Lilegere 15 - ZE'ELEGO PAALEGA

Suŋereba sɛba en tari ba'ahegɔ namehegɔ tuyopɔi la

¹ Ti mam nyɛ yele tinsuŋan ha, yele n karegɛ gee yalegɛ nuurɛ. Suŋereba bayopɔi en tari namehegɔ tuyopɔi, en de ba'ahegɔ namehegɔ. Bama en wan tum ba'ahɛ Yinɛ sunsunyiim la.

² Ti mam nyɛ ti sɛla niiɛ na, ana wuu ateko la, gee dɛna salema nyagera, ti bugum gɛregɛ ko'om la puan. Ti sɛba en nyaŋɛ bunsilemasio la, ka pu'uhɛ a naanɛ la, ka to'e a yu'urɛ la, la a kãlɛ la, nyaa zɛ'a salema ateko wa nuuren, pɛga kɔlɔ ti Yinɛ dikɛ bo' ba.

³ Ti ba nyaa yuuna Moose en de Yinɛ yameŋa yuunɛ la, la Pebila la yuunɛ la yeti, “Fum tuuma karegɛ mɛ gee dɛna pakerɛ, Daana Yinɛ kãtɛ wa. Fum sadɔtɔ za'a dela tuuntɔɔ la yelemɛŋerɛ, tihi wa za'a naba wa.

⁴ Daana, ani en kan zɔta fum, gee na'aha fum yu'urɛ wa? Se'ere en sɔi la, fum ma'a en de Fa'a. Tihi za'a wan wa'am fum nɛŋan na, na'aha hɔ, se'ere en sɔi la, fum tuuntɔɔ tuuma la za'a niiɛ mɛ na.”

⁵ Dina pooren ti mam bihɛ, ti pu'uhegɔ yire wa tanɛ deo la en de aze'nyɛ deo bɔna tinsuŋan la yu'ɛ,

⁶ ti tanɛ deo wa puan, ti suŋereba bayopɔi la ze'ele bini yehe na la bã'ahi siyopɔi, yɛ fupeelo n nyagere, ti salema tama paga ba nyu'urɔ zuto.

⁷ Ti bunvɔɔhi banaahi la ayima, bo' suŋereba bayopɔi wa, salema laahi siyopɔi en pirɛ la Yinɛ sunsunyiim, Yinɛ se'ere en vɔi wuuha wuuha la.

⁸ Ti pu'uhegɔ yire la pirɛ la zu'uhi en ze'eti Yinɛ suŋa la puan na, la a paŋa la puan na, ti se'em ka bɔna wan kɛ̃ pu'uhegɔ yire la puan, gura ti bã'ahi siyopɔi la ti suŋereba bayopɔi la tara la ta tum ba'ahɛ.