Hiburuduma 5 - ZE'ELEGO PAALEGA

¹ Malemaduma kiima woo ti ba looe en saaleba puan, ba ni bahɛ ti a sɔna la yelesɛ'a en de Yinɛ yɛla biheri bɔ'ɔra saaleba. A kaabera bo'olum, gee kaabera be'em zuo.

² A dela nɛre ma'ma', ana bããlam gee maala ba yɛmka'alum, la ban kini buta la, eŋa mɛŋa en boi tɔregɔ nu'uhen la zuo.

³ Ti ŋwana zuo ti la dɛna a ni kaabɛ a mɛŋa be'em zuo yia, gee nyaa kaabɛ bo' nɛreba la me.

⁴ Nɛra ka dikeri na'ahegɔ kuna bɔ'ɔra a mɛŋa, gee a ni to'e de mɛ Yinɛ han yi' en wuu Aron ti a yi' se'em la.

⁵ Bala mɛa ti Kiresta yuum ka dikɛ na'ahegɔ kuna bo' a mɛŋa ti a dɛna malema kiima, gee se'em en looe en la en yeti, “Fum dela mam Dayua, Zina mam de fum sɔ”;

⁶ wuu en le tɔgɛ gɔŋɔ la zi'an kayima se'em yeti, “Fum dela malema daana kɔ'ɔm yɛ'a ha, doohe Mɛlekizɛdɛki la.”

⁷ Yezu en yuum boi timpaberɛ wa zuo, a inganɛ puan la, a yuum dikeri la pu'uhegɔ, la suhega la kɔkɛ'ɛŋa la nintam bɔ'ɔra se'em daana en wan ta'am faaɛ en kum puan bahɛ la, ti a ni kelehe en, a Yinɛ zoolum la zuo.

⁸ La en pun dɛna Dayua la, a zamehɛ naŋa mɛ, en namehɛ sɛla woo puan.

⁹ Ti en doohe ŋwana woo puan tole la, a nyaa bi'ɛ kahegɛ mɛ, a nyaa dela se'em puan ti vomkan ba'ahɛ faarɛ bɔna bo' sɛba woo en nane en la.

¹⁰ Ŋwana ti Yinɛ en yehe en ti a dɛna malema kiima doohe Mɛlekizɛdɛki.

Lua ninmu'urɛ kã'aŋɔ

¹¹ Yele deni wa puan, tu tari la yɛla zo'e zo'e en wan yele, gee a pa'alegɔ en tɔi, yan ka bɔkerɛ kalam kalam la zuo.

¹² La sankana ti ya deni ya dɛna pa'aleba la, ya kelum bɔta la nɛra le pa'alɛ ya pɔhega yele sɛ'a en boi Yinɛ yelehum la puan. Ya boti la bi'ihum gee dagi di kpe'ene.

¹³ Se'ere en sɔi la, se'em woo en mɔgeri bi'ihum kelum dɛna la bilia, ka mina tuuma tuuntɔɔ vom yɛla puan.

¹⁴ Gee dikpe'ene dela sɛba en bi'ɛ kahegɛ bunɔ, sɛba en nyɛ kpemehego tuuma puan, tana wɛleha be'em la sum la.