Lilegere 6 - ZE'ELEGO PAALEGA

Daalehum bayopɔi

¹ Ti mam nyɛ ti Pebila la lorege daalehum bayopɔi la a yima, ti mam wum ti bunvɔɔhi banaahi la a yima yi' bahɛ na la kua en ani woo saa dameŋa yeti,“Wa'ana.”

² Ti mam bihɛ, ti yeeho pɛɛlega en ze', ti bu ba'ara zãla tahɔ, ti ba dikɛ muŋa bo' en, ti a yehe na, dɛna nyaŋera, ti a nini mu'ɛ la nyaŋerɛ.

³ Pebila la en lorege yi'i daalehum la, ti mam wum ti bunduma la, yi'i daana la yi' bahɛ na yeti, “Wa'ana.”

⁴ Ti yeeho buyima me yehe na, mu'ɛ ziŋiliŋ, ti ba bo' bu ba'ara la paŋa, ti a doohe kã'ahɛ suma'ahum timpaberɛ wa zuo za'a yehe, ti la bahɛ ti nɛreba kɔrum taaba. Ba me bo' en la sɔ'kãtɛ.

⁵ En lorege daalehum butã la, mam wum ti bunduma la, ta'a daana la, yi' bahɛ na yeti,“Wa'ana.” Ti mam bihɛ ti yeeho sɔbelegɔ en ze', ti bu ba'ara la zãla magehega bayi' a nu'uhen,

⁶ ti mam wum ti sɛla ana wuu kua la, ze'ele bunvɔɔhi banaahi la zi'an na yɛta yeti, “Makɛ ki la wula ti la dɛna daanyinɛ tuuma yɔɔrɛ, gee dikɛ wambila makɛ kemɔlega ti la dɛna daanyinɛ yɔɔrɛ, gee da sagum olive kaam la, la daam la.”

⁷ En lorege daalehum sebo en pa'ahɛ bu naahi la, mam wum la bunduma la bunaahi daana la en yi' bahɛ na yeti,“Wa'ana.”

⁸ Ti mam bihɛ ti yeeho wugelegɔ en ani biin zɛ'a. Ti bu ba'ara la yu'urɛ yi'ira Kum, ti sageŋɔ dɔla la en. Ti ba bo' ba paŋa, ti ba sɔna timpaberɛ wa puregerɛ bunaahi, la ba kɔrum la su'a, kom, la bã'ahi, la muuen duhi en boi timpaberɛ wa zuo.

⁹ En lorege daalehum bunuu la, mam nyɛ la kaabegɔ bimbine la tiŋa, ti sɛɛhi en de sɛba ti ba kɔrum ba Yinɛ yelehum la zuo la, la ban muulɛ ban nyɛ sɛla la zuo la.

¹⁰ Ti ba kaahɛ la kɔkɛ'ɛŋa yeti, “Gaŋeza'a Daana, Fa'a la Yelemɛŋerɛ Daana, la yeti la yuue la ŋwani gee ti fum gakɛ gee lerege timpaberɛ zuo duma wa en ka'ɛ tumam ziim wa se'em la?”

¹¹ Ti ba bo' ba za'a fupɛɛlega fupɛɛlega, gee yele ba yeti, ba lebe ta gã'arɛ fii wa, gura ti kãlɛ se'ere ti ba yeti ba kɔrum ba tuntuneba tadaanduma la, la ba suurɔ la ti ba yeti ba ku ba nananawa la paaɛ.

¹² En lorege daalehum buyoobe la, mam bihɛ ti tinmiiŋo kãtɛ en sige, ti wuntɛɛŋa wa sobege wuu susageŋɔ fuo la, ti ŋmare pɛɛlega mu'ɛ wuu ziim la,

¹³ ti ŋmarebibehi en boi sagbama zuo ha luta timpaberɛ wa zuo na wuu kinkaŋa ti sabeeo lobe ti ka mu'uro zɔgera se'em la,

¹⁴ ti sagbanɛ wa mɛlum wuu gɔŋɔ en kilum ku mɛŋa se'em la, ti zoore woo, la ko'om tiŋasuka tiŋa wuu mɛlum ka bɔŋa zi'an la.

¹⁵ Ti timpaberɛ wa zuo na'duma, nɛrekãreba, pɛntiireba kpɛ'ɛnduma, nɛrezura, la nɛra woo, da'aberɛ bii se'em en boi fai, za'a zɔta sugera yogero puan, tahi leŋen la zɔya tilan,

¹⁶ gee yi'ira zɔya, la tahi yeti, “Lu ya tu zuo na, lile tu, ti tu da nyɛta se'em daana en zi' na'am kuka kãtɛ la zuo la nɛŋa. Tu da nyɛ Pebila la sunsunyiim la,

¹⁷ se'ere en sɔi la, ba sunsunyiim dabehekãtɛ la paaɛ ya.Ti ani n wan ta'am ze'ele?”