Hiburuduma 11 - ZE'ELEGO PAALEGA

Sakerɛ vuurɛ

¹ Nananawa, sakerɛ dela suure en ku gura beere puti'irɛ, suure en kɔ'ɛ gura sɛla ti nini ka nyɛ.

² Yelemɛŋerɛ, sakerɛ zuo, ti nɛreba yuum tɔgera ba yele.

³ Sakerɛ zuo ti tu bɔkɛ ti Yinɛ naam saazuo la timpaberɛ wa mɛ la a yelehum ma'a, bala, sɛla ti tu nyɛta wa ze'ele la sɛla ti tu ka nyɛta puan na.

Abɛl, Enɔki la Nowa makerɛ

⁴ Sakerɛ zuo ti Abɛl bo' Yinɛ bo'olum sebo en tigɛ nini gana Keen bo'olum la. Doohe ŋwana zuo, ti ba tɔgera a yele ti a dela tuuntɔɔ nɛra. Yinɛ mɛŋa en de aze'nyɛ daana bo' a bo'olum la. La en pun ki la, gee la bala za'a, a sakerɛ la zuo, a kelum tɔgera mɛ.

⁵ Sakerɛ zuo ti Yinɛ tee Enɔki kiŋɛ ti a ka makɛ lem kum. “Ba yuum ka nyɛ en se'ere en sɔi la, Yinɛ en dikɛ en kiŋɛ.” Gee ti teere wa wa'am na la, ba pun tɔgɛ a yele mɛ ti, “a tigɛ la Yinɛ nini.”

⁶ Bala, sakerɛ han ka bɔna, la kpe'em mɛ ti fum tigɛ Yinɛ nini, se'ere en sɔi la, se'em woo en wa'am a zi'an na, dela a mina ti Yinɛ boi mɛ, gee yɔɔra sɛba woo en eere en la ninmu'urɛ.

⁷ Sakerɛ zuo ti Nowa, Yinɛ kagɛ en doohe yele sɛ'a en wan wa'am na, ti Nowa nam yetɔgum la ninmu'urɛ, gee kpa' daka kãtɛ la ti a faaɛ a yire. Yele dina ti Nowa yuum dikɛ gakɛ timpaberɛ wa, gee nyaa sooe vaaɛ tuntɔɔnɛ en dole sakerɛ puan la.

Aberaham sakerɛ

⁸ Sakerɛ zuo ti Aberaham nam en yuum yi' en ti a nɔgɛ kiŋɛ zi'an ti a wan ta sooe ti ka dɛna a sɔ'ɔlum la. A yuum sirum ihege yɛ'a mɛ, gee ka mina en ye' zi'an la.

⁹ Sakerɛ zuo ti Aberaham ta zi'ire saŋa fii wa, tinsɛka puan ti Yinɛ biŋe nuurɛ ti a wan dikɛ bo' en la, wuu en de saana ka puan la, a ki'ire la suga puan, bala mɛa ti Aziki la Yakɔbe me iŋɛ, bamam sɛba la eŋa en lagum vaaɛ nɔbiŋere sɔ'ɔlum bumɔ mɛa la.

¹⁰ Se'ere en sɔi la, Aberaham yuum guri la tinkãtɛ en tari ɛ̃berɛ, ti ka gula, la ka mɛta dɛna Yinɛ.

¹¹ Sakerɛ zuo ti a to'e dɔgum paŋa nɔbiŋere, la en daa pun ba' kuregɛ la, ti Saara me ka dɔgera la, beni zuo, a yuum nam mɛ ti se'em en biŋe nuurɛ la dela yelemɛŋerɛ daana.

¹² Bala, ze'ele nɛra ayima wa puan na, nɛre se'em en ani wuu a ki mɛ la puan na, ti yaahi wa'am na, “zo'e wuu ŋmarebibehi en zo'e se'em sagbama zuo ha la, zo'e kan ta'am kãalɛ wuu kulaa tintombi'ihego la.”

¹³ Bana woo wa'am na ki mɛ la ba sakerɛ la, gee ka to'e Yinɛ en biŋe nuurɛ ti a bo' ba sɛla la, gee ba nyɛ la mɛ ba suyan zaaɛ zaarɛ ha ti la kini na, ti ba to'e la. Ba daa yeti bamam dela saama, dɛna ɛɛreba timpaberɛ wa zuo.

¹⁴ Nɛresɛba en tɔgeri ŋwana la, la niiɛ mɛ ti ba eere la ba mɛŋa tiŋa ti ba zi'ire.

¹⁵ Yelemɛŋerɛ ba han ti'ihɛ ni la ba tiŋa ti ba bahɛ pooren ha la yele, ba tari ni sore ti ba lebe.

¹⁶ Gee nananawa lan de se'em la dela, ba suure kɛ̃ mɛ la tinsɛka en gani bala, tinsɛka en ze'eti saazuo na la. Bala zuo, Yinɛ ka tari vi la ba yi'ira en ba Yinɛ. Yelemɛŋerɛ, a sirum maahum la tiŋa biŋe ba.

¹⁷ Sakerɛ zuo, ti Aberaham, Yinɛ wa makɛ en, ti a dikɛ Aziki kaabɛ. Eŋa se'em en to'e a nɔbiŋere lɔkɔ la, yuum maahum mɛ ti a dikɛ a dayɔba'arɛ wa kaabɛ.

¹⁸ A dayɔsɛka ti Yinɛ yele en yeti, “Aziki puan ti fum wan nyɛ yaahi ti ba dikɛ sigɛ hɔ la.”

¹⁹ Aberaham yuum ti'ihɛ nyɛ ti la de sira, ti Yinɛ wan ta'am ihege nɛra kum puan lebena, tɔgɛ biŋere puan a yuum sirum lebe to'e en mɛ.

²⁰ Sakerɛ zuo ti Aziki ka' sum bahɛ Yakɔbe la Esɔ beere puan.

²¹ Sakerɛ zuo ti Yakɔbe en wa pɔra kum la, a ka' sum bahɛ Yosefe dayɔɔhi zuo, “Nyiga a doore zuo na'ahera.”

²² Sakerɛ zuo ti Yosefe ta pɔra kum gee tɔgɛ bo' Iziraleduma, ba yɛhega yele, gee pa'alɛ ban wan pi' en se'em.

Moose sakerɛ

²³ Sakerɛ zuo ti Moose dɔgereba yuum sugɛ en ban yuum dɔgɛ en ti a ta paaɛ ŋmarehi sitã la. Se'ere en sɔi la, ba yuum nyɛ ti bia la sum mɛ, ti dabeem ka tara ba la naba la nuurɛ la ti a bo' la.

²⁴ Sakerɛ zuo ti Moose en yuum ta zo'e la, a zagehɛ ti, ba da yi'ira eŋa Faro poyua bia,

²⁵ gee tugum looe ti a nameha la Yinɛ nɛreba la nyana a dita nyɛlum be'em puan dabeha fii wa.

²⁶ A yuum nam ya ti Kiresta zuo a wan to'e kɛhega la namehegɔ, ti la dɛna tarega kãtɛ bo' en, nyana Igipiti tarega la, se'ere en sɔi la, a yuum biheri la yɔɔri kãtɛ la en boi nɛŋa ha la.

²⁷ Sakerɛ zuo ti a bahɛ Igipiti, ka zɔta dabeem la naba la sunsunyiim la. A yuum kɔ'ɔm ŋmibera mɛ kina wuu a nyɛ la se'em daana ti ba ka nyɛta la.

²⁸ Sakerɛ zuo ti a doohe azɔɛtole malema la, la ziim miihego, ti Sagena la en dole kuura bikiinduma la da ta'am kalum Izirale bikiima.

Izirale sakerɛ puan gendɔɔrɔ

²⁹ Sakerɛ zuo ti nɛreba la daa sige mɔgemɔlegɔ la puan kiŋɛ yakɛ wuu la dela kɛ'ɛŋa la, gee Igipitiduma la en se'em ti ba me iŋɛ bala la, ba yee la ko'om la puan.

³⁰ Sakerɛ zuo ti Yeriko nangɔɔma la lu, Izirale nɛreba la en kaari dɛ muna ta paaɛ dabeha ayopɔi daarɛ la.

³¹ Sakerɛ zuo ti Arahab en de yalema yuum ka lagum nyɛ sageŋɔ la sɛba woo en yuum ka nam la, se'ere en sɔi la, a yuum to'e Izirale viihereba la mɛ la suma'ahum.

³² Beni ti n wan le yele pa'ahɛ? Saŋa kan bɔna bo' mam ti n yele Gidiyɔn, Barake, Samsin Yɛfita, Deviti la Samuwɛle, la nɔtɔgeheba la,

³³ sɛba en yuum ze'ele sakerɛ puan nyaŋɛ tinkãra, gakɛ la yelemɛŋerɛ, ze'ele to'e sɛla ti Yinɛ biŋe nuurɛ la, mum gbigema nɔya,

³⁴ kiihe bugum en taaɛ dita ka tara makerɛ, piiɛ kuura sɔ'a nuuren, nyɛ paŋa tɔregɔ puan lebege kansanhi pɛntɛrɛ puan, bahɛ ti pɛntiireba en de saama zɔ zɔpɛɛlega.

³⁵ Ti pɔgehi nɛreba en tabelɛ ki, le ihege ti ba to'ohe ba. Ba mɛlehɛ basɛba mɛ, gee ti ba zagehɛ ti bamam kan yehe paka deo la puan, ti ba to'e ihegere sunɛ se'ere n gani bala.

³⁶ Basɛba to'ohe la kɛhega la ŋmɛ'kãtɛ, pun ta paaɛ kuto zɔtɔ ba'a, la paka deto puan.

³⁷ Ba lobe basɛba mɛ la kuga ku, aahum basɛba wele wele, kɔrum basɛba la sɔ'ɔhi. Ba yɛ la piihi la buuhi gana ɛɛra la nimbu'ɔ, kua, la mɛlehegɔ,

³⁸ ba eere nyaara la kpaahenɛ zi'ihi, zɔya zuto, tahi leŋen, tiŋan yogero puan. Tiŋa wa ka ana suŋa bo' ba.

³⁹ Gee yele ana za'a la, la ban pun pɛgɛ ba la ba sakerɛ la, ba ka nyaŋɛ to'e sɛla ti Yinɛ biŋe nuurɛ ti a bo' la,

⁴⁰ se'ere en sɔi la, Yinɛ maahum la sɛla en gani bala biŋe, ti tumam la bamam lagum taaba bi'ɛ kahegɛ.