Lilegere 22 - ZE'ELEGO PAALEGA

Vom Kulaa

¹ Ti suŋera wa pa'alɛ mam kulaa sɛka en tari vom ko'om la, ti ka nyagera, ana yilaam, ze'ele Yinɛ, la Pebila la na'am kuka kãtɛ la puan zɔta na,

² dɔla tiŋa la tiŋasuka palɛ la. Ti kulaa wa luga la za'a, vom tia la en ze' bini, wuna wala yima yima, pia la ayi', ŋmarega woo. Ti tia la vɔtɔ dɛna tibegɔ tibera tihi nɛreba.

³ Sɛla en de be'em lɔkɔ kan le puta bilam. Gee na'am kugekãtɛ en de Yinɛ la Pebila la dinɛ la wan bɔna bilam, ti a yamehi la na'aha en.

⁴ Ba wan nyɛ a nɛŋa, ti a yu'urɛ gulehɛ lama ba gbɛ'ɛra.

⁵ Ti yu'uŋɔ kan le bɔna. Nɛreba kan le bɔta bugum bii butolela, bii wuntɛɛŋa. Daana Yinɛ la en wan dɛna ba niihum, ti ba dɛna naduma wuuha ka tara ba'ahegɔ.

⁶ Ti suŋera la yele mam yeti, “Yelehum buna wa dela sakerɛ gee dɛna sira, se'ere en sɔi la, Daana la, Yinɛ se'ere en sɔi nɔtɔgeheba la sɛɛhi la, en tum a suŋera wa na, ti a pa'alɛ a yamehi wa sɛla en yeti la iŋɛ nananawa.”

⁷ “Bihɛ, n kini mɛ kalam kalam na! Sum wan bɔna la fum se'em daana en gurɛ nɔtɔgeheba yelehum la en boi gɔnkuna wa puan la suŋa suŋa.”

Ba'ahegɔ la maalegɔ

⁸ Mam Yɔn, mam de se'em en wum gee nyɛ yele ana wa. Mam wum gee nyɛ a la, mam lu la tiŋa suŋera sɛka en pa'alɛ mam yele ana wa la nama tiŋa ti n na'ahɛ en.

⁹ Gee a yele mam yeti, “Fum dagi fum na'ahɛ mam, mam me dela fum tuntuna tadaana, la fum taaba la, la nɔtɔgeheba la, la sɛba woo en dole gɔnkuna wa yelehum la. Bala na'ahɛ Yinɛ ma'a.”

¹⁰ Ti a yele mam yeti, “Da pi' gɔŋɔ wa purega yelehum wa, se'ere en sɔi la, saŋa la pɔri mɛ.

¹¹ Bahɛ ti se'em en tuni be'em, kelum tuna a be'em, ti se'em en tuni a dɛgerɔ tuuma, kelum tuna a dɛgerɔ tuuma, ti se'em en de tuuntɔɔ kelum vɔna tuuntɔɔ, ti se'em en de tuulum nɛra, kelum vɔna a tuulum vom.”

¹² “ Bihɛ, n kini mɛ kalam kalam na, n tari n yɔɔrɛ mɛ, ti n yɔ nɛra woo en tum se'em.

¹³ Mam n de Alifa, la Omega, yia la pooren, Pɔhega la ba'ahegɔ.”

¹⁴ Sum wan bɔna la sɛba en pee ba futo, bala ti ba wan tara sore ti ba paaɛ vom tia la, gee me ta'am doohe tiŋa la nayahi la puan kɛ̃.

¹⁵ Yiŋa la ha, baahi, sɔ̃niniduma, yaluntuuma duma, nɛrekuureba, la bage kaabereba, la sɛba woo en nɔŋɛ gee tuna pumpɔreŋɔ tuuma en boi bilam.

¹⁶ “La dela mam Yezu en tum n suŋera fum zi'an na, ti a yele fum, lageŋɔ zi'ihi la yɛla. Mam en de nyɛgerɛ la, gee dɛna Deviti yaaŋa la. Mam en de bulika beŋma'arɛ la.”

¹⁷ Sia la, la pɔgeditiga la yeti, “wa'ana.” Bahɛ ti se'em woo en wum yelehum wa yeti, “Wa'am na.” Gee bahɛ ti se'em woo ti ko'nyuuro tari en wa'am na. Bahɛ ti se'em woo en boti, wa'am na to'e vom ko'om wa ti bu dɛna bo'olum bo' en.

¹⁸ N kageri se'em woo en wum gɔŋɔ kuna wa purega wa. Ti se'em han dikɛ sɛla pa'ahɛ bini, Yinɛ me wan dikɛ too seko woo ti a tɔgɛ ku yele gɔŋɔ wa puan la, pa'ahɛ a daana zuo.

¹⁹ Se'em me han yehe sɛla gɔŋɔ wa purega wa puan bahɛ, Yinɛ me wan yehe nɛra eŋa daana tɔtɛ en de se'em vom tia la puan, la tuulum tiŋa la ti ba tɔgɛ ba yele gɔŋɔ wa puan la bahɛ.

²⁰ Se'em daana en nyɛ yele ana wa la yeti, “Yelemɛŋerɛ, n kini la kalam kalam na.” Taari, wa'am na Daana Yezu.

²¹ Daana Yezu zu'uhegɔ, bɔna la nɛresunduma la woo.