhi nyu'a dugela

¹ Pebila la en lorege daalehum buyopɔi la, la ani la suram tinsuŋan la, paaɛ wuu gogo kaareŋa girego.

² Ti mam nyɛ ti suŋereba bayopɔi la en ze' Yinɛ nɛŋan la, ti ba bo' ba tintana a yopɔi.

³ Ti suŋera ayima zãla zu'uhi nyɔ'a dugela en de salema, wa'am na ze'ele kaabegɔ bimbine la zi'an, ti ba bo' en nyuuŋo suŋɔ digelum zo'e zo'e, ti a dikɛ kaabɛ pa'ahɛ nɛresunduma la woo pu'uhegɔ la, kaabegɔ daka la en de salema la zuo, na'am kuka kãtɛ la nɛŋan.

⁴ Ti nyuuŋo suŋɔ digelum zu'uhi la, la nɛresunduma pu'uhegɔ la ze'ele suŋera la nu'uhen ihegera saazuo, Yinɛ nɛŋan

⁵ Ti suŋera wa dikɛ zu'uhi nyɔ'a dugela wa, mu'ɛ bugum kaabegɔ daka la zuo, pirɛ ka, dikɛ dugela la lobe bahɛ timpaberɛ wa zuo na, ti saa tahega, saa dameŋa, saa nyaka, la tinmiiŋo kɔ'ɔm gbiregera.

Tintana ayopɔi

⁶ Ti suŋereba bayopɔi la en zãli tintana ayopɔi la, maahum ti ba peebe tintana la.

⁷ Ti yia suŋera la peebe a tintanɛ la, ti sakuga la bugum en gɛregɛ la ziim, ti ba ka'ɛ bahɛ timpaberɛ wa zuo na, ti timpaberɛ wa buyina puregerɛ butã puan taaɛ bugum di. Tiihi buyina puregerɛ butã di, ti mɔ ma'aha za'a di.

⁸ Ti yi'i suŋera la peebe a tintanɛ la, ti sɛla en ani wuu zoore kãtɛ la, taaɛ bugum dita ti ba za'ɛ bahɛ n ateko puan na.

⁹ Ti ateko la buyina puregerɛ butã puan, lebege ziim, ti bunvɔɔhi en boi ko'om la puan la buyina puregerɛ butã puan ki, ti uurenɔ en boi ko'om la zuo buyina puregerɛ butã puan, sagum.

¹⁰ Ti suŋera butã daana la peebe a tintanɛ la, ti ŋmarebili kãtɛ ze'ele saazuo lu timpaberɛ wa zuo na, nyagera la bugum. Ka me lu la kulaahi la kulehi woo buyina puregerɛ butã puan.

¹¹ Ŋmarebila wa yu'urɛ yi'iri la buntoo. Ti timpaberɛ wa zuo za'a ko'om, buyina puregerɛ butã puan tɔna lanlaŋi, ti zo'e zo'e ki, ko'om la nyua puan, bu too la zuo.

¹² Ti suŋera bu naahi daana la peebe a tintanɛ la, ti wuntɛɛŋa niihum buyina puregerɛ butã kiŋe, ti ŋmarega niihum buyina puregerɛ butã puan kiŋe, ti ŋmarebibehi me buyina puregerɛ butã puan me kiŋe, ti la bahɛ ti ba woo niihum buyina puregerɛ butã puan kiŋe, ti wuntɛɛŋa ka niira dabeherɛ la buyina puregerɛ butã puan, ti yu'uŋɔ me dɛna bala mɛa.

¹³ Ti mam bihɛ, wum ti tugeho kaaheri kɔkɛ'ɛŋa gee ɛgera saazuo ha, yɛta yeti, “Yele kãtɛ, Yele kãtɛ, Yele kãtɛ boi timpaberɛ wa nɛreba zuo, suŋereba batã wa han peebe ba tintana la ti ba bɔna bini ti ba peebe la!”