Galatɩ 5 - ZE'ELEGO PAALEGA

¹ Han dɛna fai, Kiresta en faaɛ tu bahɛ fai. Ze' ya kankaŋi bala zuo la, gee da le dikɛ ya mɛhi bo' da'aberɛ yɔgehega la.

Kiresta kɔma fai naanɛ

² Kelehe ya! Mam Pɔɔl yeti ya mɛ ti, ya han bahɛ ti ba ŋma ya, Kiresta yi kan tari nyuurɔ bo' ya.

³ Le yɛ'ɛha, n yeti mɛ la ninmu'urɛ bɔ'ɔra fum buraa sɛka bahɛ ti ba ŋma hɔ yeti, fum daana dela fum nana ze'elego la yɛla la za'a.

⁴ Yamam sɛba n boti ya naaɛ la doohe ze'elego puan la, ŋmaaɛ ya mɛhi mɛ Kiresta zi'an bahɛ. Ya boi la Yinɛ zu'uhegɔ la yiŋa.

⁵ Gee Fa'a Sia la, la sakerɛ puan, tumam mu'ɛ la nini gura beere tuntɔɔnɛ.

⁶ Beni zuo, Kiresta puan, fum ŋma ya yoo, fum ka ŋma yoo, la ka tari sɛla tɔ'ɔra. Yele se'ere ma'a en tari sɛla tɔ'ɔra dela, sakerɛ en dole nɔŋerɛ puan.

⁷ Ya daa zoti la suŋa suŋa. Ani en gu' ya ti ya da nam yelemɛŋerɛ la?

⁸ Pã'ahegɔ kuna taaba ka ze'ele Yinɛ se'ere n yi' ya la zi'an na.

⁹ Dabelɛ fii wa n ihegere tizom za'a.

¹⁰ Mam mi' ya suŋa suŋa Daana la puan ti ya ka ti'ihɛ buyi' buyi'. Gee se'em daana en tuleni ya puti'ira la wan nyɛ a namehegɔ paaɛ paaɛ la en pun dɛna se'em me.

¹¹ Gee n suurɔ, wa, ŋwani ti ba kelum nameha mam, mam han kelum muulɛ ni ŋmaa yɛla? La han de ni la bala, Kiresta kum pumpuuredɔɔ zuo la muulegɔ la kan tara ni daaŋɔ.

¹² Mam boti ni ti nɛresɛba en pɛregeri ya wa la, ba pun kɔ'ɔm lage ni ba mɛhi!

¹³ Ba yi' ya wa'am la fai puan na, n suurɔ, gee da dikɛ ya fai kana wa galena ya mɛhi. Gee tugum doohe ya nɔŋerɛ puan, tuna bɔ'ɔra taaba suŋa suŋa.

¹⁴ Se'ere en sɔi la, ze'elego la za'a ninmu'urɛ dela “Fum Nɔŋɛ fum suuɔ wuu fum mɛŋa la.”

¹⁵ Gee la han dɛna ti ya duni la taaba, gee yi'ira taaba, mini ya suŋa ti la kan yuue la yan n ba'ahɛ taaba lipi.

Ingɔŋɔ tuuma

¹⁶ Mam yeti ya yeti, voni ya Sia la n boti se'em la, gee sore da bɔna la fii me ti ya tigehɛ ya ingɔŋɔ kɔrɛ la.

¹⁷ Se'ere en sɔi la, ingɔŋɔ la n boti sɛla la, dagi sɛla ti Sia la bɔta. Sia la me en boti sɛla la dagi sɛla ti ingɔŋɔ la bɔta. Bana bayi' wa ka sakerɛ bɔ'ɔra taaba, ti la gu' ti fum da ta'am ita fum boti se'em.

¹⁸ Gee Sia la han pa'ala ya, ya dagi yamehi bo' ze'elego la.

¹⁹ Ingɔŋɔ tuuma la ka sugɛ. Ba dela, yaalegɔ, dɛgerɔ, inganɛ kɔrɛ,

²⁰ baga kaabegɔ, sɔ̃nini, diŋo, zaberɛ, nyuure, sunsunyiim, nɔkpe'ene, yelehego, Pa'alebe'ero,

²¹ nintɛrega, buka, punya'anɛ, la yelesɛ'a n ani ŋwana. N yeti ya mɛ la ninmu'urɛ wuu mam pun yele ni ya la ninmu'urɛ yia se'em la, ti sɛba en iti yele ana taaba kan lagum kɛ̃ Yinɛ sɔ'ɔlum la.

Sia walɛ

²² Gee Sia la walɛ dela, nɔŋerɛ, nyɛɛma, suma'ahum, ŋmibega, pupɛɛla itesuŋɔ, la sakerɛ,

²³ zulaam, la nyɔkɛ n mɛŋa. Ze'elego ka boi gana yele ana.

²⁴ Sɛba n de Kiresta Yezu deni la, kpa' ba inganɛ la mɛ, la de kunkoma'ahum la de kɔrɛ la.

²⁵ Tu han vɔna la Sia la vom, bahɛ ya ti Sia la me pa'alɛ tɔ.

²⁶ Da bahɛ ya ti tu dɛna pumpã'aheduma, pagera taaba, tara nintɛrega la taaba.