Lilegere 16 - ZE'ELEGO PAALEGA

Yinɛ sunsunyiim laahi

¹ Ti mam wum kɔkɛ'ɛŋa pu'uhegɔ yire la puan ti ka tɔgera bɔ'ɔra suŋereba bayopɔi la yeti, “Kiŋɛ ya ta ka'ahɛ Yinɛ sunsunyiim laahi siyopɔi la bahɛ timpaberɛ la zuo.”

² Ti yia suŋera la kiŋɛ ta ka'ɛ a laa la bahɛ timpaberɛ la zuo, ti nɔtankɛ'ɛhi la nɔre-kãra en dune paaɛ paaɛ sige sɛba woo en tari bunsɛla la daalehum la, la sɛba woo en pu'uheri bunsilemasio la naanɛ la zuo.

³ Ti yi'i suŋera la me kiŋɛ ta ka'ɛ a laa la, bahɛ ateko puan, ti ateko la lebege ana wuu kum ziim la, ti bunvua woo en boi ateko la puan ki.

⁴ Ti ta'a suŋera la wa'am na ka'ɛ a laa la bahɛ mɔga, la kulaahi puan, ti ba ko'om la lebege ziim.

⁵ Ti mam wum ti suŋera sɛka en biheri ko'om la yeti, “Fum dela sira Daana, Fa'a Daana wa, Se'em en de, gee daa pun Dɛna, Se'ere en sɔi la fum gakɛ yele ana wa mɛ.

⁶ Se'ere en sɔi la, bamam en daa kɔrum nɛresunduma la, nɔtɔgeheba la. Fum bo' ba la ziim ti ba nyu. Sɛla en nari ba en bala.”

⁷ Ti mam wum ti kaabegɔ bimbine la kɔkɛ yeti, “Ɛ̃ɛ, Daana Yinɛ, Gani za'a Daana, Fum gakerɛ wa dela yelemɛŋerɛ la tuuntɔɔ!”

⁸ Ti suŋera bunaahi daana la ka'ɛ a laa la bahɛ yintule zuo, ti ba bo' yintule la sore ti a taaɛ nɛreba la bugum.

⁹ Ti wuntɛɛntuulega sirum si'ira ba, ti ba tugum ŋmɛregɛ ka'ara be'em baha Yinɛ yu'urɛ la, se'em en tari namehegɔ yele ana wa paŋa la, gee tugum ka tee ba suya, dikɛ pɛka bo' en.

¹⁰ Ti suŋera bunuu daana la ka'ɛ a laa la bahɛ bunsilemasio la sɔ'ɔlum la puan, ti a sɔ'ɔlum la lebege lika ma'a, ti nɛreba duna ba zɛlehi la wuŋerɛ,

¹¹ gee ka'ara be'em baha Yinɛ se'ere en sɔi saazuo wa yu'urɛ la, ba wuŋerɛ la, la ba nɔra kãra la zuo, gee la bala za'a, ba ka tee ba tuumbe'ero la puan.

¹² Ti suŋera buyoobe daana la ka'ɛ a laa bahɛ Yufaratesi mɔgekãtɛ la puan, ti de ko'om la kiihɛ za'a, ti la ta'am maalɛ sore bo' dapɔya bɔba naduma la.

¹³ Ti mam nyɛ ti sɛfi'iha sitã, en ani wuu lono la, ti kayima ze'ele bunsɛla la nuuren yehe na, ti kayima ze'ele bunsilemasio la nuuren yehe na, ti kayima ze'ele nɔtɔgeha pumparema la nuuren yehe na.

¹⁴ Bana wa dela kulekpa'bɛ'ɛhi se'ehi en tuna kirehi, kina timpaberɛ wa zuo na'kãreba nɛŋan, ti ba lagehɛ ba gura zaberɛ, dabeherɛ kãtɛ la en de Gani Za'a Yinɛ dabeherɛ la puan.

¹⁵ (“Bihɛ ya, n ye' me na wuu nageyiga la! Sum wan bɔna la fum se'em en maahum, yɛ fum lɔgerɔ ka ɛɛra beele ta diihe fum mɛŋa nyanɛ.”)

¹⁶ Ba wan lagehɛ la zi'an ti ba yi'ira Hiburu puan ti Hamagedɔn la.

¹⁷ Ti suŋera buyopɔi daana la ka'ɛ a laa la bahɛ sabeeo puan, ti kɔkɛ'ɛŋa ze'ele pu'uhegɔ yire la puan, na'am kuka kãtɛ la zuo na yeti, “La tum ya.”

¹⁸ Ti bugum nyagera, ti dameŋa damena, ti saa tahera, ti tinmiiŋo kãtɛ sige, tinmiiŋo seko en ka tabelɛ sige timpaberɛ wa zuo, nɛreba en pɔhɛ bɔna timpaberɛ wa zuo daarɛ na. Tinmiiŋo la ba' gaŋɛ mɛ.

¹⁹ Ti tinkãtɛ la bɔgɛ butã, ti tihi woo tinkãra wɔ̃rɛ. Ti Yinɛ tiɛ tinkãtɛ Babilɔn yele, bo' en daam wanɛ en de a sunsunyiim kãtɛ daam .

²⁰ Ti tihi se'ehi en boi ko'kãra tiŋasuka la mɛlum, ti zoore la deyina me ka bɔna,

²¹ ti saa kuga kãra en tibegɛ gana nɛɛrɛ kugere ze'ele saazuo ha ka'ara baha nɛreba la zuo na, tara tara ti nɛreba la ta pɔta be'em baha Yinɛ yu'urɛ la zuo, saa kuga la zuo. Bã'ahi sina ba' tara la dabeem.