Lilegere 10 - ZE'ELEGO PAALEGA

Suŋera se'em n tari gɔŋɔ pika la

¹ Ti mam nyɛ ti suŋera paŋa daana ayima ze'ele saazuo ha sigera na, ti sagbama pi' en, ti gumatia tahɔ yula a zuin, ti a nɛŋa nyagera wuu wuntɛɛŋa la, ti a nama ana wuu bugum la.

² Ti a zãla gɔŋɔ pika a nu'en ti ku yu'ɛ. Ti a dikɛ a zuɔ na'arɛ tagelɛ ko'kãtɛ wa zuo, gee ti a gɔbega na'arɛ bɔna doone na, tinkɛ'ɛŋa zuo.

³ Ti a tahɛ la paŋa wuu gbigenɛ en taheri la. Ti en tahɛ la, ti saahi siyopɔi uhe bahɛ na.

⁴ Ti saahi siyopɔi la en uhe bahɛ na la, ti mam bɔna bini ti n gulehɛ, gee mam wum la kua saazuo na en yeti, “Sugɛ saahi siyopɔi wa en yele sɛla la, gee da gulehɛ de biŋe.”

⁵ Ti suŋera sɛka ti mam nyɛ ti a na'arɛ deyima bɔna ko'kãtɛ puan ti deyima bɔna doone na la, Zɛkɛ a zuɔ nu'o tɔ saazuo ha,

⁶ gee pɔ se'em en boi wuuha wuuha ha wa se'em en naam saazuo la sɛla woo en boi ba puan ha, la timpaberɛ wa la sɛla woo en boi ka zuo, la ko'kãtɛ la puan, la sɛla woo en boi bu puan yeti, “ Gu'uŋɔ ka le bɔna,

⁷ gee dabeha sɛ'a ti suŋera buyopɔi daana la wan peebe a tintanɛ la, Yinɛ yele se'ere en sugɛ la wan wa'am yelemɛŋerɛ na, wuu en muulɛ de se'em doohe a yamehi la en de nɔtɔgeheba puan se'em la.”

⁸ Ti kua sɛka ti mam pun wum ni ti ka tɔgɛ saazuo bahɛ na la, le tɔgɛ bo' mam na yeti, “ Kiŋɛ la fum ta to'e gɔŋɔ la en lakɛ bɔna suŋera se'em na'arɛ deyima en boi ko'kãtɛ la puan ti deyima me bɔna doone la zi'an.”

⁹ Bala ti mam kiŋɛ suŋera wa zi'an, ta yele en ti a bo' mam gɔŋɔ pika la, ti a yele mam yeti, “To'e la fum obe. Ku wan tɔna fum puuren, gee za'ahum wuu seero la fum nuuren.”

¹⁰ Bala ti mam to'e gɔŋɔ pika la suŋera la nu'en obe ku, ti ku za'ahum wuu seero la mam nuuren, gee mam obe ku vole la, ku tɔi mɛ mam puuren ha.

¹¹ Ti ba nyaa yele mam yeti, “ Fum dela fum le purɛ bahɛ nɛreba kekeko zuo, la tihi, la yetɔgum buuri buuri, la na'duma zuto.”