Lilegere 19 - ZE'ELEGO PAALEGA

Saazuo Nyɛɛŋɔ

¹ Ŋwana en tole la, ti mam wum ti sɛla ana wuu nɛrekuuŋɔ kuuhi la, tinsuŋan ha, yɛta yeti, “Haleluya! Faarɛ, la suŋa, la kpe'eŋo dɛna tu Yinɛ dinɛ,

² A gakerɛ dela yelemɛŋerɛ la tuuntɔɔ. A gakɛ yiyɛkɛka wa en doohe galum timpaberɛ wa za'a la, a yaalegɔ la mɛ, gee lerege en ka'ahɛ yamehi la ziim la.”

³ Ti kuuhi wa le voole pa'ahɛ yeti, “Haleluya a zu'uhi en bala gulegera ka ba'aha la.”

⁴ Ti kiinduma pihiyi' la banaahi la, la bunvɔɔhi banaahi la, lu tiŋa na'ahɛ Yinɛ en zi' na'am kuka kãtɛ la zuo la yeti, “Amɛn. Haleluya!”

⁵ Ti na'am kuka kãtɛ la puan, kua ze'ele bini na yeti, “Pɛgɛ ya tu Yinɛ la, yamam a yamehi wa woo, yamam sɛba en zoti en wa, tarenduma, la kpɛ'ɛnduma za'a.”

⁶ Ti mam wum ti sɛla ana wuu nɛrekuuŋɔ kuuhi la, damena wuu ko'kiŋɔ en sũni la, damena wuu saa en dameni la, kaaha baha na yeti, “Haleluya! Tu Daana Yinɛ la, Gani za'a Daana la eŋa en de naba.

⁷ Bahɛ ya ti tu nyɛɛna, gee zɛkera a yu'urɛ, gee bo' ya en pɛka, se'ere en sɔi la, Pebila la pɔgedire la paaɛ ya, ti a pɔga la me maahum ka mɛŋa suŋa ba'ahɛ,

⁸ Eŋa ti ba bo' en sore ti a bagɛ a mɛŋa la fusunɔ en nyagere gee pelege,” fusunɔ la dela nɛresunduma la tuuntɔɔ tuuma la.

⁹ Ti suŋera la yele mam yeti, “Gulehɛ dina wa: Sum boi mɛ la sɛba ti ba yi' ba, ti ba wa'am Pebila la pɔgedire zaanuurɛ dia la puan na la.” Gee le yele mam yeti, “Yele dina wa dela Yinɛ mɛŋa yelemɛŋerɛ yetɔgum.”

¹⁰ Ti mam nyaa lu a nama tiŋa ti n na'ahɛ en, gee a yele mam yeti, “Da iŋɛ bala! Mam dela fum tuntuna tadaana bɔna la hɔ, la fum tansugere la en gurɛ Yezu yelehum muulegɔ kankaŋi la. Na'ahɛ Yinɛ! Se'ere en sɔi la, Yezu yelehum la muulegɔ en de purega sia.”

Se'em en yage Yeeho pɛɛlega zuo la

¹¹ Ti mam nyɛ ti tinsuŋan yu'ɛ, ti mam yeti n bihɛ, ti yepɛɛlega en ze bini! Ti se'em en ba' bɔ la yu'urɛ yi'ira Sakerɛ la Yelemɛŋerɛ, a tari la tuntɔɔnɛ gakera nɛreba, gee zabera.

¹² A nini ani mɛ wuu bugum peelum la, ti muhi kekeko vuga a zuo, ti a tara yu'urɛ en gulehɛ lama en, ti se'em kan malum baŋɛ dɛ, han dagena a mɛŋa ma'a.

¹³ A bagɛ la fuo en dikɛ luhɛ ziim puan, ti a yu'urɛ yi'ira Yinɛ yelehum.

¹⁴ Ti tinsuŋan pɛntiireba la, yɛ ba fusunɔ en de pɛɛlega gee nyagera, dɔla se'em en yage yepɛɛlega wa zuo.

¹⁵ Ti su'a ze'ele a nuuren yehe na, sɔ'sɛka ti a wan dikɛ zabɛ tihi nyaŋɛ, sooe si biha la pɛregerɛ. A wan sagum daam ŋmɛkerɛ zi'an la, la Gani za'a Yinɛ wa sunsunyiim tuulɛ.

¹⁶ A fuo zuo, la a gbere zuo, a tari la yu'urɛ ti ba gulehɛ bini yeti, “Naduma naba, la Daanduma Daana.”

Ba nyaŋɛ bunsilemasio la, la a pɛntiireba la

¹⁷ Ti mam nyɛ ti suŋera ayima ze' yintule puan, ya'ɛ la kɔkɛ'ɛŋa yi' niihe woo en ɛgeri saazuo wa yeti, “Wa'am ya na, lagehɛ ya na di Yinɛ zaanuurɛ dikãtɛ ti a maahum.

¹⁸ Wa'am ya na gɔ' naduma ihe nɛnɔ, pɛntiireba nɛhi duma ihe nɛnɔ, pahi duma ihe nɛnɔ, yiiri la i ba'areba ihe nɛnɔ, nɛrawoo nɛnɔ, sɛba en boi fai, la sɛba n de da'aba ihe nɛnɔ, la tarenduma la kpɛ'ɛnduma ihe nɛnɔ.”

¹⁹ Ti mam nyɛ ti bunsilemasio la, la timpaberɛ wa zuo naduma, la ba pɛntiireba, ti ba lagehɛ taaba ti ba tɛ' pɛɛma la se'em en ban' yepɛɛlega la, la a pɛntiireba la.

²⁰ Ti ba nyɔkɛ bunsilemasio la, la a nɔtɔgehe pumparenduma la en daa ze'ele a nɛŋan tum nyalema sɛ'a, pã'ahɛ sɛba en to'e bunsilemasio la daalehum la, la sɛba en na'ahɛ bunsilemasio la naanɛ la. Bana bayi' wa, ba dikɛ ba lobe la voto bahɛ bugum mɔgerɛ la ti tahi bugum dita ka kiŋera la puan.

²¹ Gee ti sɛba woo en gee la, se'em en ban' yepɛɛlega la su'a en kɔrum ba za'a, sɔ'sɛka en ze'ele a nuuren yehe na la. Ti niihe za'a sãɛ di ta siiɛ.