Lilegere 18 - ZE'ELEGO PAALEGA

Babilɔn lua

¹ Lilegere dina en tole la, ti mam nyɛ ti suŋera ayima ze'ele saazuo sigera na tara kpe'eŋo en ka tari makerɛ. Ti timpaberɛ wa za'a niiɛ piim la a suŋa.

² Ti suŋera wa yi' la kɔkɛ'ɛŋa yeti, “Wai wai, a lu ya, a lu ya, Babilɔn en de tinkãtɛ la lu ya! Ka nyaa lebege la kulekpa'bɛ'ɛhi bɔŋa zi'an, Ka dela kulekpa'bɛ'ɛhi se'ehi en fi'ɛ bɔŋa zi'an. Ka dela niihe se'ehi en fi'ɛ bɔŋa zi'an, la bunsɛlebɛ'ɛhi bɔŋa zi'an.

³ Se'ere en sɔi la, a bahɛ ti tihi woo en nyu a yaalegɔ sunsunyiim daam la, ti timpaberɛ wa zuo naduma tum yaluntuuma la en. Ti timpaberɛ wa zuo leebeduma pãrɛ la a tarega la paŋa.”

⁴ Ti mam wum ti kua ka yima ze'ele saazuo na yeti, “Yehe ya a puan na n nɛreba wa, la ya da lagum tum a be'em la, ta lagum to'e a namehegɔ la.

⁵ A be'em la duurum mɛ wuu zoore la, paara saazuo ha. Yinɛ tiɛ a tuure kãra la mɛ.

⁶ Bo' en wuu eŋa en bo' se'em la, lebehe yɔ a be'em la sugum nuuren buyi'. Pirɛ a wanɛ sugum nuuren buyi' la daam kpe'eŋo bo' en wuu eŋa en pirɛ se'em bo' la.

⁷ Wuu eŋa en daa pa'ali a mɛŋa se'em, dɛla se'em fai a na'am puan la, lebehe namehegɔ la susageŋɔ bala mɛa bo' en. Wuu en diŋɛ yele a suuren ti, ‘N dela pɔge naba, n dagi pokuurɛ, susageŋɔ kan malum paaɛ mam la.’

⁸ Bala zuo, la kan yuue la a namehegɔ en sigeri a zuo na; nɔyalegerɛ, la kaahega la kom pɛɛlega. Bugum wan taaɛ en di ta bugehe bugehe. Se'ere en sɔi la, Kpe'eŋo daana la, Daana Yinɛ la en gakeri en la.”

⁹ Ti timpaberɛ wa zuo naduma sɛba en tuni yaluntuuma la en, gee dɛla fai a puan la, wan kɛla gee si'ina a zuo, ba han ta nyɛ en diti bugum ti a zu'uhi gulegera la.

¹⁰ Ba wan zɛ'a zaaɛ zaarɛ ha ti dabeem kɛ̃ ba, la namehegɔ seko en sigeri a zuo la. Ba wan yɛta yeti, “Wai, wai, tinkãtɛ la, Babilɔn tinkãtɛ la. Nananawa ma'a ti gakerɛ dina sige fum zuo ŋwana na.”

¹¹ Ti timpaberɛ wa zuo leebeduma wan kɛla gee si'ina a zuo, se'ere en sɔi la, nɛra ka le da'ara ba lɔgerɔ la.

¹² Ba lɔgerɔ la en de salema, salempɛɛlega, nunɔm zɔtɔ la peranini, tanpɛɛla, tanmɔla, tansaala, tansaalehi mɔlɔ, la dɔsunɔ yima yima, la wɔbenyɛna lɔgerɔ yima yima, la dɔsunɔ lɔgerɔ yima yima, nyɔgum, kuto, la bɔrumbɔlehi kuga,

¹³ sinamɔn tiihi kaam, puuro seto en tari nyɛlum, digelum, la Mɛɛ, nyuuŋo suŋɔ puuro, daam, olive kaam, kisuma zom la mui, nii, piihi, yiiri la yiiri toto, la nɛresaaleba vom ti ba kɔɔha ba da'aba.

¹⁴ “Fum lɔgesuma seto ti fum sia bɔta la woo tole ya gee bahɛ hɔ, ti fum dikãresuma la za'a tole, fum lɔgeseto woo en nyagere la za'a bɔregɛ mɛ gee bahɛ hɔ, kan le malum lebe na.”

¹⁵ Leebeduma sɛba en sɔi lɔge tuna woo la, sɛba en doohe fum puan pãrɛ la za'a wan zɛ'a zaaɛ zaarɛ ha la dabeem, wuŋerɛ se'ere en sigeri fum zuo la, kɛla gee si'ina baha na.

¹⁶ “Wai, wai, tinkãtɛ la, en daa ni bagɛ ka mɛŋa la fusunɔ la, bagɛ ka mɛŋa la fumɔlɔ suma, en gulɛ la salema, bãhi, la peranini,

¹⁷ ti nananawa ma'a ti lɔge tuna woo mɛlum.” Ti uurenɔ kãra kpɛ'ɛnduma, sɛba en tari uurenɔ tuna, la sɛba woo en dole ko'kãtɛ la zuo kɔɔha la za'a ze' la zaaɛ zaarɛ ha,

¹⁸ gee kaaha baha na, ban nyɛ ti a taaɛ bugum dita, ti a zu'uhi gulegera na la. “Tinkani en boi wuna la tinkãtɛ kana wa?”

¹⁹ Gee nyaa vaara tintɔnɔ yɛɛla ba zuto, gee kɛla gee fabela, kaaha vɔɔla yeti, “Aba, aba, tinkãtɛ wa, Fum zi'an ti sɛba woo en tari uurenɔ fum ko'kãra wa zuo, pãrɛ la lɔgerɔ. Gee nananawa ma'a en bala ti tiŋa wa gã'a voore wa.

²⁰ Nyɛɛna ya baha a zuo na saazuo duma wa, yamam nɛresunduma, tuntuneba, la nɔtɔgeheba wa, nyɛɛni ya. Se'ere en sɔi la, Yinɛ gakɛ en mɛ ya zuo.”

²¹ Ti suŋera ayima en de bunkpe'eŋo ɔ̃begɛ kugere en ani wuu nɛɛrɛ kugekãtɛ en ka tari makerɛ la lobe bahɛ ko'kãtɛ puan, gee yeti, “Gbiregere dina taaba en wan lubɛ Babilɔn tinkãtɛ wa ti ka, kan le malum bɔna.

²² Kɔlɔ ŋmɛ'a kan le bɔna, ti baam baanduma, la nyiihe, la benkuna peebego, kan le wuna fum puan le yɛ'ɛha ti se'em daana en mi' koohego kan le bɔna fum puan yɛ'ɛha Nɛɛŋɔ kuga dameŋa, kan le bɔna fum puan yɛ'ɛha.

²³ Butolela bugum niihum, kan le niiɛ fum puan, ti pɔge dita kua, la sire-ɛla kua kan le bɔna fum puan. Se'ere en sɔi la, fum leebeduma la en daa de tiŋa wa zuo nɛrekãreba, ti fum dikɛ fum nini la pã'ahɛ tihi wa za'a.

²⁴ Fum en ka'ahɛ nɔtɔgeheba la, la nɛresunduma la za'a ziim, la sɛba woo ti ba kɔrum ba la su'a timpaberɛ wa zuo la.”