Lilegere 14 - ZE'ELEGO PAALEGA

Pebila la la nɛre tuha kɔbega, la tuha pihinaahi la anaahi la

¹ Ti mam bihɛ, ti pebila la en bala, zɛ'a Zaayɔn Zoore la zuo! Ti sɛba en boi la en la dela, nɛre tuha kɔbega la tuha pinaahi la tuha anaahi la ti ba gulehɛ Pebila la yu'urɛ la a Sɔ yu'urɛ labelɛ ba gbɛ'ɛra.

² Ti mam wum ti kua ze'ele tinsuŋan na, sũna wuu kulaahi ko'om en sũni la, gee tahera wuu saa en taheri la. Kua la ti mam wum la ani mɛ wuu kɔ̃len-ŋmɛ'ɛreba en ŋmɛ'ɛri ba kɔlɔ la.

³ Ti ba yuuna yuum paalɛ na'am kuka kãtɛ la, la bunvɔɔhi banaahi la kiinduma la nɛŋan. Ti nɛra ka bɔna mina yuunɛ la, han dagena tuha kɔbega la tuha pinaahi la anaahi la ma'a ti ba yɔ to'e ba timpaberɛ wa zuo la.

⁴ Nɛrebana wa ka galum ba mɛhi la pɔgehi, se'ere en sɔi la, ba daa dela burakaha. Bana en dole Pebila la zi'an woo ti ka yɛ'a. Ba yɔ to'e ba mɛ saaleba woo puan ti ba dɛna wala diina bo' Yinɛ, la Pebila la,

⁵ ti pumpɔreŋɔ ka tabelɛ ze'ele ba nɔyan na, ba ka tari gbelegere zi'an.

Suŋereba batã yelehum

⁶ Ti mam nyɛ ti suŋera ayima ɛgeri sagbama wa zuo, tara faarɛ yelehum la en ka tari ba'ahegɔ la, ti a muulɛ bo' sɛba en vɔi timpaberɛ wa zuo, tiŋa woo, buuri woo, la tugum woo, la nɛreba woo.

⁷ Ti a yele la kɔkɛ'ɛŋa yeti, “Zoti ya Yinɛ, gee bo' ya en pɛka, se'ere en sɔi la, a gakerɛ saŋa la paaɛ ya. Me na'ahɛ ya en, eŋa se'em en naam saazuo la tiŋa, ko'kãtɛ, la kulaahi, ko'om zi'ihi woo la.”

⁸ Ti suŋera ayima, en pa'ahɛ buyi' la, me dɔla yeti, “A lu ya, Babilɔn paŋadaana la lu ya! A bahɛ ti tihi woo nyu a yaalegɔ sunsunyiim daam la mɛ.”

⁹ Ti suŋera ayima, butã daana me dɔla na, kaaha la kɔkɛ'ɛŋa yeti, “Sɛba woo en na'ahɛ bunsilemasio la, la ka naanɛ la, gee to'e ka daalehum ba gbɛ'ɛran bii ba nu'uhen la,

¹⁰ ba me wan nyu Yinɛ sunsunyiim daam la en ka'ɛ iŋɛ Yinɛ sunsunyiim wula puan, ti sɛla ka gɛregɛ bɔ la. Ba wan nyɛ namehegɔ bugum puan, la tahi bugum puan, Fa'a suŋereba la nɛŋan, la Pebila la nɛŋan.

¹¹ Ti ba namehegɔ zu'uhi kɔ'ɔm gulegera zɔna saazuo ka tara ba'ahegɔ. Vo'ohego ka boi, beyiine, bii yu'uŋɔ bɔ'ɔra sɛba en na'ahɛ bunsilemasio la, la a naanɛ la, la se'em woo en to'e bunsilemasio la daalehum la en de a yu'urɛ la.”

¹² Ŋwana yi'iri la nɛresunduma la ti ba ŋmibe, la sɛba woo en tari Yinɛ nuurɛ la, gee gurɛ Yezu sakerɛ la kankaŋi la.

¹³ Ti mam wum kua tinsuŋan la, ti ka yeti, “Gulehɛ dina wa biŋe yeti, Yehe zina yɛ'a ha, Sum wan bɔna la sɛba woo en ki Daana la sore dɔlega puan.” Sia la yeti, “Ɛ̃ɛ, Ba wan vo'ohe ba namehegɔ la puan, se'ere en sɔi la, ba tuuma la wan dɔla ba.”

Timpaberɛ wa buŋa

¹⁴ Ti mam bihɛ nyɛ ti sagbanɛ peele niiɛ na, ti se'em en zi' de zuo la wuna la Asaala Dayua la, ti salema muŋa vuge a zuo, ti kɛɛrega en diti bɔna a nu'en!

¹⁵ Ti suŋera ayima ze'ele pu'uhegɔ yire la puan yehe na, yi' se'em daana en yage sagbanɛ la zuo la, la kɔkɛ'ɛŋa yeti, “Dikɛ fum kɛɛrega la kɛ̃, se'ere en sɔi la kɛ'a saŋa la paaɛ ya. Beni zuo, timpaberɛ wa zuo dia la bi'ɛ mɛ.”

¹⁶ Bala ti se'em en zi sagbanɛ la zuo la, lobege a kɛɛrega la timpaberɛ wa zuo na, kɛ̃ timpaberɛ wa zuo filam.

¹⁷ Ti suŋera ayima le ze'ele tinsuŋan pu'uhegɔ yire la puan yehe na, me zãla kɛɛrega n diti.

¹⁸ Ti suŋera ayima me ze'ele nyɔ'a daka la bɔba yehe na, ti suŋera sɛka en tari bugum paŋa la, yi' la kɔkɛ'ɛŋa bo' se'em en zãli kɛɛrega la en diti la yeti, “Dikɛ fum kɛɛrega la en diti la kɛ̃ tiihi wala timpaberɛ wa zuo za'a, se'ere en sɔi la, si wala la bi'ɛ mɛ.”

¹⁹ Ti suŋera la lobege a kɛɛrega la timpaberɛ wa zuo na, kɛ̃ tiihi wala za'a, ka'ɛ ba iŋɛ daam ŋmɛkerɛ boko kãtɛ en de Yinɛ sunsunyiim daam boko la puan .

²⁰ Daam boko wa me boi la tiŋa la yiŋa ha, ti ziim ze'ele daam ŋmɛkerɛ boko wa puan ɔkera, paara yeeho gareŋenɛ, zɔta yɛ'a wuu miila kɔbehi siyi.