Galatɩ 6 - ZE'ELEGO PAALEGA

Zi ya taaba zeero

¹ N suurɔ wa, ya han ta baŋɛ ti be'em sebo en nyɔkɛ ya se'em, yamam sɛba en boi Fa'a Sia la paŋa puan la, malum sɛ en ze'ele, gee iŋɛ ya dɛ la sigehe n mɛŋa. Gee bihɛ ya mɛhi suŋa ti yamam me da ta lu pa'ahegɔ be'o puan.

² Ziiri ya taaba zeero, ŋwana ti Kiresta ze'elego la wan wa'am asira na.

³ Sɛba en dagi sɛsɛla la han ti'iha ti ba dela sɛla, ba pã'aheri la ba mɛhi.

⁴ Nɛra woo makɛ a mɛŋa tuuma bihɛ, gee dagi ayima tuuma. Bala en wan bahɛ ti fum ŋmɛ'ɛra nyu'ɔ.

⁵ Se'ere en sɔi la, nɛra woo ziira la a mɛŋa zeero.

⁶ Sɛba ti ba pa'alɛ ya yelehum la dela ya tɔrɛ sɛla woo en ani suŋa la se'em en pa'alɛ ya la.

⁷ Da pã'aha ya mɛhi, nɛra kan pim Yinɛ. Nɛra en burɛ sɛla la, bala mɛa ti a kɛ̃'ɛ̃ra.

⁸ Fum han burɛ la ingɔŋɔ yɛla, fum kɛ̃'ɛ̃ri la ingɔŋɔ sageŋɔ yɛla. Gee fum han burɛ la Sia puan yɛla, fum kɛ̃'ɛ̃ri la vom kamba'ahɛ Sia la puan.

⁹ Bala, da bahɛ ya ti tu taregɛ la tu ita sɛla en de ma'a. Se'ere sɔi la, tu wan ta kɛ̃', kɛ̃'a saŋa la han paaɛ, ti tu ka bahɛ tu ita sɛla en de ma'a la.

¹⁰ Bala zuo, sansɛka woo puan, bahɛ ya ti tu ita sɛla en ani suŋa bɔ'ɔra nɛra woo, yele yele wuu sɛba en de yire puan, Kiresta sakerɛ la puan.

Ba'ahegɔ kã'aŋɔ, la ka'a

¹¹ Bihɛ ya gɔnɔ kãra seto ti n ni gulehɛ la n mɛŋa nu'o bɔ'ɔra ya na!

¹² La dela sɛba en boti ba ŋmɛ'ɛra nyu'ɔ la ba ingɔŋɔ yɛla la, n zigeri ti ba pɛregɛ ya ti ya ŋma la. Ba iti ŋwana ti ba da nyɛ namehegɔ Kiresta pumpuuredɔɔ la yɛla muulegɔ puan.

¹³ Sɛba en pun ŋma la mɛhi ka dole ze'elego la, gee ba boti ya ŋma mɛ ti ba ta'am ŋmɛ' nyu'ɔ la ya ingɔŋɔ la.

¹⁴ Mam da makɛ ŋmɛ' n nyu'ɔ yele se'ere puan, han dagena tu Daana Yezu Kiresta pumpuuredɔɔ la zuo ma'a, yele se'ere zuo ti ba kpa' timpaberɛ wa labelɛ mam, gee kpa' mam labelɛ timpaberɛ wa la.

¹⁵ Se'ere en sɔi la, ŋmaa, la a ka ŋma, dagi sɛsɛla, gee dɔgum paalemɔ en de sɛla woo!

¹⁶ Gee sɛba en wan dɔla pa'ali kuna wa la, suma'ahum, la a nimbɔ'zɔrɛ bɔna la ba, gee bɔna la Yinɛ Izirale paalega la.

¹⁷ Yehe zina yɛ'ɛha, se'em da ɛ daaŋɔ bo' mam. Se'ere en sɔi la,Yezu yiha en bala to'e mam iŋa wa za'a wa.

¹⁸ Tu Daana Yezu Kiresta zu'uhegɔ bɔna la ya, ya sia puan, n suurɔ wa. Taari.