Hiburuduma 13 - ZE'ELEGO PAALEGA

Tuunsɛ'a en tigeri Yinɛ nini

¹ Bahɛ ya ti suuɔ nɔŋerɛ yee saŋa woo.

² Da zagehɛ ya tɔ'ɔha saama, gee sɛba iŋɛ la bala ta to'ohe suŋereba gee ka baŋɛ.

³ Tɛri ya sɛba en boi paka deen la yele, wuu ya lagum bɔna la paka deen la ba la, sɛba ti ba mɛleha ba la, wuu yamam mɛhi ti ba mɛleha la.

⁴ Bahɛ ya ti pɔgedire la sire-ele tara na'ahegɔ ya za'a zi'an, ti pɔgedire la sire-ele suŋɔ la da galum, se'ere en sɔi la, Yinɛ wan gakɛ yaluntuuma duma, la kabohi duma mɛ.

⁵ Tari ya ya vom suŋa ti bu da kɛ̃ ligenɔŋerɛ puan, gee bahɛ ya ti ya nini tigɛ la sɛla ti ya tara. Se'ere en sɔi la, a yele tu yeti, “N kan malum bahɛ ya, bii n zagehɛ ya.”

⁶ Ŋwana zuo la, tu wan ta'am yele gee ti dabeem ka tara tɔ yeti, “Daana la en de mam suŋera, N kan zɔta dabeem. Beni ti nɛra wan ta'am iŋɛ mam?”

⁷ Tɛra ya nɛheduma, sɛba en tɔgɛ Yinɛ yelehum la bo' ya la. Bihɛ ya ban daa vɔi ba vom se'em, la ya tɔgehɛ ba sakerɛ la.

⁸ Yezu Kiresta dela bala mɛa zaam, zina, la saŋa woo.

⁹ Da bahɛ ya ti pa'ali yooro yima yima ziira ya kaara zi'an woo, se'ere en sɔi la, la ani suŋa ti zu'uhegɔ kpemehe suure la, nyana dia kihega yɛla, yele sɛ'a en ka suŋɛ sɛba en dole a la.

¹⁰ Tumam tari la kaabegɔ bimbine se'ere ti sɛba en ze' tanɛ deo la puan kaabera la ka tari sore ti ba dita kaabegɔ dia la.

¹¹ Se'ere en sɔi la, duhi se'ehi ziim ti malema kiima la tari kɛ̃ Fa'a saraa la puan ti bu dɛna be'em duuhego kaabegɔ la, ba ni nyɔ' si la tiiheŋɔ la yiŋa ha.

¹² Bala zuo ti Yezu namehɛ tiŋa la yiŋa ha, ti a pee nɛreba be'em la a mɛŋa ziim.

¹³ Bahɛ ya ti tu kiŋɛ ya a zi'an tiiheŋɔ la yiŋa la ha, la tu ta lagum di nyanɛ se'ere ti a ŋmibe de puan la.

¹⁴ Tiŋa wa zuo, tu ka tari tinsɛka n wan bɔna wuuha, gee tu biheri la tiŋa sɛka n ye' na la.

¹⁵ Doohe eŋa puan, yi bahɛ ya ti daarɛ woo, tu bɔ'ɔra Yinɛ tu na'ahegɔ kaabegɔ en de tu nɔgbama wala ti tu puta a yu'urɛ la.

¹⁶ Da zagehɛ ya ti ya tuna sum, gee tɔta yan tari sɛla la taaba, gee kaabegɔ kuna taaba en tigeri Yinɛ nini.

¹⁷ Nane ya ya nɛhi duma, gee sigehe ya mɛhi bo' ba, gee bamam en biheri ya vom, gee wan ta yele ban tuni se'em. Bo' ya ba sore ti ba tuna ba tuuma la nyɛɛma gee dagi ba si'ina. La han ana bala, ya kan nyɛ nyuurɔ.

¹⁸ Pu'uhi ya bɔ'ɔra tɔ, gee tumam mi' ti tumam tari la putɛ'sunɛ, ti tu suure bɔta ti tu tuna la yelemɛŋerɛ sɛla woo puan.

¹⁹ N yeti ya mɛ la ninmu'urɛ, ti ya tuna ŋwana wa gana sɛla woo, ti n ta'am le lebe ya zi'an kalum na.

Pu'uhegɔ

²⁰ Nananawa, Yinɛ se'em en de suma'ahum daana la, se'em daana en tari a piihi dunkiin kãtɛ wa ze'ele kum puan lebe na la, tu Daana Yezu Kiresta doohe a ziim la nɔpu'ulegɔ la en ka tari ba'ahegɔ la puan,

²¹ wan bahɛ ti ya bi'ɛ tunsunɛ woo puan, ti ya ta'am tum a sumboolum, doohe la en boi tu puan tuna la tɔ, tuunsɛ'a en tigeri a nini Yezu puan, se'em ti suŋa dɛna a dinɛ saŋa woo. Taari.

²² N beleni ya mɛ n suurɔ, ŋmibe ya la n kpemehego yelehum wa, gee n yeen gulehɛ la girega girega bo' ya na.

²³ N boti ya mina ti ba bahɛ tu suuɔ Timoti, ti a han wa'am tɔtɔ na, a wan doohe la mam na ti n nyɛ ya.

²⁴ Pu'uhɛ ya nɛheduma, la nɛresunduma la woo bo' tu. Sɛba woo en boi Itali tiŋa pu'uheri ya na.

²⁵ Yinɛ zu'uhegɔ bɔna la ya za'a.