Lilegere 3 - ZE'ELEGO PAALEGA

Sadise tiŋa lageŋɔ sɔɔleŋa

¹ “Suŋera se'em en boi Sadise tiŋa lageŋɔ la puan la ti n guleha bɔ'ɔra. Yetɔgebuna ze'eti la se'em n tari Yinɛ Sɛɛhi siyopɔi la, gee zãla ŋmarebibehi siyopɔi la zi'an na. “Mam mi ya tuuma, ya tari la vɔpa yu'urɛ, gee ya ki mɛ.

² Niiɛ ya, la ya kpemehe sɛla en gee, gee me yɛ'a kum la. Se'ere en sɔi la, mam ka nyɛ ya tuuma la ti a tigɛ Yinɛ ninin.

³ Bala, tɛri ya yan to'e sɛla, la yan wum sɛla la, la ya tara di kankaŋi, gee tee. Ya han ka ihege, n wan wa'am na wuu nageyiga la, ti ya me kan mina sansɛka ti n yɛ'a ya zi'an na.

⁴ Gee la bala za'a, ya kelum tara yu'ura fii wa Sadise tiŋa la puan en ka lirum ba lɔgerɔ. Bama en wan kina la mam, yɛ ba lɔgepeelo, se'ere n sɔi la, ba nari mɛ.

⁵ Ya han nyaŋɛ, ba me wan bagɛ ya la fupɛɛla, ti n kan saalum ya yu'ura vom gɔŋɔ la puan bahɛ. N wan purɛ ya yu'urɛ n Sɔ nɛŋan, la a suŋereba nɛŋan.

⁶ Bahɛ ti se'em en tari tuba, a kɛleha Sia la en yeti se'em bɔ'ɔra lageŋɔ la woo la.

Filadelefiya tiŋa lageŋɔ sɔɔleŋa

⁷ “Suŋera se'em en boi Filadelefiya tiŋa lageŋɔ la puan la ti n guleha bɔ'ɔra. Yetɔgebuna ze'ele la Fa'a daana la, se'em en de yelemɛŋerɛ daana la, zi'an na. Se'em en tari Deviti yire kparehega la, Se'em en yu'ɛ ti se'em ka bɔna yu'ura la, Se'em en yu' ti se'em ka bɔna wan yu'ɛ la.

⁸ “N mi' ya tuuma. Bihɛ yaa, N yu'ɛ la kuleŋa biŋe ya, ti se'em ka bɔna wan yu' ka. Mam mi' ti ya tari paŋa fii wa, gee la bala za'a, ya tari mam yelehum la mɛ suŋa suŋa, ka zagehɛ mam yu'urɛ la.

⁹ Bihɛ ya, n wan iŋɛ Sagena lageŋɔ en yeti bamam dela Yuuduma gee dagena, gee parena la, n wan iŋɛ ba ti ba wa'am na kpa' duma ya nɛŋan, la ba zamehɛ bɔkɛ yeti, mam sirum nɔŋɛ ya.

¹⁰ Yamam en tari mam yelehum la en de sugeri, la ŋmibega la zuo, n wan gu' ya makerɛ se'ere en ye'ehe timpaberɛ wa zuo na ti de makɛ tiŋa wa zuo nɛreba za'a la puan.

¹¹ N ye' la nananawa na. Gurɛ ya yan tari sɛla la kankaŋi, ti se'em da ta faaɛ ya muŋa la.

¹² Ya han nyaŋɛ, n wan iŋɛ ya ti ya dɛna ziirɛ mam Yinɛ pu'uhegɔ yire la puan, kan malum yehe de puan. N wan gulehɛ n Yinɛ la yu'urɛ labelɛ ya, gee gulehɛ n Yinɛ tiŋa la yu'urɛ labelɛ ya, Yerusalɛm paalega la en ze'ele mam Yinɛ la zi'an saazuo ha na la, la mam mɛŋa yu'paalɛ labelɛ ya.

¹³ Bahɛ ti se'em woo en tari tuba, a kɛleha sɛla ti Fa'a Sia la yɛta bɔ'ɔra lageŋɔ la za'a la.

Laodisiya tiŋa sɔɔleŋa

¹⁴ “Suŋera se'em en boi Laodisiya tiŋa lageŋɔ la puan la ti n guleha bɔ'ɔra. Yetɔgebuna ze'ele la se'em en de “Amɛn” la zi'an na. Sakerɛ la yelemɛŋerɛ aze'nyɛ Daana la, se'em en de Yinɛ naaŋɔ la za'a pi'ileŋo daana la zi'an na.

¹⁵ “N mi' ya tuuma. Ya ka ma'ɛ bii ya tula. Mam boti ni ti ya ma'ɛ ni mɛ, bii ya tole ni.

¹⁶ Gee lan de se'em la, yan de ko'bugere la zuo, ka ma'ɛ, gee me ka tula la zuo, mam boi bini ti n tubehɛ ya mɛ n nuuren bahɛ na.

¹⁷ Se'ere en sɔi la, ya yeti, ‘Tu tari mɛ, tu pãrɛ mɛ, ka bɔta sɛla sɛla le yɛ'ɛha.’ Gee ya ka baŋɛ ti ya ku'urɛ mɛ, dita nimbu'ɔ, nameha, fɔ, gee ɛɛra beele.

¹⁸ Bala zuo, mam ka'ani ya mɛ ti, ya wa'am na da' salema sɛ'a ti bugum bi'ihɛ a paaɛ la mam zi'an, la ya dɛna buntateba. Da' ya futo pɛɛla mam zi'an bagɛ pi' ya nyanɛ la, ti nɛreba da nyɛta ya beele la, gee da' tisumɔ mam zi'an tigɛ ya nini, la ya nyɛta suŋa.

¹⁹ Mam taheri gee dɔlegera la sɛba ti n nɔŋɛ la tuba. Bala, mu'ɛ ya nini gee tee.

²⁰ Kelehe ya, mam ze' la kuleŋa la nuuren ŋmɛ'ɛra, se'em han wum mam kua gee yu'ɛ kuleŋa la, n wan kɛ̃ a zi'an na, di la en, ti a me di la mam.

²¹ Se'em daana woo en nyaŋɛ, n wan bo' a daana zi'an ti a bɔna la mam, n na'am kuka la zuo, wuu mam mɛŋa en nyaŋɛ, gee ta zi'a la n Sɔ a na'am kuka la zuo se'em la.

²² Bahɛ ti se'em woo en tari tuba, a kɛleha Fa'a Sia la en yeti sɛla bɔ'ɔra lageŋɔ la za'a la.”