Lilegere 1 - ZE'ELEGO PAALEGA

Pɔhega la pu'uhegɔ

¹ Yezu Kiresta lilegere, ti Yinɛ lilege bo' en, ti a pa'alɛ a da'aba, sɛla en wan ba'ahum iŋɛ nananawa. A niiɛ dɛ doohe la en tum a suŋera, a yameŋa Yɔn zi'an na la.

² Yɔn wa dela se'em en muuli Yinɛ yelehum, gee pa'ala Yezu Kiresta yele, ta ta' la eŋa en nyɛ sɛla woo se'em la.

³ Sum boi mɛ la fum se'em en kãalɛ yelehum wa yɛla la kɔkɛ'ɛŋa, ti sum bɔna la sɛba woo me en kelehe bu gee tara sɛla woo en gulehɛ bɔna gɔŋɔ wa puan la. Se'ere en sɔi la, saŋa la pɔri mɛ.

⁴ Mam Yɔn en gulehɛ bɔ'ɔra lageŋɔ tuyopɔi la en boi Esiya tiŋa puan la. Zu'uhegɔ bɔna la ya, ti suma'ahum en ze'ele se'em daana en de, gee daa dɛna, la se'em en ye' na la, la sɛɛhi siyopɔi la en ze' a na'am kuka la nɛŋan la,

⁵ la Yezu Kiresta en de yelemɛŋerɛ aze'nyɛ daana la, dɛna ki'induma bikiima la, dɛna timpaberɛ wa zuo naduma naba la. Eŋa se'em en nɔŋɛ tɔ, gee faaɛ tɔ tu be'em puan bahɛ, la a mɛŋa ziim la,

⁶ gee iŋɛ tɔ ti tu dɛna sɔ'ɔlum, gee dɛna malema duma, tuna bɔ'ɔra a Yinɛ la Sɔ la, eŋa ti na'ahegɔ la kpe'eŋo dɛna a dinɛ wuuha wuuha. Taari.

⁷ Bihɛ ya! Eŋa en bala bɔna sagbama puan kina na la. Niho woo wan nyɛ en pun ta ta' sɛba en daa lu' en la. Eŋa en kinɛ na la zuo, buuri woo en boi timpaberɛ wa zuo wan kele. Lan yeti la ana se'em en bala. Taari.

⁸ “Mam en de Alifa la Omega”, Daana Yinɛ la en yele. Se'em en de, se'em en daa de, la se'em en wan wa'am na la. Gani za'a Daana la.

Kiresta lilegere

⁹ Mam Yɔn, ya suuɔ, se'em la yamam en lagum bɔna Yezu puan, lagum nyɛ namehegɔ, a sɔ'ɔlum la, la a sugeri ŋmibega la, n wa bɔna la tiŋa en boi ko'om tiŋasuka ti ba yi'ira ka Patimose, mam muuli Yinɛ yelehum la, la mam en de Yezu aze'nyɛ daana la zuo.

¹⁰ Mam wa bɔna la Sia puan Daana dabeherɛ la puan, gee wum n pooren, ti kua kɛ'ɛŋa en ani wuu tintanɛ en peeberi la,

¹¹ yɛta mam yeti, “Gulehɛ iŋɛ gɔŋɔ puan, sɛla ti fum nyɛ wa, la fum bo' lageŋɔ tu yopɔi la. Bo' Ɛfisu, bo' Semirina, bo' Pɛgamum, bo' Tiyatira, bo' Sadise, bo' Filidelefiya gee bo' Laodisiya.”

¹² Ti mam ŋmɛregɛ ti n bihɛ nyaa ani kua en bala tɔgɛ bo' mam la, ti mam ŋmɛregɛ la, mam nyɛ la salema butolela ze'elehi siyopɔi,

¹³ ti ze'elehi wa tiŋasuka, mam nyɛ la nɛra ayima ti a ana wuu Asaala Dayua la, yɛ fuwoko, ti salema tanɛ gabegɛ a nyu'ɔ.

¹⁴ Ti a zuo, zonto kɔ'ɔm pelege, fari wuu gunguno la, pelege wuu sakuga la, ti a nini ana wuu bugum peelum la,

¹⁵ ti a na'tala wa nyakera wuu nyɔgum ti ba sɛ' bugum puan paaɛ paaɛ ti ba nyakera se'em la, ti a kua ana wuu kulaa kãtɛ ko'om en sũni la.

¹⁶ A zuɔ nu'o puan, a zãli la ŋmarebibehi siyopɔi, ti a nuurɛ puan, su'a en diti, tara nɔya ayi' en yeheri na, ti a nɛŋa kpikera wuu wuntɛɛŋa en ba' kpikera se'em la.

¹⁷ Mam nyɛ en la, mam lu la a nama tiŋa wuu n ki mɛ la. Gee ti a dikɛ a zuɔ nu'o pagelɛ mam zuo gee yeti, “Da zɔta dabeem, Mam en de Pɔhega, la Ba'ahegɔ.

¹⁸ Mam de se'em en vɔi la. Mam yuum ki mɛ, gee bihɛ, n vɔi mɛ wuuha wuuha. Mam en tari kum, la ki'intiŋa kparehega la.

¹⁹ Nananawa, gulehɛ sɛla ti fum nyɛ, sɛla en iŋɛ wa, la sɛla en wan iŋɛ ŋwana pooren.

²⁰ Han dɛna sugelum yele se'ere en boi ŋmarebibehi siyopɔi wa ti fum nyɛ n zuɔ nu'o wa puan wa, la salema butolela ze'elehi siyopɔi la, ŋmarebibehi siyopɔi la ze'ele bo' la Lageŋɔ tuyopɔi la Suŋereba.Ti ze'elehi siyopɔi me ze'ele bo' Lageŋɔ tuyopɔi la.