Hiburuduma 2 - ZE'ELEGO PAALEGA

Yinɛ paŋa Faarɛ Kãtɛ

¹ Bala, tu dela tu iŋɛ tube wuŋa la sɛla ti tu wum la, la tu da bɔregɛ yehe de puan.

² Ti, yelehum sebo en yuum muulɛ doohe suŋereba puan la yuum han tara tibehum, ti bu tuure, la tube-kpirega woo tɔ'ɔra namehegɔ kãtɛ,

³ ŋwani ti tu wan ta'am piiɛ, tu han zagehɛ faarɛ kãtɛ dina wa? Tu wum bu yele yia la Daana la mɛŋa zi'an, ti sɛba en wum bu a mɛŋa nuuren la me yele tu ti bu dela bala,

⁴ ti Yinɛ mɛŋa en de aze'nyɛ daana la ba, la nyalema la kirehi, la paŋa tuuma yima yima, doohe Fa'a Sia la bo'olum la ti a tɔrɛ bo' doohe a mɛŋa sumboolum la.

Se'em en tari to faarɛ

⁵ Lan de se'em la dela,Yinɛ ka dikɛ tinsɛka en ye' na, ti tu tɔgera ka yele wa, iŋɛ suŋereba la nu'uhen.

⁶ Gee nɛra ayima en tɔgɛ gɔŋɔ la puan zi'an kayima yeti, “Asaala dela beni ti fum ba' tɛra ba yele bala, Bii a dela ani me, ti fum ba' tara ba bala?

⁷ Fum iŋɛ en ti saŋa fii wa, a da zuna la suŋereba. Fum vugele en la suŋa, la na'ahegɔ muŋa,

⁸ dikɛ sɛla woo biŋe a nama tiŋa.” Yinɛ en dikɛ sɛla woo biŋe a nama tiŋa la, a ka gee sɛla bahɛ ti la ka bɔna a nu'uhen. Gee lan de se'em la dela, tu nan ka nyɛ ti sɛla woo bɔna a nu'uhen,

⁹ gee tu nyɛ Yezu, se'em ti saŋa fii wa, Yinɛ iŋɛ en ti a bɔna suŋereba la tiŋa, gee nananawa nyaa vuge suŋa la na'ahegɔ muŋa doohe a namehegɔ kum la zuo, ti Yinɛ zu'uhegɔ la zuo,Yezu wan lem kum bo' nɛra woo.

¹⁰ La daa dela ma'a, ti Yinɛ se'em en sɔi, la se'em puan ti sɛla woo bɔna la, en boti a tari nɛreba zo'e zo'e wa'am suŋa puan na la zuo, a bahɛ ti se'em en de ba faarɛ nɛŋa daana la bi'ihɛ a mɛŋa kahegɛ namehegɔ puan.

¹¹ Beni zuo, se'em en peere la, la sɛba be'em ti a pee la, za'a ze'ele la zi'an kayina na. Beni zuo, a ka tari valum, ti a yi' ba a suurɔ,

¹² bala ti a yeti, “Mam wan muulɛ fum yu'urɛ bo' n suurɔ la, “Lageŋɔ la puan, mam wan pɛgɛ hɔ.”

¹³ Le yɛ'ɛha, a yeti, “Mam wan delum la eŋa.” A me le yeti, “Mam en ŋwana, la kɔma sɛba ti Yinɛ dikɛ bo' mam la.”

¹⁴ Lan yi de ti, kɔma la za'a dela inganɛ la ziim la, eŋa Yezu mɛŋa me wa'am na ana mɛ wuu bamam la, ti a ta'am doohe kum puan sagum se'em en tari kum paŋa la. Sagena la en bala,

¹⁵ gee faaɛ sɛba woo vom saŋa woo en boi yamenɛ puan doohe ban zoti kum la zuo.

¹⁶ La kɔ'ɔm niiɛ mɛ gã'a, ti Yezu ka wa'am na ti a suŋɛ la suŋereba, gee a tugum wa'am na ti a suŋɛ la Aberaham yaahi.

¹⁷ Bala zuo,Yezu dela a lebege ana wuu a suurɔ la sɛla woo puan, la a dɛna nimbɔ'zɔta, la sakerɛ malema kiima, Yinɛ tuuma la puan, la a kaabera be'em duuhego kaabegɔ bɔ'ɔra nɛreba la.

¹⁸ Beni zuo, eŋa mɛŋa nyɛ la makerɛ, a namehegɔ la puan, a wan ta'am suŋɛ sɛba woo en nyɛti makerɛ la.