Lilegere 11 - ZE'ELEGO PAALEGA

Aze'nyɛduma bayi'

¹ Ti ba nyaa dikɛ doore en tara mageha la, bo' mam gee yele mam yeti, “Wa'ana magehɛ Yinɛ pu'uhegɔ yire wa, la kaabegɔ nyɔ'a daka la, la sɛba en pu'uheri ku puan la,

² gee da makɛ zinzaka la en boi pu'uhegɔ yire la yiŋa ha la. Bahɛ bilam, se'ere en sɔi la, ba dikɛ bilam bo' la sɛba en dagi Yuda buuri nɛreba, ti ba niira tuulum tiŋa wa puan ŋmarehi pihinaahi la siyi.

³ Gee n wan bo' n aze'nyɛduma bayi' la paŋa, ti ba dɔla puta dabeha tuhere, la dabeha kɔbehi siyi, la dabeha pihiyoobe, yɛ susageŋɔ futo.”

⁴ Bana bayi' wa en de olive tiihi siyi, la butolela ze'elehi siyi la en ze' Daana se'em en sɔi timpaberɛ wa nɛŋan la.

⁵ Ti se'em han yeti a daam ba, bugum wan ze'ele ba nɔyan na di ba dinduma. Se'em woo en yeti a daam ba, wan ki la kum buna taaba.

⁶ Ba tari kpe'eŋo n wan yu' sagbama ti saa da ni, ba purega saŋa la puan, gee me tara kpe'eŋo la ko'om woo, wan ta'am bahɛ ti ko'om woo lebege ziim, gee bahɛ ti tooro yima yima to'e timpaberɛ wa zuo za'a, bamam en boti se'em ma'a.

⁷ Ba han purɛ ba yelehum la ba'ahɛ, bunsilemasio la en ze'ele tiŋa tiŋa yoko la puan dooe na la, wan kɔ' zaberɛ la ba, nyaŋɛ ba, ku ba,

⁸ ti ba ki ti ba ihi la gã'a sore zuo, tinkãtɛ sɛka ti ba ze'ele ti ba yi'ira ka Sodom la Igipiti la, zi'an ti ba tabelɛ kpa' ba Daana la bini la.

⁹ Dabeha atã la girego, ti nɛreba, la ba suurɔ, buuri yima yima, la tugum yima yima, la tihi nɛreba wan kina limeha kum la, gee zagehɛ ti ba kan pi' ba yɔɔ seko puan.

¹⁰ Ti timpaberɛ wa zuo nɛreba wan nyɛɛna la ba kum la, bɔ'ɔra taaba bo'olum, se'ere en sɔi la, nɔtɔgeheba bana ba yi' wa daa ba kpa' la timpaberɛ wa zuo nɛreba za'a nyɔya.

¹¹ Gee dabeha atã la girego la en tole la, vo'ohum n tari vom en ze'ele Yinɛ zi'an na kɛ̃ ba, ti ba ihege, ti sɛba woo en nyɛ ba la, dabeem kãtɛ en kɛ̃ ba.

¹² Ti ba wum ti kua kɛ'ɛŋa ze'ele saazuo na yele ba yeti, “ Zom ya ka'lam na!” Ti ba zɔna saazuo sagbanɛ puan, ba dinduma la ninin.

¹³ Sankaŋa puan, ti tinmiiŋo kãtɛ damɛ, ti tiŋa la yiya puregerɛ pia lu, ti nɛreba tuha ayopɔi ki, tinmiiŋo la puan, ti dabeem kɛ̃ sɛba en yee la, ti ba dikɛ pɛka bo' Yinɛ en sɔi saazuo ha la.

¹⁴ Yi'i yele la tole ya. Bihɛ ta'a yele la me kɔ'ɔm yɛ'a la nananawa na.

Tintanɛ buyopɔi

¹⁵ Ti suŋera buyopɔi daana la peebe a tintanɛ la, ti kuuhi kekeko ze'ele saazuo ha vɔɔla baha na yeti, “Tiŋa zuo sɔ'ɔlum la nyaa dela tumam Daana la dinɛ la a Kiresta la dinɛ, eŋa en wan dɛna ka naba, wuuha wuuha.”

¹⁶ Ti kiinduma pihiyi la banaahi la en zi' ba na'am kugehi zuto Yinɛ nɛŋan la, lu tiŋa aliko na'ahɛ Yinɛ,

¹⁷ yuuna yeti, “Tu bo' fum fara fara, Gani za'a Yinɛ wa, Se'em en de, gee daa pun dɛna, Se'ere en sɔi la, fum dikɛ la fum pankãtɛ la, pɔhɛ bihera tiŋa wa

¹⁸ Tihi se'ehi en ka dole fum ihege la suure, gee fum leregere saŋa en ŋwana. Saŋa la paaɛ ya ti fum gakɛ sɛba woo en ki la, la fum yɔ fum yamehi la en de fum nɔtɔgeheba la, la fum nɛresunduma la, la sɛba woo en daa pu'uheri fum yu'urɛ la, ba tarenduma, la kpɛ'ɛnduma za'a, gee me sagum sɛba woo en daa sagum timpaberɛ wa la.”

¹⁹ Ti Yinɛ pu'uhegɔ yire la en boi saazuo ha la yu'ɛ, ti nɔpu'ulegɔ daka la zɛ'a pu'uhegɔ deo la puan, ti bugum nyagera, ti dameŋa damena, ti saa tahera, ti tiŋa miina, ti sakuga kãra ka'ara na.