Lilegere 12 - ZE'ELEGO PAALEGA

Pɔka, la bunsɛla lilegere

¹ Ti daalehum kãtɛ niiɛ saazuo ha, ti pɔka yɛ wuntɛɛŋa wa wuu futo la, ti ŋmarega bɔna ka nama tiŋa, ti ka vuga muŋa en de ŋmarebibehi pia la siyi.

² Ti pɔka wa tara puurɛ, virege kaaha la too, kɔ'ɔm wula ti ka dɔgɛ.

³ Ti daalehum kãtɛ bu yima me niiɛ saazuo ha, ti bunsɛla kãtɛ mɔlegɔ kuyima niiɛ na, tara zuto tu yopɔi, la iila pia, vuge muhi siyopɔi zuo kuyina kuyina woo.

⁴ Ti a zuurɛ ve'e ŋmarebibehi buyina puregerɛ butã puan saazuo ha bahɛ timpaberɛ wa zuo na. Ti bunsɛla wa nyaa zɛ'a pɔka wa en boi bini ti ka dɔgɛ wa nɛŋan, ti a obe bia la, ka han kɔ'ɔm lu na.

⁵ Ti pɔka la dɔgɛ bi budibela en yeti ka dɛna tihi wa za'a naba, la ka tara kuto doore biha ka nɛreba. Gee bia wa en ta luta na la, ba zɛ ka mɛ tɔ', tari ka kiŋɛ Yinɛ zi'an, Yinɛ na'am kuka la zuo.

⁶ Gee ti pɔka la zɔ kɛ̃ muuen ha, ta nyɛ zi'an ti Yinɛ pun maahum biŋe ka, ti ka bɔna bilam ti ba biha ka suŋa suŋa ta paaɛ dabeha tuhere, la dabeha kɔbehi siyi, la dabeha pihiyoobe.

Maikɛl nyaŋɛ bunsɛla la

⁷ Ti zaberɛ kɔ' Yinɛ yire ha, ti Maikɛl, la Yinɛ suŋereba la zabera la bunsɛla la. Ti bunsɛla la, la a suŋereba la me zabera lɛbeha na,

⁸ gee ba daa nyaŋɛ ba mɛ, ti zi'an ka le bɔna tinsuŋan la ha bo' ba.

⁹ Ti ba lobe bunsɛla kãtɛ wa bahɛ timpaberɛ wa zuo na. Se'em en de diimen diimen zugɔ la ti ba yi'ira Sagena la Sitaani, se'em en pa'aheri tiŋa wa zuo za'a nɛreba la. Ba lobe en bahɛ la timpaberɛ wa zuo na, lagum lobe a suŋereba la, la en bahɛ na.

¹⁰ Ti mam wum kɔkɛ'ɛŋa saazuo la ha en muuli yeti, “Nananawa ti Faarɛ, la paŋa, la Yinɛ sɔ'ɔlum la, la Kiresta, kpe'eŋo la saŋa nyaa paaɛ. Se'ere en sɔi la, ba lobe se'em en zuuheri tu suurɔ la, bahɛ mɛ. Se'em en daa zuuheri ba bulika la yu'uŋɔ tu Yinɛ wa nɛŋan la.

¹¹ Gee ba nyaŋɛ en mɛ la Pebila la ziim la, la ba nuurɛ yetɔgum, se'ere en sɔi la, ba daa ka fabele ba vom yele, la kum nɛŋan me.

¹² Bala zuo, nyɛɛna, tinsuŋan wa, la yamam sɛba en boi bini la. Gee yele kãtɛ boi timpaberɛ wa, la ko'kãtɛ wa zuo, la Sagena la en sige ya puan na, la sunsunyiim kãtɛ la, Se'ere en sɔi la, a mi' ti a saŋa ka wugɛ.”

Bunsɛla la zabɛ timpaberɛ wa zuo

¹³ Bunsɛla wa en ta baŋɛ ti ba lobe en bahɛ la timpaberɛ wa zuo na la, ti a pɔhɛ pɔka la en dɔgɛ bibudibela la dika.

¹⁴ Gee ba bo' pɔka wa la tugeho kãtɛ kelumpagehi siyi, ti ka ɛkɛ piiɛ bunsɛla la, kɛ̃ muuen ha, ta bɔna zi'an ti ka wan bɔna ti ba biha en suŋa suŋa ta paaɛ saŋa, la sahi la saŋa girego.

¹⁵ Ti bunsɛla wa ɔkɛ ko'om a nuuren na, ti bu zɔta wuu kulega la, digera pɔka wa, ti bu di pɔka wa.

¹⁶ Gee timpaberɛ en suŋɛ pɔka la, doohe la tiŋa la ya'ɛ mɛ vole kulaa la ti bunsɛla la ɔkɛ a nuuren bahɛ na la.

¹⁷ Ti bunsɛla la suure nyiie la pɔka la, ti a lebe, ta kɔ' zaberɛ la pɔka la kɔma basɛba la, sɛba en dole Yinɛ nuurɛ, gee tari Yezu yɛla la.

¹⁸ Ti bunsɛla la ba' a mɛŋa ze'ele ko'kãtɛ tintombi'ihego la puan.