Lilegere 13 - ZE'ELEGO PAALEGA

Bunsilemasio bayi' la

¹ Ti mam nyɛ ti bunsilemasio ihege ko'kãtɛ wa puan, tara iila pia, la zuto tuyopɔi, ti muŋa vuge iilɛ woo, gee ti ba gulehɛ tuurɛ yu'ura labelɛ a zuo woo.

² Bunsilemasio sɛka ti mam nyɛ la ani mɛ wuu yeeobaa la, ti a nama ana wuu saheŋa nama, ti a nuurɛ ana wuu gbigenɛ nuurɛ la. Ti bunsɛla la bo' en a paŋa, la a na'am la, la a kpe'eŋo kãtɛ la.

³ Ti bunsilemasio wa zuo la kuyima ana wuu ba pɔgelum mɛ yɛ'a kum, gee ti pɔgeleŋɔ kɛka la wa'am na bɛ'e. Ti timpaberɛ wa nɛreba za'a dɔla bunsilemasio wa la pakerɛ.

⁴ Ba na'aheri bunsɛla la mɛ, la eŋa en dikɛ a kpe'eŋo kãtɛ la bo' bunsilemasio la, gee na'aha bunsilemasio la me yeti, “Ani en boi ana wuu bunsilemasio wa, ani en boi wan ta'am zabɛ la ka?”

⁵ Ti ba bo' bunsilemasio wa nuurɛ se'ere en tɔgeri yele kãra, la tuurɛ kãra. Ti ba bo' en sore ti a dikɛ a paŋa la tum ŋmarehi pihinaahi la siyi.

⁶ Ti bunsɛla wa ya'ɛ a nuurɛ tuura Yinɛ, tuura a yu'urɛ la, la a tanɛ pu'uhegɔ yire la, la sɛba woo en boi tinsuŋan ha la.

⁷ Ti ba me le bo' en sore ti a zabɛ la nɛresunduma la nyaŋɛ ba. Ba bo' en la kpe'eŋo ti a sɔna buuri woo, la nɛreba woo, la tugum woo la tihi woo.

⁸ Ti nɛreba woo en boi timpaberɛ wa zuo wan na'aha en. Se'em woo yu'urɛ en ka gulehɛ iŋɛ vom gɔŋɔ la gee ti ba baŋɛ naam timpaberɛ wa la, gɔŋɔ wa dela pebila wa gɔŋɔ, pebila sɛka ti ba kɔregɛ la.

⁹ Bahɛ ti se'em woo en tari tuba, a kɛleha.

¹⁰ La han dɛna la ba nyɔgɛ ya, ba nyɔgere ya yɛ'a mɛ, ya han ku mɛ la su'a, su'a en kuuri ya. Ŋwana dela sɛba en de nɛresunduma la, ya ŋmibera, gee sɛ zɛ'a ya sakerɛ la puan.

Bunsilemasio buyi' daana

¹¹ Ti mam le nyɛ ti bunsilemasio kayima me tahɛ timpaberɛ wa zuo yehe na, tara iila ayi' wuu pebila iila la, ti a kua ana wuu bunsɛla la.

¹² Ti a tum yia bunsilemasio la pahi la za'a bo' yia bunsilemasio la, bahɛ ti timpaberɛ wa zuo nɛreba za'a, na'aha yia bunsilemasio la, se'em nɔre-kɛka en be'ɛ la.

¹³ Ti yi'i bunsilemasio wa tum kirehi kãra, ta pun bahɛ ti bugum ze'ele saazuo ha lu timpaberɛ wa zuo na, timpaberɛ wa nɛreba za'a ninin.

¹⁴ Ti doohe la kirehi wa ti ba bo' sore ti a ze'ele yia bunsilemasio la na'arɛ tum bo' en la, ti a nyaŋɛ pã'ahɛ timpaberɛ wa zuo nɛreba za'a, yɛta ba yeti, ba maalɛ yia bunsilemasio la ti su'a pɔgelum en gee ti a sina gee vɔna la naanɛ,

¹⁵ ti bunsilemasio wa bo' naanɛ la vo'ohum, ti naanɛ wa pun tana tɔgera, gee kuura sɛba en ka sakɛ ba na'aha bunsilemasio wa naanɛ la.

¹⁶ Gee ti naanɛ wa doohe nɛra woo, bumbila la bunkutɛ, buntata la naha, se'em en boi fai, la da'aberɛ za'a daalɛ ba zuɔ nu'uhi, bii ba gbɛ'ɛra,

¹⁷ ti se'em ka bɔna wan ta'am da' bii koohe sɛla gee ka tara bunsilemasio la daalehum la . Daalehum la en de bunsilemasio la yu'urɛ, bii a yu'urɛ la kãlɛ.

¹⁸ Yɛm en nari ka'lam. Bahɛ ti se'em en tari yɛm lagum bunsilemasio wa kãlɛ la, se'ere en sɔi la, de dela nɛresaala kãlɛ. Kãlɛ la dela kɔbehi siyoobe, la pihiyoobe la buyoobe.