Lilegere 7 - ZE'ELEGO PAALEGA

Yinɛ nɛreba tuha kɔbega la tuha pinaahi la anaahi en tari Yinɛ daalehum

¹ Ŋwana en tole la, ti mam nyɛ ti suŋereba banaahi zɛ'a timpaberɛ wa luga anaahi la puan, gurɛ timpaberɛ wa luga anaahi la za'a kusebego, ti kusebego da lobe timpaberɛ wa zuo, bii ateko puan bii ku lobe bahɛ tisɛka zuo.

² Ti mam nyɛ suŋera ayima, ti ka ze'ele dapɔya sigera na tara Yinɛ vua wa daalehum, gee yi' la kɔkɛ'ɛŋa, suŋereba banaahi la ti ba bo' ba paŋa ti ba sagum timpaberɛ wa, la ateko la.

³ A yele ba yeti, “Da sagum ya timpaberɛ la, bii ateko la, bii tiihi la, gura ti tu daalɛ tu Yinɛ yamehi la daalehum busebo ba gbɛ'ɛra ba'ahɛ.”

⁴ Ti mam wum ti sɛba ti ba wan daalɛ ba la dela tuha kɔbega la tuha pihinaahi la a naahi, Izirale buuri woo puan.

⁵ Yuda buuri puan nɛre tuha pia la ayi' Aruben buuri puan, nɛre tuha pia la ayi'. Gad buuri puan, tuha pia la ayi'.

⁶ Asere buuri puan, tuha pia la ayi'. Nafetali buuri puan, tuha pia la ayi'. Manaasɛ buuri puan, tuha pia la ayi'.

⁷ Semiyɔn buuri puan, tuha pia la ayi'. Levi buuri puan, tuha pia la ayi'. Isaka buuri puan, tuha pia la ayi'.

⁸ Zebulun buuri puan, tuha pia la ayi'. Yosefe buuri puan, tuha pia la ayi'. Benyamin buuri puan, tuha pia la ayi' en daalɛ.

Nɛrekuuŋɔ en ze'ele tihi woo puan na

⁹ Ŋwana en tole la, mam nyɛ la nɛrekuuŋɔ ti nɛra kan ta'am kãalɛ ba, en ze'ele tihi woo, buuri woo, nɛreba woo, la tugum woo puan na, zɛ'a na'am kuka kãtɛ la, la Pebila la nɛŋan, yɛ salema lɔge pɛɛla, zãla kunkɔɔreŋɔ vɔtɔ ba nu'uhen.

¹⁰ Kaahɛ bahɛ na la kɔ kɛ'ɛŋa yeti, “Faarɛ ze'eti la tumam Yinɛ wa, se'em en yage na'am kuka kãtɛ wa zuo wa, la Pebila wa zi'an na.”

¹¹ Ti suŋereba za'a ze'ele kaaɛ na'am kuka kãtɛ la, la kiinduma la, la bunvɔɔhi banaahi la, ti ba za'a lu aliko na'am kuka kãtɛ la nɛŋan, na'ahɛ Yinɛ,

¹² yuuna yeti, “Taari, Sum, la suŋa la yɛm la fara fara la na'ahegɔ la paŋa la kpe'eŋo dɛna tumam Yinɛ la dinɛ wuuha wuuha, Taari.”

¹³ Ti kiinduma la ayima nyaa yele mam yeti, “Bani en de ba yɛ fupɛɛla wa, ba ze'ele la bɛha na?”

¹⁴ Ti mam yele en yeti, “Naa, fum en de se'em en mi'.” Ti a nyaa yele mam yeti, “Bana dela sɛba en ze'ele namehegɔ kãtɛ puan yehe na. Ba pee ba futo mɛ, ti tu pelege kirikiri Pebila la ziim la puan.

¹⁵ Ŋwana zuo ti ba ta'am paaɛ Yinɛ na'am kuka wa nɛŋan na wa, gee na'aha en beere en yilegɛ woo, la yu'uŋɔ a pu'uhegɔ yire wa puan wa, ti se'em en zi' na'am kuka kãtɛ wa zuo la wan gura ba.

¹⁶ Ba kan mina kom, bii ko'nyuuro le yɛ'ɛha Wuntɛɛŋa ka le si'ira ba, bii wɔlegɔ ŋmɛ'ɛra ba.

¹⁷ Se'ere en sɔi la, Pebila la en boi na'am kuka kãtɛ la zuo la en wan dɛna ba dunkiina, wan tari ba kina vom ko'sumɔ kulaa la puan ti ba nyuura, gee ti Yinɛ wan duuhe ba nintam woo ba ninin bahɛ.”