Hiburuduma 4 - ZE'ELEGO PAALEGA

Yinɛ vo'ohego nɔbiŋere

¹ Bala zuo, vo'ohego puan kɛ̃'a nɔbiŋere la en kelum bɔna la, bahɛ ya ti tu biha tu mɛhi suŋa, ti ya se'em da ta yaa koŋe a paaɛ vo'ohego la.

² Asira, faarɛ yelehum la wa'am tumam zi'an na wuu bumɔ en yuum wa'am bamam zi'an se'em na la. Gee yelehum la ti bamam yuum wum la, yuum ka bo' ba nyuurɔ, beni zuo, ba yuum ka naaɛ taaba ba sakerɛ puan, la sɛba en yuum kelehe yelehum la.

³ Se'ere en sɔi la, tumam sɛba en sakɛ la, kɛ̃ vo'ohego la puan mɛ wuu Yinɛ en yele se'em yeti, “Wuu mam sunsunyiim puan ti n pɔ yeti, Ba kan makɛ kɛ̃ mam vo'ohego la puan” la, la eŋa en pun tum sɛla woo ba'ahɛ tiŋa wa pi'ileŋo puan ha la.

⁴ Zi'an kayima gɔŋɔ la puan, la tɔgɛ dabeha ayopɔi la yele yeti, “Ti Yinɛ vo'ohe dabeha ayopɔi daarɛ la, a tuuma la woo puan.”

⁵ Le yɛ'ɛha, ze'kana mɛa puan yeti, “Ba kan kɛ̃ mam vo'ohego la puan.”

⁶ Bala vo'ohego la en kelum yu'ɛ bo' basɛba ti ba kɛ̃ la, ti sɛba en yuum pɔhɛ to'e faarɛ yelehum wa yia la koŋe ba kɛ̃ mɛ ban ka nane la zuo,

⁷ bala zuo ti a le yehe la dabeherɛ ze'ele, yi'ira dɛ “Zina”, yuum tɔgɛ de yele doohe Deviti puan, pooren pooren na Yetɔge sebo en yuum pun tɔgɛ gã'a yeti, “Zina, ya han wum Yinɛ kua, Da kãbɛ ya suya.”

⁸ Se'ere en sɔi la, Yosua yuum han bo' ni nɛreba wa la vo'ohego, Yinɛ kan le tɔgeri ni pooren, dabeherɛ deyima yele.

⁹ Bala, vo'ohego dabeherɛ kelum bɔna mɛ bo' Yinɛ nɛreba.

¹⁰ Beni zuo, Sɛba en kɛ̃ Yinɛ vo'ohego la puan la, me ni vo'ohe ba tuuma puan mɛ wuu Yinɛ en vo'ohe se'em a tuuma za'a puan la.

¹¹ Bala, bahɛ ya ti tu tiregɛ ya suŋa suŋa la tu ta'am kɛ̃ vo'ohego wa puan, ti se'em da bɔna ya puan lu doohe ka nam wuu bamam en yuum ka nam se'em la.

¹² Yelemɛŋerɛ, Yinɛ yelehum la vɔi mɛ gee tuna, dita gana su'a en tari nɔya ayi' la, ni ŋmaaɛ vo'ohum la ta paaɛ sia la, la inganɛ zi'an woo, ta ta' la kɔba, la a tomehego zi'ihi woo la sɛla en boi kuba la puan ha za'a. Yelehum la mi' suure puan ti'ihegɔ woo mɛ la de maaheŋɔ woo.

¹³ A nɛŋan, sɛla ka boi sugɛ, gee sɛla woo ze' la beele, gã'a kpaii, se'em daana ti tu wan ta yele en tu yɛla za'a la ninin.

Yezu dela malema kiima kãtɛ

¹⁴ Lan de ti tu tari la malema kiima kãtɛ en kɛ̃ tinsuŋan la, dɛna Yezu, Yinɛ dayua la, bahɛ ya ti tu gurɛ tu sakerɛ yelehum la kankaŋi.

¹⁵ Se'ere en sɔi la, tu ka tari la malema kiima sɛka en ka zoti tu tɔregɔ nimbu'ɔ, gee tu tari la se'em en nyɛ mageha sadɔseko woo puan wuu tumam la, gee a ka tum be'em.

¹⁶ Bala zuo, bahɛ ya ti tu paaɛ ya Yinɛ na'am kuka la nɛŋan ti zu'uhegɔ bɔna la, la sukpe'ene, la tu ta'am to'e a nimbɔ'zɔrɛ la, nyɛ zu'uhegɔ, ti la suŋɛ tɔ sansɛka woo n nari.