Hiburuduma 9 - ZE'ELEGO PAALEGA

Tiŋa zuo la saazuo Pu'uhegɔ zi'ihi

¹ Nananawa, yia nɔpu'ulegɔ la yuum tara la malema, ti ba dɔla na'aha Yinɛ, timpaberɛ zuo pu'uhegɔ zi'an.

² Se'ere en sɔi la, ba ti' yia tanɛ la mɛ, ti yia bɔ'ɔ la puan butolela zɛ'ɛlega bɔna de puan, ti teebula ti boroboro se'ere en kaaberi bɔ'ɔra Yinɛ la paga de zuo; ti ze'kana wa yu'urɛ yi'iri fa'a zi'an.

³ Ti tama la en yule beŋe deo seko en pa'ahɛ buyi' la, deo kuŋɔ yu'urɛ yi'iri Fa'a Saraa.

⁴ Ti sɛla en ze' bini dela nyuuŋo digelum nyɔ'a daka la, la nɔpu'ulegɔ tuulum daka la, ti salema dikɛ kaaɛ ka luga la za'a la, salema kaleŋa bɔna ka puan la maana dia la, la Aron kurego doore la en yuum puue puuro la me bɔna ka puan, ti kuge lama la ti ba gulehɛ ze'elego la iŋɛ a zuo la me bɔna ka puan;

⁵ ti tuulum daka wa zuo, kelumpagehi duma en nyagere en yage ka zuo, tɔ taaba pi' sugeri dia zi'an la. Yele ana wa tu kan ta'am pa'alɛ a yɛla vuurɛ paaɛ paaɛ nananawa.

⁶ Ban maahum yele ana ba'ahɛ la, ti malema duma la kɛ̃'ɛra daarɛ woo yia bɔ' la puan na, ti ba malena ba malema la;

⁷ gee malema kiima la ma'a en ki'ire saraa la puan gee buyina yuunɛ woo puan, tara ziim ti a kaabɛ bo' a mɛŋa, la nɛreba la be'em sebo ti ba tum gee ka mina la.

⁸ Ŋwana ti Fa'a Sia la pa'alɛ yeti, sadɔɔ seko en dole kɛ̃'ɛra saraa la puan la nan ka yu'ɛ, yia tanɛ deo la en nan kelum zɛ'a la.

⁹ Ŋwana dela daalehum bɔ'ɔra zina beere wa, ti bo'olum bu'a, la kaabegɔ kaabera kan ta'am bahɛ ti na'ahereba la puti'ira bi'ɛ kahegɛ,

¹⁰ gee la yeen dɛna la dia la nyua, la ko'om sua malema yima yima, la kiha sɛ'a en dikɛ bo' ingɔŋɔ, gura sansɛka en wan ta ze'ele sɛla woo suŋa la.

¹¹ Gee Kiresta en wa'am na la a dela malema kiima bo' yelesuma sɛ'a n wa'am na bɔna doohe tanɛ yire n ka tari makerɛ dɛna yire n ba'ahɛ yire (ti asaala nu'uhi ka maalɛ la, en dagi timpaberɛ wa zuo la),

¹² a kɛ̃ la buyina za'a za'a Fa'a Saraa wa puan, ka tari buuhi la nagebibehi ziim, gee a mɛŋa ziim, n ze'ele bo' faarɛ en ka tari ba'ahegɔ.

¹³ Han dɛna ti buuhi la lɔlehi ziim, la nagepole tampɛgelum la en tari miiha sɛba en galum la zuo, ti la pɛɛra ba ingana, duuhe ba la,

¹⁴ Ŋwani ti Kiresta ziim la kan tum gaŋɛ bala zo'e zo'e se'em en doohe Sia sɛka en ka tari ba'ahegɔ la puan, kaabɛ a mɛŋa fa'a kaabegɔ bo' Yinɛ la. Ziim buna wan sirum pee tu puti'ira yehe kum tuuma puan, tari tu lebe ti tu na'aha Yinɛ Vɔa wa!

¹⁵ Dina wa zuo ti a dɛna nupu'ŋmɛ'ɛra bo' nɔpu'ulepaalɛ la, ti bala ti sɛba ti ba yi' la wan ta'am to'e nɔbiŋere lɔkɔ la en ka tari ba'ahegɔ la. Se'ere en sɔi la, kum n ki to'e ba, ba tuure la en daa boi yia nɔpu'ulegɔ la puan la.

¹⁶ Zi'an ti nɔpu'ulegɔ biŋe, la dela nɔpu'ula la ki gee ti nɔpu'ulegɔ la nyaa tuna.

¹⁷ Se'ere en sɔi la, nɔpu'ulegɔ la wan pɔhɛ tuna la nɛra la en ki, de ka tuni se'em ma'a ti nɔpu'ulegɔ la nan vɔna la.

¹⁸ Ŋwana zuo, yia nɔpu'ulegɔ la yuum ka makɛ tuna, ti ziim ka ka'ɛ.

¹⁹ Se'ere en sɔi la, Moose yuum muulɛ nɔze'elego la woo mɛ bo' nɛreba la doohe pa'alegɔ la en de se'em la ba'ahɛ, gee nyaa dikɛ nagebibehi, la buuhi ziim, la ko'om la gunguno mɔlegɔ, la nyunhunyuuŋa tuhe bini, nyaa dikɛ miihi gɔŋɔ la mɛŋa, gee miihi nɛreba la za'a,

²⁰ gee yɛta yeti, “Nɔpu'ulegɔ la ziim en ŋwana ti Daana la maahum bo' ya.”

²¹ Bala mɛa ti a dikɛ ziim la miihi tanɛ deo la, la lɔge seto woo ti ba tari na'ahera la.

²² Yelemɛŋerɛ, pa'alegɔ la puan, sɛla woo peere mɛ la ziim, ti ziim han ka ka'ɛ, sugeri dia ka boi bo' be'em.

Kiresta kaabegɔ la en saalum be'em

²³ Bala ti la daa nara ti saazuo lɔgerɔ la ti ba tɔgehɛ maalɛ la, ba duuha ba la malema ana, gee saazuo lɔgerɔ la mɛŋa nari la kaabegɔ seko en gani ŋwana.

²⁴ Se'ere ni sɔi la, Kiresta ka kɛ̃ la pu'uhegɔ deo seko ti saaleba nu'uhi mɛ, yeen dɛna yelemɛŋerɛ deo la ti ba tɔgehɛ, gee a kɛ̃ la tinsuŋan mɛŋa puan ha, ti a bɔna Yinɛ nɛŋan nananawa, tumam zuo.

²⁵ Bii a kaabera a mɛŋa tulena wuu malema kiima la en ni kɛ̃ Fa'a Saraa la puan buyina yuunɛ woo, tara ziim en dagi a mɛŋa ziim se'em la;

²⁶ la ha deni bala, a ye wan nameheri mɛ tulena, pɔhera tiŋa wa pi'ileŋo puan na la. Gee lan de se'em la, a wa'am la buyina za'a za'a ba'ahegɔ saŋa buuri wa puan, ti a fooe be'em bahɛ, doohe a dikɛ a mɛŋa kaabɛ.

²⁷ Wuu lan gã' se'em bo' saaleba ti ba wan ba'ahum ki mɛ buyina, gee kum la pooren, gakerɛ en boi la,

²⁸ bala mɛa ti Kiresta, en kaabɛ a mɛŋa buyina bo' nɛreba zo'e zo'e be'em la ba'ahɛ, a wan le niiɛ na buyi' puan na, dagi a le zabɛ la be'em, gee a faaɛ sɛba en ani kɛli gura en la.