Lilegere 2 - ZE'ELEGO PAALEGA

Ɛfisu Lageŋɔ sɔɔleŋa

¹ “Suŋera se'em en boi Ɛfisu lageŋɔ la puan la ti n guleha bɔ'ɔra. Yetɔgebuna dela se'em daana en zãli ŋmarebibehi siyopɔi a zuɔ nu'o puan la, se'em en eere salema butolehi siyopɔi ze'elehi la tiŋasuka la yetɔgum.

² “Mam mi yan tuni se'em, ya namehegɔ la yan tari sugeri se'em ŋmibega puan. Mam mi' ti ya ka ta' ŋmibera la be'em duma, ya magehɛ sɛba en yeti bamam dela Yezu tuntuneba gee dagena la, baŋɛ ti ba pareni mɛ.

³ N me kelum mina ti ya ŋmiberi mɛ la sugeri, gee uhera mam yu'urɛ la zuo, gee me mina ti ya ka taregeri.

⁴ Gee mam tari la yele dina la ya. Ya bahɛ yan daa tari nɔŋerɛ se'ere la mam yia la mɛ.

⁵ Tiɛ ya sɛla en bahɛ ti ya lu la, la ya tee, la ya tuna tuunsɛ'a ti ya daa pun tuna yia la. Han dagena bala, n wan wa'am ya zi'an na dikɛ ya butolela zɛ'ɛlega la ka ze'elego zi'an la, han dagena ya tee mɛ.

⁶ Gee la bala za'a, ya tuunsuma en ŋwana. Ya ka boti Nikolatan duma tuuma la ti ba tuna la, tuunsɛ'a ti mam mɛŋa me pun ka bɔta la.

⁷ Bahɛ ti se'em woo en tari tuba, a kɛleha Fa'a Sia la en yeti se'em bɔ'ɔra lageŋɔ duma la. Se'em woo en nyaŋɛ, N wan bo' en sore ti a di vom tia la wala la en boi Yinɛ vo'ohego zi'an la.

Semirina lageŋɔ sɔɔleŋa

⁸ “N gulehɛ bɔ'ɔra la Suŋera se'em en boi Semirina tiŋa lageŋɔ la puan la. Yetɔgebuna dela se'em en de Pɔhega gee dɛna Ba'ahegɔ, se'em en daa ki gee le vɔna la yelehum.

⁹ “N mi' ya pɔgeleŋɔ, la ya nɔŋɔ, la yan pun tara la za'a. N mi' yu'sageŋɔ seko n paari ya, doohe sɛba en yeti ba dela Yuda buuri gee dagena, gee dɛna Sagena la lageŋɔ yire la.

¹⁰ Da zoti ya dabeem la yan boi bini ti ya namehɛ namehegɔ seko wa. Mini ya suŋa ti bumbe'o la maahum mɛ ti a bahɛ ti ba pagɛ ya sɛba paka deto puan, ti la dɛna makerɛ bo' ya, dabeha pia ti ba wan dikɛ pɔgelum ya. Gee tari ya sakerɛ ta paaɛ kum, gee ti n bo' ya vom muŋa la.

¹¹ Bahɛ ti se'em woo n tari tuba, a kɛleha Fa'a Sia la en yeti se'em bɔ'ɔra lageŋɔ la za'a la. Se'em woo en nyaŋɛ, kum buyi' la kan paaɛ en.

Pɛgamum tiŋa lageŋɔ sɔɔleŋa

¹² “Suŋera se'em en boi Pɛgamum tiŋa lageŋɔ la puan la, ti n guleha bɔ'ɔra. Yetɔgebuna dela se'em daana n tari sɔ'ditega en tari nɔya ayi'.

¹³ “N mi' ya bɔŋa zi'an, la dela zi'an ti Sagena la na'am kuka la bɔna. Gee la bala za'a ya kɔ'ɔm gurɛ mam yu'urɛ la mɛ kankaŋi, gee ka zagehɛ ya sakerɛ la mam, pun ta paaɛ zahera Antipas se'em en daa de mam aze'nyɛ daana, tara sakerɛ la mam, ti ba daa ku en ya tiŋasuka, Sagena la bɔŋa zi'an la.

¹⁴ Gee mam tari la yele dina la ya. Ya tari basɛba ya puan ti ba dɔla Balaam pa'alegɔ la mɛ, se'em en daa pa'alɛ Balake ti a dikɛ sɛla en piti beŋe Izirale buuri la ti ba dita baga dia gee tuna yaluntuuma la.

¹⁵ Bala mɛa ti yamam basɛba me dɔla Nikolatan pa'alegɔ kankaŋi la.

¹⁶ Tee ya. Han dagena bala, n wan wa'am ya zi'an nananawa na, la n zabɛ la ba, la sɔ'ditega la en ze'ele mam nuuren na la.

¹⁷ Bahɛ ti se'em woo en tari tuberɛ, a kɛleha Sia la en yeti se'em bɔ'ɔra lageŋɔ la za'a la. Fum se'em woo en nyaŋɛ, n wan bo' en maana dia la basɛba en dikɛ sugɛ la, gee bo' en maanɛ kugepeele, ti kugere wa zuo, ba gulehɛ la a yu'paalɛ iŋɛ de zuo, yu'se'ere ti se'em ka mina, han dagena fum se'em daana en to'e de la ma'a.

Taitira lageŋɔ

¹⁸ “Suŋera se'em en boi Taitira lageŋɔ la puan la ti n guleha bɔ'ɔra. Yetɔgebuna dela Yinɛ Dayua la, se'em nini en ani wuu bugum peelum la, la se'em nama en nyagere wuu nyɔgum la dinɛ.

¹⁹ “N mi' ya tuuma, ya nɔŋerɛ, ya sakerɛ, ya tuuma, ya sugeri la ya ŋmibega. N mi' ti ya pooren tuuma wa karegɛ gana ya yia tuuma la.

²⁰ Gee mam tari la dina la ya. Ya to'e Yezebɛle mɛ, pɔgesɛka en yi'iri ka mɛŋa nɔtɔgeha la, se'em pa'alegɔ en bahɛ ti mam yamehi bɔregɛ, tuna yaluntuuma, gee dita dia ti ba dikɛ kaabɛ baga la.

²¹ Mam bo' en saŋa mɛ ti a tee, gee a zagehɛ mɛ ka tee a yaluntuuma la puan.

²² Mini ya suŋa, ti n lobere en baha la suŋɔ zuo, ti sɛba me en naaɛ la en tuna kabohi la me, n wan lobe ba bahɛ susageŋɔ kãtɛ puan, han dagena ba tee mɛ yehe ba mɛhi a tuuma la puan.

²³ N wan damɛ a kɔma, ku ba, ti mam lageŋɔ la woo baŋɛ, ti mam en de se'em en mi' puti'ira la suya puan, gee wan bo' nɛra woo a tuuma yɔɔrɛ en nari se'em.

²⁴ Gee ya sɛba woo en gee bɔna Taitira la, ka dɔla Yezebɛle pa'alegɔ la, ka zamehɛ sɛla ti ba yi'ira ti Sagena la tuunkãra la, n yeti yamam yeti, n kan dikɛ zeero seto pa'ahɛ ya,

²⁵ yeen gurɛ ya yan tari sɛla la kankaŋi, gura ti n ta lebe na.

²⁶ Se'em woo en nyaŋɛ, gee kelum tuna mam tuuma la ta paaɛ ba'ahegɔ, N wan bo' en paŋa ti a biha tihi.

²⁷ A wan biha ba la kuto doore, wɔ̃ta ba wuu yɔgerɔ dugerɔ la

²⁸ Wuu mam en to'e paŋa se'em n Sɔ zi'an la, bala mɛa ti se'em daana woo n nyaŋɛ, n wan bo' a daana bulika beŋma'arɛ.

²⁹ Bahɛ ti se'em woo en tari tuberɛ, a kɛleha sɛla ti Fa'a Sia la tɔgera bɔ'ɔra lageŋɔ la za'a la.