Hiburuduma 6 - ZE'ELEGO PAALEGA

¹ Bala zuo, bahɛ ya ti tu kiŋɛ nɛŋa bi'ihɛ suŋa suŋa, tu bahɛ pi'ileŋo pa'alegɔ ti ba pun pa'alɛ tu yia Kiresta puan pooren, da le bahɛ ya ti tu le tagehɛ ɛberɛ iibegɔ, la en de tu tee kum tuuma, tu tara sakerɛ Yinɛ puan,

² ko'omsua yɛla, nu'uhi pagelegɔ yɛla, kum vo'ore yɛla, la ba'ahegɔ gakerɛ yɛla.

³ Tumam wan iŋɛ sɛla en bala, Yinɛ han bo' tu sore.

⁴ Se'ere en sɔi la, la kpe'em mɛ ti ba le maahum nɛrebana wa ti ba le tee. Bama sɛba en tabelɛ nyɛ niihum, tabelɛ lem saazuo bo'olum la, tabelɛ tɔrɛ Fa'a Sia la.

⁵ Bama sɛba en tabelɛ nyɛ sum sebo en boi Yinɛ yelehum puan la, gee me mina Yinɛ paŋa n wan ta ana se'em saŋa en kini na,

⁶ gee han sina gee lu, ba mɛhi en boti se'em, ba malum kpa'ara la Yinɛ dayua la en bala, malum diihera en nyanɛ nɛrekuuŋɔ nɛŋan.

⁷ Samanɛ se'ere en nyuuri saa ko'om en niira baha de zuo saŋa woo la, gee maala disuŋa bɔ'ɔra sɛba en kɔɔri de la, to'ore la maalegɔ Yinɛ zi'an.

⁸ Gee samanɛ la han yɛhera gu'uhi la tuntuuro, de ka tari vuurɛ, ka zaaɛ ba pɔ bahɛ de zuo, ti de ba'ahegɔ ta dɛna la ba nyɔ' dɛ.

⁹ La tumam en pun tɔgera ŋwana wa la, n sunɔŋerɛ duma wa, tu mi' suŋa suŋa ti yelesuma en gani ŋwana boi ya puan mɛ. Yelesuma sɛ'a en de faarɛ yɛla.

¹⁰ Yinɛ dagi se'em n ka bo'ori buurɔ. A kan mum a nini la ya tuuma la, la ya nɔŋerɛ la ti ya pa'alɛ a yu'urɛ zuo la, doohe la yan bihɛ nɛresunduma la se'em, wuu yan kelum ita se'em wa la.

¹¹ Tu boti ya ayima ayima woo me pa'alɛ la ninmu'urɛ dinɛ taaba, la ya ta'am nyɛ beere puti'irɛ za'a za'a, ta paaɛ de ba'ahegɔ.

¹² Bala ti se'em kan bukɛ, gee ya wan tɔgehɛ sɛba woo en doohe sakerɛ, la ŋmibega puan ta to'e Yinɛ en biŋe nuurɛ ti a iŋɛ se'ere la.

Yinɛ nɔbiŋere ka yuure

¹³ Yinɛ en yuum biŋe nuurɛ la Aberaham la, en yuum ka tari se'em en gani eŋa mɛŋa ti a wan pɔ a daana la, a yuum pɔ la a mɛŋa,

¹⁴ yeti, “ Yelemɛŋerɛ, n wan iŋɛ fum sum, n wan bahɛ ti fum wi'ɛ.”

¹⁵ Bala ti Aberaham me yuum tari sugeri ŋmibera la, a yuum sirum ta to'e nɔbiŋere la mɛ.

¹⁶ Saaleba ni pɔ la se'em n gani ba. Pɔrɛ han diŋɛ pɔ, ti ba dikɛ sɛla taaɛ pɔtɛ la, nɔkpe'ene woo ba'ahɛ ya.

¹⁷ Bala mɛa ti Yinɛ en daa ta bɔta ti a pa'alɛ ti la niiɛ bo' sɛba en wan ta sooe sɔna a nɔbiŋere la en de a naanɛ se'ere en ka malum tɛɛra la, a pɔ la pɔtɛ ti de dɛna daalehum,

¹⁸ ti la doohe yele sɛ'a ayi' en ka teere puan, yele sɛ'a puan ti deyima dɛna Yinɛ kan ta'am parum la, tumam sɛba en sugɛ a zi'an la wan nyɛ inkpeŋere kankaŋi ta'am to'e putɛ'se'ere ti a dikɛ biŋe tu la.

¹⁹ Tu tari la putɛ'dina, ti de ana wuu ɛberɛ kãtɛ, la tiŋasuka nyuuŋa la bo' tumam sɛɛhi. Beere puti'irɛ se'ere en kɛ̃ saraa la puan ha, tama la en lu yula la pooren ha la,

²⁰ zi'an ti Yezu dɛna nɛŋa daana bini tumam zuo, kɛ̃ bini, dɛna malema kiima kɔ'ɔm yɛ'a ha, doohe Mɛlekizɛdɛki la.