Hiburuduma 8 - ZE'ELEGO PAALEGA

Nɔpu'ule suŋɔ nupu'ŋmɛ'ɛra

¹ Yeledaa sɛka en boi tumam en yeti sɛla wa puan dela dina wa. Tu tari la malema kiima en boi a tɔka, se'em en zi' Gani za'a Daana la na'am kuka la zuɔ nu'o saazuo ha,

² dɛna Yinɛ tuntuna saraa la puan, yelemɛŋerɛ kaabegɔ paka sɛka ti Daana la mɛŋa, gee dagi saaleba ti' la.

³ Ba loore Malema kiima woo ti a kaabera la bo'olum kaabegɔ, gee ti la me dɛna ti malema kiima kana wa mɛŋa me ni tara sɛla na kaabɛ.

⁴ La han deni la timpaberɛ wa zuo yɛla, a pun kan ta'am deni malema daana, se'ere en sɔi la, malema duma pun bɔna mɛ kaabera bo'olum kaabegɔ la wuu ze'elego la en pa'alɛ se'em la.

⁵ Bama na'aheri Yinɛ la tanɛ deo seko puan ti asaala mɛŋa ti', gee dɛna saazuo pu'uhegɔ yire la yinyiligo la. Se'ere en sɔi la, Moose en yuum ta maahena ti a ti' pu'uhegɔ tanɛ deo wa la, Yinɛ yuum kagɛ en mɛ yeti, “Bihɛ suŋa la fum ti' de sɛla woo wuu mam magehɛ de se'em pa'alɛ hɔ zoore la zuo la.”

⁶ Gee nananawa Yezu to'e la tuunɛ en gani ŋwana, pun nyaa ta dɛna nupu'ŋmɛ'ɛra nɔpu'ulegɔ en gani ŋwana paaɛ paaɛ la puan, nɔpu'ulegɔ en yage nɔbiŋere en gani ŋwana zuo.

⁷ Se'ere en sɔi la, yia nɔpu'ulegɔ la yuum han ka tari ni tuure, la ka le pakɛ ni ti ba le ɛɛra nɔpu'ulegɔ buyi.

⁸ Yinɛ yuum nyɛ la tuure la yia nɔpu'ulegɔ la puan en sɔi ti a yuum yeti, “Dabeha sirum kini na, Daana la en yele, ti n wan pu'ulɛ nɔpaalɛ la Iziraleduma wa, la Yuuduma wa,

⁹ ti de kan ana wuu mam yuum pu'ulɛ nɔse'ere la ba yaabeduma la, daan se'ere daarɛ ti mam tari ba la n mɛŋa nu'o ze'ele Igipiti tiŋa yehe na la. Se'ere en sɔi la, ba yuum ka dole mam nɔpu'ulegɔ la, bala, ba yele yuum ka pakɛ mam. Daana la en yele se'em n bala.

¹⁰ Nɔpu'ulegɔ kuna ti mam wan pu'ulɛ la Iziraleduma wa, dabeha aŋa han ta tole, Daana la en yele, “N wan dikɛ n nɔze'elego la iŋɛ ba puti'ira puan, gee gulehɛ a iŋɛ ba suya puan, dɛna ba Yinɛ, ti ba dɛna mam nɛreba.

¹¹ Ti ba kan le pa'ala taaba, bii yɛta ba mabia yeti, ‘Baŋɛ Daana la,’ se'ere en sɔi la, ba woo wan mina mam, ze'ele ba bumbila ta paara ba nɛre kãtɛ.

¹² Se'ere en sɔi la, n wan zɔ ba tuure la nimbu'ɔ, gee kan le tɛra ba be'em la.”

¹³ Yinɛ en tɔgeri “nɔpu'ulepaalɛ” yele la, pa'alɛ ti, yia nɔpu'ulegɔ la dela kɛka. Ti sɛla en kuregɛ ki nuga, kan yuue gee mɛlum.